လါယနူၤအါရံၤ(၆)သီ,၂၀၂၅နံၣ်
အ့ၣ်ယၣ်၀တံၣ်ကီၫ်ခီ,ပသံၣ်ကီၫ်ဆၣ်ပူၤ,သုးကီၣ်ကးအပီၣ်လဲၣ်နံၤ သုးကလၢၤလၢအိၣ်ဘူးဒီးရၢၫ်ခၢၣ်ရိမးတဖၣ် ရၢၫ်ခၢၣ်သုးမုၫ်ဒိၣ်(AA)ဒီးသိၣ်မှံၤသုးတဖၣ် ထီၣ်ဒုး၀ဲအဂ့ၫ် တၫ်သ့ၣ်ညါဘၣ်လၢ လီၫ်က၀ီၤဖိတဖၣ်ဒီး ဂ့ၫ်ခီၣ်ထံးသုးဂ့ၫ်၀ီတၫ်ကစီၣ်တဖၣ်အိၣ်န့ၣ်လီၤ.
ပသံၣ်ကီၫ်ဆၣ်,ရွှ့ၣ်သီၣ်ယၣ်၀့ၫ်ကပၤ, ခၠီ၀းကၠဲၣ်,ပီးလးကၠဲၣ်,မကၠံစ့ၣ် ပီၣ်လဲၣ်နံၤသ၀ီလၢအိၣ်ဘူးဒီးရၢၫ်ခၢၣ်ရိမးတဖၣ် ဖဲလါယနူၤအါရံၤ(၂)သီအနံၤန့ၣ် AAဒီးသိၣ်မှံၤသုးပာ်ဖှိၣ်တဖၣ် ထီၣ်ဒုး၀ဲအဃိ သုးကီၣ်ကးအသုးဖိတဖၣ် ပာ်တ့ၫ်သုး ကလၢၤဃ့ၫ်ဖျိးကွံာ်၀ဲလီၤ.
“တၫ်ဒုးကဲထီၣ်ဒီးသုးကီၣ်ကးအပီၣ်လဲၣ်နံၤသုးတဖၣ်ဒီးတၫ်ဒုးန့ၣ်ဆူၣ်၀ဲလီၤ.ထံၣ်ဘၣ်လၢသုးကီၣ်ကးအသုးဖိတဖၣ် ပာ်တ့ၫ်သုးကလၢၤဃ့ၫ်ဖျိးကွံာ်အိၣ်၀ဲလီၤ.တၫ်သ့ၣ်ညါဘၣ်လၢAAထီၣ်ဒုး၀ဲအဂ့ၫ်” သုးဂ့ၫ်၀ီဂ့ၫ်ခီၣ်ထံးတၫ်ကစီၣ်တဂၤတဲ ၀ဲလီၤ.
သုးကီၣ်ကးန့ၣ် ဖဲလါယနူၤအါရံၤ(၃)သီဒီး(၄)သီအနံၤန့ၣ် လဲၤတ့ၫ်လီၤမ့ၣ်ပိၫ်လၢကဘီယူၤ ဖဲခၠီ၀းကၠဲၣ်သ၀ီ၀ံၤ သုးကီၣ်ကးအသုးဖိလၢဃ့ၫ်ဖျိးတဖၣ် တၫ်ဃုလူၤဖီၣ်၀ဲန့ၣ်လီၤ.
လီၫ်က၀ီၤဖိတဂၤတဲ၀ဲလၢ”ခံခီခံကပၤတၫ်ဒုးဆူၣ်၀ဲလီၤ.အိၣ်လၢသ၀ီတဘူၣ်လၢၤဘၣ်.ဘၣ်လဲၤအိၣ်လၢသ၀ီအဂၤလီၤ.ဟဲခးလီၤစ့ၫ်ကီးတၫ်လၢကဘီယူၤလီၤ.တဆၢလၢမုၫ်တနံၤကကဲထီၣ်ဒ်သိးအံၤဘၣ်အဂ့ၫ်”တဲ၀ဲလီၤ.
AAဒီးသိၣ်မှံၤတဖၣ် အတၫ်ထီၣ်ဒုးအဃိ သုးကီၣ်ကးထုးကွံာ်အသုးကလၢၤလၢအိၣ်ဖဲမကၠံစ့ၣ်သ၀ီ၀ံၤ က့ၤဆီလီၤကဒါက့ၤ၀ဲ ဖဲသၣ်ပီကီၫ်ဆၣ်,သဲဖၠူၣ်သ၀ီအဂ့ၫ် တၫ်သ့ၣ်ညါဘၣ်လၢ ဂ့ၫ်ခီၣ်ထံးတၫ်ကစီၣ်အိၣ်န့ၣ်လီၤ.
ဒ်န့ၣ်အသိး,လၢရၢၫ်ခၢၣ်ကီၫ်စဲၣ်,ကွးကီၫ်ဆၣ်ဒီးအ့ၣ်ယၣ်၀တံၣ်ကီၫ်ခီ, ၀့ၫ်ငးသဲခၠီကျဲမုၫ်ဖီခိၣ် ဖဲသုးကီၣ်ကး မ့းသလ့ၣ်သုးကလၢၤစ့ၫ်ကီး သုးကီၣ်ကးဒီးAAသိၣ်မှံၤသုးပာ်ဖှိၣ်တဖၣ်အဘၢၣ်စၢၤ တၫ်ဒုးကဲထီၣ်၀ဲန့ၣ်လီၤ.
Ref: DVB
