လါယနူၤအါရံၤ(၇)သီ,၂၀၂၅နံၣ်
ခဲနဒၣ်ကိတိာ်ခိၣ်ကျၢၫ် Justin Trudeauန့ၣ် အတၫ်တီခိၣ်ရိၣ်မဲအဖီခိၣ် ဘၣ်ကွၫ်ဆၢၣ်မဲာ်ဒီး တၫ်သူၣ်တမံသးတမုာ် အါထီၣ်၀ံၤအလီၫ်ခံ ဘိးဘၣ်ရၤလီၤ၀ဲလၢကဟးထီၣ်လၢမူဒါလီၫ်လၤန့ၣ်လီၤ.
ဖဲတယံာ်ဒံးဘၣ်အတီၫ်ပူၤ လၢအပဒိၣ်ကရၢပူၤ ခိသွဲကိတိာ် ဟးထီၣ်လၢမူဒါလီၫ်လၤသတူာ်ကလာ်အဃိ ပဒိၣ်ကရၢပူၤ တၫ်အိၣ်သးတဂၢၫ်တကျၢၤတဖၣ် အိၣ်အါထီၣ်၀ဲန့ၣ်လီၤ.မ့ၫ်ကွၫ်လၢ ပဒိၣ်ကရၢပူၤ တၫ်သဘံၣ်သဘုၣ်တဖၣ်န့ၣ် တၫ်ဃု ထၢလၢကဟဲ အ၀ဲန့ၣ်တမ့ၫ်ကကဲထီၣ်တၫ်ဃုထၢလၢအဂ့ၤကတၢၫ်လၢၤဘၣ်အဂ့ၫ် ခဲနဒၣ်ကိတိာ်ခိၣ်ကျၢၫ်န့ၣ် ဖဲတၫ်ဘိး ဘၣ်ရၤလီၤ၀ဲန့ၣ်အပူၤ ပာ်ဖျါ၀ဲလီၤ.
တုၤလၢလံၣ်ဘရဲၣ်ပၣ်တံၣ်(Liberal Party) ဃုထၢထီၣ်ခိၣ်နၫ်သီန့ၫ်တစု အ၀ဲန့ၣ်ကဟံးန့ၫ်မူဒါဒ်ကိတိာ်ခိၣ်ကျၢၫ်အဂ့ၫ် တဲ၀ဲလီၤ.လါ ယနူၤအါရံၤ(၂၇)သီနံၤ,ဘျီၣ်ဒိၣ်တၫ်အိၣ်ဖှိၣ်လၢတၫ်ကမၤ၀ဲန့ၣ် သုးကွံာ်၀ဲဆူ လါမးရှ်(၂၄)သီအနံၤအဂ့ၫ် ပှၤဘၣ်မူဘၣ်ဒါ တဂၤတဲ၀ဲလီၤ.တၫ်အံၤ လံၣ်ဘရဲၣ်ပၣ်တံၣ်(Liberal Party) ဃုထၢထီၣ်ခိၣ်နၫ်သီကန့ၫ်အဂီၫ် တၫ်ဟ့ၣ် တၫ်ဆၢကတီၫ် န့ၣ်လီၤ.
ခဲနဒၣ်ကိတိာ်ခိၣ်ကျၢၫ် Trudeauန့ၣ် ကိၣ်ဆၢၣ်ဘ့တံးပၣ်တံၣ် (Conservative Party) အတၫ်ပၢယံာ်(၁၀)နံၣ်၀ံၤ အလီၫ်ခံ ဖဲ၂၀၁၅နံၣ်န့ၣ် ဟံးန့ၫ်မူဒါဒ်ကိတိာ်ခိၣ်ကျၢၫ်အသိးန့ၣ်လီၤ.သးနံၣ်(၅၃)နံၣ်အိၣ် ကိတိာ်ခိၣ်ကျၢၫ် Trudeauန့ၣ် ဖဲထီၣ် သီအကတီၫ် ပှၤဘၣ်သူၣ်ဘၣ်သးအါဘၣ်ဆၣ် ဖဲအပူၤကွံာ်နံၣ်တဖၣ်အပူၤ ကီၫ်ခဲနဒၣ်အပူၤ တၫ်အီၣ်တၫ်အီဒီး ဟံၣ်ဃီ အပှ့ၤကလံၤဒိၣ်ထီၣ်တလၢ,ခီကီၫ်ပှၤသုးလီၫ်သုးကျဲတဖၣ်ဟဲအါထီၣ်ပာ်ဃုာ် တၫ်ဂ့ၫ်အကလုာ်ကလုာ်အဃိ ပှၤဘၣ် သူၣ်ဘၣ်သးအီၤစှၤလီၤန့ၣ်လီၤ.အမဲရကၤကီၫ်ခိၣ်ဒီနၢၣ်ထရၢး တဲပျံၤတဲဖုး၀ဲလၢ ကထၢအါထီၣ် ခဲနဒၣ်ပနံာ် တဖၣ် တၫ်ကူၣ်လဲၫ်မၤကၤခိသွဲအဃိ လၢထံဂုၤကီၫ်ဂၤန့ၣ် ခဲနဒၣ်ကွၫ်ဆၢထၣ်မဲာ်ဘၣ် တၫ်ဃံးတၫ်စ့ၤတဖၣ်န့ၣ်လီၤ.
Ref: VOA
