လါယနူၤအါရံၤ(၇)သီ,၂၀၂၄နံၣ်
ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢ,သုးက့နီၣ်ဂံၢ်(၄),ကီၢ်ရ့ၣ်ဘျံးဒဝဲၢ်,တနီသရံၣ်ကီၢ်ဆၣ်ဟီၣ်ကဝီၤအပူၤ ကဘီချံတဘ့ၣ်လၢအဟဲတီဃုၥ်ဝဲဟုသးအထၢၣ်(၂၀၀၀)ဘျဲၣ်လၢ ကလဲၤဆှၢန့ၢ်ဝဲပယီၤသုးသ့ၣ်တဖၣ်တၢ်အီၣ်အဂီၢ်အံၤ သုးက့နီၣ်ဂံၢ်(၄)ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၁၁)ဖီၣ်န့ၢ်၀ဲအဂ့ၢ် ကီၢ်ရ့ၣ်ဘျံးဒ၀ဲၢ်နဲၣ်ရွဲၣ်ပဒိၣ်စီၤအဲၣ်နၤ စံးဘၣ်R2Kန့ၣ်လီၤ.
ကီၢ်ရ့ၣ်ဘျံးဒ၀ဲၢ်နဲၣ်ရွဲၣ်ပဒိၣ်စီၤအဲၣ်နၤ စံး၀ဲလၢ” အကဲထီၣ်သးန့ၣ် ဖဲ(၂)သီအနံၤန့ၣ် ဒုၣ်ဒါန့ၣ်သူ၀ဲဒၣ် ပၠူၣ်စီထံအခိၣ်ချံဒီး တီၣ်ဟုသးအထၢၣ်(၂)ကထိဘျဲၣ်မီၤ. ကဘီတီၣ်ဟုးသးန့ၣ် လဲၤလၢပီၣ်လဲၣ်ပူၤဒီး ပပှၤဖီၣ်န့ၢ်၀ဲအဂ့ၢ်” န့ၣ်လီၤ.
ကဘီတီၣ်ဟုးသးလၢ အဟဲတီဆှၢဝဲတၢ်အီၣ်တၢ်အီဒီးတၢ်ဖီၣ်ချုးန့ၢ်အီၤတဘ့ၣ်အံၤန့ၣ် မ့ၢ်ဒ်သိးဒီးကလဲၤစိၥ်ဆှၢန့ၢ်ဝဲပယီၤသုးလၢအိၣ်ဖဲတနီသရံၣ်ကီၢ်ဆၣ်ဟီၣ်ကဝီၤအပူၤအဂ့ၢ်အ၀ဲစံးအါထီၣ်၀ဲန့ၣ်လီၤ.
ဖဲလၢဖီၣ်န့ၢ်၀ဲ ကဘီတီၣ်ဟုသးအဆၢကတီၢ် ဖီၣ်န့ၢ်၀ဲဃုၥ်ဒီးပှၤနီၣ်ချံဖိ(၇)ဂၤ, ဟုသးအထၢၣ်(၂)ကထိဘျဲၣ်, တၢ်အီၣ်တၢ်အီတဖၣ်ဒီး တၢ်ဖိတၢ်လံၤအဂုၤအဂၤတဖၣ်၀ံၤ တၢ်ပၢဆှၢဃၥ်၀ဲအဂ့ၢ် တၢ်သ့ၣ်ညါဘၣ်၀ဲန့ၣ်လီၤ.
“ပဖီၣ်န့ၢ်အီၤ လီၤတံၢ်န့ၣ် ဒုၣ်ဒါအဟုသး(၂)ကထိဘျဲၣ်ဒီး အ၀ဲသ့ၣ်ကဆှၢ၀ဲဆူအသုးကလၢၤအဂီၢ်. ကဆှၢ၀ဲအဂီၢ် တၢ်ဘံၣ်တၢ်ဘၢတအိၣ်ဘၣ်အဃိ ဆှၢ၀ဲလၢပၠူၣ်ဆီထံအတၢ်ရဲၣ်တၢ်ကျဲၤ ပၥ်၀ဲဒ်သိး ကမျၢၢ်အဟံၣ်အက့ၢ်အဂီၤ, ပဖီၣ်န့ၢ်အီၤန့ၣ် ဖီၣ်န့ၢ်အီၤလၢ ပီၣ်လဲၣ်ပူၤလီၤ” အဂ့ၢ် ကီၢ်ရ့ၣ်ဘျံးဒ၀ဲၢ်နဲၣ်ရွဲၣ်ပဒိၣ်စီၤအဲၣ်နၤ စံး၀ဲန့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုးအံၤ ဆှၢခူသူၣ်အပှၤတၢ်အီၣ်တၢ်အီလၢ ကျဲအကပၤကပၤအိၣ်အသိး ညီနုၥ်သူ၀ဲကမျၢၢ်သိလ့ၣ်အကျိၤအကျဲဒီး မၢကမျၢၢ်ဆှၢန့ၢ်၀ဲ ဒ်န့ၣ်အသိး အပှၤသုးဘၣ်ဒိဘၣ်ထံးတဖၣ်စ့ၢ်ကီး ဆှၢ၀ဲဒ်န့ၣ်လီၤအဂ့ၢ် တၢ်သ့ၣ်ညါဘၣ်န့ၣ်လီၤ.
အပူၤကွံၥ် လါဒံၣ်စ့ဘၢၣ်န့ၣ် သုးကီၣ်ကးအသုးတဖၣ် ဟဲထီၣ်၀ဲဆူ တနီသရံးကီၢ်ဆၣ်, သ့ၣ်ခိတကပၤဒီး မၤ၀ဲဒုးယၤရဲၣ်ကျဲၤတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးအသုးလၢ အိၣ်ဖဲဒ၀ဲၢ်မုၢ်ထီၣ်ဟီၣ်က၀ီၤတပၤအံၤစ့ၢ်ကီး လဲၤသုးဆီတလဲအသးဆူ ကၠီးမဲတီၣ်ဒီး၀့ၢ်တၢ်အဲၣ်တပၤအိၣ်၀ဲအဂ့ၢ် အ၀ဲစံးအါထီၣ်၀ဲန့ၣ်လီၤ.
ကတီၢ်ခဲအံၤန့ၣ် သုးကီၣ်ကးအသုးတဖၣ် ဟးဆီလီၤအသးဖဲ ဒူသ၀ီပူၤအသိး ဒိးလီၤဃၥ်၀ဲမ့ၣ်ပိၢ်တဖၣ်အဃိ ဒူသ၀ီဖိတဖၣ်ယီၢ်ဘၣ်၀ဲမ့ၣ်ပိၢ်ဒီး တၢ်ဘၣ်ဒိဘၣ်ထံတဖၣ်အိၣ်၀ဲအဂ့ၢ်တၢ်သ့ၣ်ညါဘၣ်န့ၣ်လီၤ.
