လါယနူၤအါရံၤ(၇)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်က၀ီၤ,သုးက့(၇)ဘ့ၣ်,ကီၢ်ရ့ၣ်(၇)ဘ့ၣ်အပူၤ စးထီၣ်လၢ၂၀၂၄နံၣ်,လါယနူၤအါရံၤ(၁)သီတုၤလါဒံၣ်စ့ဘၢၣ်(၃၀)သီအနံၤ (၁)နံၣ်အတီၢ်ပူၤ တၢ်ဒုးဖးဒိၣ်ကဲထီၣ်တ့ၢ်အဘျီ(၄၀)ပၥ်ဃုၥ် တၢ်ဒုးအဆံးအကလုၥ်ကလုၥ်ကဲထီၣ်တ့ၢ်၀ဲလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုးအဘၢၣ်စၢၤ ခဲလၢၥ်ပၥ်ဖှိၣ်(၃၀၂၇)ဘျီအဂ့ၢ် တၢ်သ့ၣ်ညါဘၣ်န့ၣ်လီၤ.
(၁)နံၣ်အတီၢ်ပူၤ ကီၢ်သူလ့ၤတၢ်ပၢဟီၣ်က၀ီၤ,သုးက့(၇)ဘ့ၣ်,ကီၢ်ရ့ၣ်(၇)ဘ့ၣ်အပူၤ တၢ်ဒုးကဲထီၣ်တ့ၢ်သးလၢKNLAဒီးသုးကီၣ်ကးအသုးအဘၢၣ်စၢၤအပူၤ သုးကီၣ်ကးတပၤမၤ၀ဲကလံၤကျါတၢ်ဒုးခဲလၢၥ်ပၥ်ဖှိၣ်(၉၄၃)ဘျီ,ခးလီၤကျိဖးဒိၣ်ခဲလၢၥ်ပၥ်ဖှိၣ်(၄၆၀)ဘျီ,ဒြိတၢ်ဒုးခဲလၢၥ်ပၥ်ဖှိၣ်(၃၀၀)ဃၥ်ဃၥ်,တၢ်ဒုးစဲးပြဲး(၂၄၀၀)ဃၣ်ဃၣ်အဂ့ၢ်တၢ်သ့ၣ်ညါဘၣ်န့ၣ်လီၤ.
တၢ်ဒုးလၢကဲထီၣ်တ့ၢ်သးအပူၤ သုးကီၣ်ကးတပၤအပှၤသုးဖိသံ၀ဲ(၁၉၇၂)ဂၤ,တၢ်ဖီၣ်န့ၢ်မူဒံး(၁၂၁)ဂၤဒီးပှၤလၢဟဲပၥ်လီၤစုက၀ဲၤ(၁၆၆)ဂၤအိၣ်၀ဲအဂ့ၢ်တၢ်သ့ၣ်ညါဘၣ်န့ၣ်လီၤ.ဒ်န့ၣ်အသိးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တပၤစ့ၢ်ကီး ဘၣ်သံ၀ဲ(၉၃)ဂၤ၀ံၤ ဘၣ်ဒိ၀ဲ(၃၀၂)ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
တကးဘၣ် ကီၢ်သူလ့ၤတၢ်ပၢဟီၣ်က၀ီၤ, သုးက့(၇)ဘ့ၣ်, ကီၢ်ရ့ၣ်(၇)ဘ့ၣ်အပူၤ သုးကီၣ်ကးမၤကမၣ် ပှၤဂ့ၢ်၀ီခွဲးယၥ်တဖၣ်ဒ်အမ့ၢ် ကလံၤကျါတၢ်ဒုး, ခးလီၤကျိဖးဒိၣ်, ဒြိတၢ်ဒုးတဖၣ်ဒီးတၢ်မၤကမၣ်အကလုၥ်ကလုၥ်အပူၤ ကမျၢၢ်ထံဖိကီၢ်ဖိဘၣ်သံ၀ဲ(၁၅၉)ဂၤ,ဘၣ်ဒိ၀ဲ(၈၄)ဂၤပၥ်ဃုၥ်ကမျၢၢ်စုလီၢ်ခီၣ်ခိၣ်တဖၣ်တကးဘၣ်တၢ်သိၣ်လိကၠိတဖၣ်,တၢ်ဘူၣ်တၢ်ဘါတၢ်သူထီၣ်တဖၣ်ဒီးတၢ်ဆါဟံၣ်,တၢ်ဟ့ၣ်ကသံၣ်ဒၢးခဲလၢၥ်ပၥ်ဖှိၣ် ဘၣ်ဟးဂီၤကွံၥ်၀ဲ (၆၅၀)ဘျဲၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ကီၢ်သူလ့ၤတၢ်ပၢဟီၣ်က၀ီၤ,သုးက့(၇)ဘ့ၣ်,ကီၢ်ရ့ၣ်(၇)ဘ့ၣ်အပူၤ တၢ်ဒုးတဖၣ်ကဲထီၣ်ဒံးအဖၢမုၢ်လီၤဒီး တၢ်ထီၣ်ဒုးသုးကီၣ်ကးသုးကလၢၤတၢ်ဒုးတဖၣ်စ့ၢ်ကီးအိၣ်ထီၣ်၀ဲ အဖၢမုၢ်ဒံးန့ၣ်လီၤ.
၂၀၂၄နံၣ်,လါယူၤ(၂၀)သီအနံၤန့ၣ်ခ့ၣ်အဲၣ်ယူၣ်-လီၢ်ခၢၣ်သးတၢ်ကစီၣ်ပၥ်ဖျါဃၥ်၀ဲလၢ စးထီၣ်လၢ ၂၀၂၁နံၣ်,လါဖ့ၤဘြူၤအါရံၤ(၁)သီ,သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ကီၢ်သူလ့ၤတၢ်ပၢဟီၣ်က၀ီၤတဖၣ်အပူၤ ကညီထံလီၢ်ကီၢ်ပူၤပှၤဘၣ်ကီဘၣ်ခဲဖိအိၣ်ထီၣ်တုၤ(၁)ကကွဲၢ်ဘျဲၣ်အဂ့ၢ်န့ၣ်လီၤ.
စရီတၢ်နီၣ်ဂံၢ်နီၣ်ဒွးတၢ်ဂ့ၢ်တၢ်ကျိၤလၢ တၢ်ပၥ်ဖျါတ့ၢ်လၢထးတဖၣ်အံၤ မ့ၢ်ဒၣ် R2K ဟံးန့ၢ်ထၢဖှိၣ်အီၤလၢ မံၣ်ဒံၣ်ယၣ်တဖၣ် အတၢ်ပၥ်ဖျါထီၣ်အဖၣ်အအိၣ်၀ံၤ ဟီၣ်ခိၣ်မဲၥ်ဖံးခိၣ်တခီ အါန့ၢ်ဒံးတၢ်ပၥ်ဖျါတဖၣ်အဂ့ၢ်န့ၣ်လီၤ.
