လါယနူၤအါရံၤ(၇)သီ,၂၀၂၄နံၣ်
ဖဲလါယနူၤအါရံၤ(၄)သီနံၤ ဘၣ်ထွဲတၫ်ပျၫ်ကွံာ်ပှၤလီၤဃိၣ်ဖိတဖၣ်အဖီခိၣ် သုးကီၣ်ကးပှၤတဲတၫ်ပၢသုးခိၣ်ကျၢၫ်ဂီၫ်ဂ့ၫ် စီၣ်မ့ထိတဲတ့ၫ် တၫ်ဂ့ၫ်တၫ်ကျိၤတဖၣ်န့ၣ် တၫ်မ့ၫ်တၫ်တီတအိၣ်ဘၣ်အဂ့ၫ်ဒီး တၫ်ကမၣ်တဖၣ် ထီဒါ၀ဲဆူၣ်ဆူၣ်ကိၤကိၤအဂ့ၫ် ထံရူၫ်ကီၫ်သဲးပှၤလီၤဃိၣ်ဖိ(လီၫ်လံၤ)တဖၣ် ဖဲလါယနူၤအါရံၤ(၆)သီနံၤန့ၣ် ပာ်ဖှိၣ်ထုးထီၣ်ဘိးဘၣ်ရၤလီၤ၀ဲ လံာ် န့ၣ်လီၤ.
သုးကီၣ်ကးန့ၣ် အဲၣ်ဒိးဟံးန့ၫ်ထံရူၫ်ကီၫ်သဲးတၫ်ဘၣ်ဘျူးအဃိ နီၫ်ဂံၫ်နီၫ်ဒွးတဖၣ်န့ၣ် လီ၀ဲဒီးဘိးဘၣ်ရၤလီၤ၀ဲအဃိ ထီဒါ၀ဲအဂ့ၫ် ထံရူၫ်ကီၫ်သဲးပှၤလီၤဃိၣ်ဖိ(လီၫ်လံၤ)တဂၤလၢအမ့ၫ် ကိၣ်ပၠးတးတဲ၀ဲလီၤ.
“ထံရူၫ်ကီၫ်သဲး ပှၤလီၤဃိၣ်ဖိ လၢတၫ်ပျၫ်ကွံာ်တဖၣ် အနီၫ်ဂံၫ်နီၫ်ဒွးအနီၫ်န့ၣ် တၫ်ထံၣ်ဘၣ်လၢ လီၤဆီလိာ်သးဒီး သုး ကီၣ်ကးဘိးဘၣ်ရၤလီၤ၀ဲအနီၫ်ဂံၫ်နီၫ်ဒွးန့ၣ်လီၤ.သုးကီၣ်ကးန့ၣ် သူ၀ဲထံရူၫ်ကီၫ်သဲးပှၤလီၤဃိၣ်ဖိတဖၣ်၀ံၤ လီတၫ်ဒီး ဟံးန့ၫ်ထံရူၫ်ကီၫ်သဲးတၫ်ဘၣ်ဘျူးတဖၣ် အိၣ်၀ဲအဘျီတဖၣ်အဘျီလံန့ၣ်လီၤ.
တၫ်ပျၫ်ကွံာ်ပှၤလီၤဃိၣ်ဖိအပူၤ ပှၤလၢဘၣ်လီၤဃိၣ်ခီဖျိတၫ်ဘျၢအဆၢဒိၣ်(၅၀၅),ထံရူၫ်ကီၫ်သဲးပှၤလီၤဃိၣ်ဖိ (၆)ကယၤဘျဲၣ်ပာ်ဃုာ်အဂ့ၫ် သုးခိၣ်ကျၢၫ်ဂီၫ်ဂ့ၫ် စီၣ်မ့ထိတဲလီၤ၀ဲလၢ Mediaလၢသုးကီၣ်ကးပၢဆှၢ၀ဲတဖၣ်အပူၤန့ၣ်လီၤ.
တၫ်ကရၢကရိလၢမၤစၢၤဆီၣ်ထွဲ ထံရူၫ်ကီၫ်သဲးပှၤလီၤဃိၣ်ဖိတဖၣ် ထၢဃာ်၀ဲစရီအဖီခိၣ် ပှၤလၢဘၣ်တၫ်ပျၫ်ကွံာ်အီၤ အကျါ ထံရူၫ်ကီၫ်သဲးပှၤလီၤဃိၣ်ဖိပာ်ဃုာ်ဒၣ် (၃)ကယၤဘျဲၣ်လီၤအဂ့ၫ် ထုးထီၣ်ပာ်ဖျါ၀ဲလီၤ.
သုးကီၣ်ကးန့ၣ် ထံဂုၤကီၫ်ဂၤတၫ်ဆီၣ်သနံးတဖၣ်ကလီၤစှၤအဂီၫ် ပျၫ်ကွံာ်ထံရူၫ်ကီၫ်သဲပှၤလီၤဃိၣ်ဖိတဖၣ်၀ံၤ အနီၫ်ဂံၫ် နီၫ်ဒွးစ့ၫ်ကီး လီ၀ဲဒီးထုးထီၣ်ဘိးဘၣ်ရၤလီၤ၀ဲအဂ့ၫ် ကိၣ်ပၠးတးတဲ၀ဲလီၤ.
တၫ်ဘိးဘၣ်ရၤလီၤလၢ ထီဒါသုးကီၣ်ကးန့ၣ် ထံရူၫ်ကီၫ်သဲးပှၤလီၤဃိၣ်ဖိ(လီၫ်လံၤ) ၂၆ဂၤ ပာ်ဖှိၣ်ထုးထီၣ်၀ဲအဂ့ၫ် တၫ်ဘိးဘၣ်ရၤလီၤအပူၤ ပာ်ဖျါ၀ဲလီၤ.
ထံရူၫ်ကီၫ်သဲးပှၤလီၤဃိၣ်ဖိတဖၣ်ပှာ်ဘျးစဲ (PPNM)ထၢဖှၣ်စရီတၫ်ဂ့ၫ်တၫ်ကျိၤအဖီခိၣ် ဖဲလါယနူၤအါရံၤ(၄)သီနံၤ တၫ် ပျၫ်ကွံာ်ပှၤလီၤဃိၣ်ဖိအကျါ ၀့ၫ်တကူၣ်,အ့စ့ၣ်ဃိၣ်ပူၤ ပှၤဃိၣ်ဖိ(၁)ကယၤဘျဲၣ်ဃၣ်ဃၣ်ပာ်ဃုာ် ထဲဒၣ်ထံရူၫ်ကီၫ်သဲးပှၤလီၤဃိၣ်ဖိ (၃၃၄)ဂၤပာ်ဃုာ်၀ဲအဂ့ၫ် ဖဲလါယနူၤအါရံၤ(၆)သီနံၤန့ၣ် ထုးထီၣ်ဘိးဘၣ်ရၤလီၤဃာ်၀ဲလီၤ.
Ref: RFA
