လါယနူၤအါရံၤ(၈)သီ,၂၀၂၅နံၣ်
လၢကီၫ်တရူး,တံးဘဲးဟီၣ်က၀ီၤလၢ သ့ၣ်ပှၫ်တီၣ်အံၤ ဖဲမဟါနံၤ ဂီၤခီအဆၢကတီၫ် ဟီၣ်ခီၣ်ဟူး၀းလၢအသဟီၣ် ဆူၣ်ဆူၣ်ကလဲာ်အဃိ ပှၤဘၣ်သံ(၁၀၀)ဂၤဃၣ်ဃၣ်၀ံၤ ဘၣ်ဒိဘၣ်ထံး(၆၂)ဂၤအဂ့ၫ် ပှၤဘၣ်မူဘၣ်ဒါတဖၣ်တဲ၀ဲလီၤ.
တၫ်သံတၫ်ပှၫ်အနီၫ်ဂံၫ်နီၫ်ဒွးအိၣ်အါထီၣ်ကဒီးသ့၀ံၤ ဟီၣ်ခိၣ်ဟူးအံၤ ဖဲမဟါဟီၣ်က၀ီၤနီၫ်ထိၣ် ဂီၤ(၉)နၣ်ရံၣ်အဆၢ ကတီၫ် ဟူးဂဲၤ၀ဲ ဖဲတံးဘဲးဟီၣ်က၀ီၤ,ရှံၣ်ကးစံၣ်၀့ၫ် ခီဖျိလၢအယိာ်(၁၀)ကံၣ်လိၣ်မံထၢၣ်တုၤအသဟီၣ်ဆူၣ် အပတီၫ် အိၣ်၀ဲ(၇.၁)အဂ့ၫ် အမဲရကၤတၫ်ထိၣ်တၫ်ဒွးဟီၣ်ခိၣ်၀ဲၤကျိၤ ထုးထီၣ်ဘိးဘၣ်ရၤလီၤ၀ဲလီၤ.
ဟီၣ်ခိၣ်ဟူး ပိာ်ထွဲထီၣ်အခံလၢ အဂၤတဖၣ်စ့ၫ်ကီးအိၣ်၀ဲလီၤ.ထံကီၫ်အိၣ်ဘူး ကီၫ်နံၣ်ပီဒီးကီၫ်အ့ဒံယါ ဟီၣ်က၀ီၤ တနီၤစ့ၫ်ကီး တူၫ်ဘၣ်၀ဲဟီၣ်ခိၣ်ဟူးအံၤဒံးန့ၣ်လီၤ.ဘၣ်ဆၣ်တၫ်ဘၣ်ဒိဘၣ်ထံးတခီ ထုးထီၣ်တဲဖျါ၀ဲတအိၣ်ဘၣ်. ဟီၣ်ခိၣ်ဟူးအဃိ တိဘဲးဟီၣ်က၀ီၤပူၤ ဟံၣ်(၁၀၀၀)ဖျၢၣ်ဘၣ်ဟးဂီၤ၀ဲအဂ့ၫ် တရူးဘၣ်မူဘၣ်ဒါတဖၣ်တဲ၀ဲလီၤ.
ဟီၣ်က၀ီၤလၢ တၫ်ခုၣ်ဒိၣ်အံၤအပူၤအဂီၫ် တၫ်မၤပူၤဖျဲးသးသမူတၫ်ဖံးတၫ်မၤဒီး တၫ်မၤစၢၤဆီၣ်ထွဲတၫ်ဖံးတၫ်မၤတဖၣ် အဂီၫ် တရူးကလံၤသုးတပၤ သူ၀ဲကဘီယူၤလၢတလိၣ် ပှၤနီလၢနီၫ်ကစၫ်တဖၣ်န့ၣ်လီၤ. ဟီၣ်က၀ီၤလၢ ဟီၣ်ခိၣ်ဟူးအံၤအပူၤကတီၫ်အံၤ ထံအီဒီးလီမ့ၣ်အူပတုာ်ကွံာ်အသးန့ၣ်လီၤ.
တရူးကီၫ်ခိၣ် ရှံၣ်ကၠ့ပ့ၣ်တခီ တၫ်သံတၫ်ပှၫ်ကစှၤအဂီၫ်,တၫ်မၤပူၤဖျဲးသးသမူတၫ်ဖံးတၫ်မၤတဖၣ် တၫ်ကမၤဆူၣ်ထီၣ် အဂီၫ်ဒီးတၫ်ကကူစါယါဘျါပှၤဘၣ်ဒိဘၣ်ထံးတဖၣ်ဒီးတၫ်က့ၤသူၣ်ထီၣ်ဆီလီၤတၫ်ဖံးတၫ်မၤတဖၣ်အဂီၫ် နဲၣ်လီၤဃာ်၀ဲ ပှၤဘၣ်မူဘၣ်ဒါတဖၣ်အဂ့ၫ် ထံကီၫ်ပၢတၫ်ကစီၣ်သန့တဖၣ် ပာ်ဖျါ၀ဲလီၤ.
Ref: BBC
