လါယနူၤအါရံၤ(၆)သီ,၂၀၂၄နံၣ်
၂၀၂၅နံၣ် လါယနူၤအါရံၤ(၃)သီအနံၤန့ၣ်, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးပၥ်ဖှိၣ်တဖၣ် ထီၣ်ဒုးမၤန့ၢ် သုးကီၣ်ကးမုၢ်သဲသုးကလၢၤလၢ အိၣ်ဆီလီၤဃၥ်သးဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၃), ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤပူၤအဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
တၢ်ထီၣ်ဒုးမၤန့ၢ် သုးကီၣ်ကးမုၢ်သဲသုးကလၢၤလၢသုးအဂံၢ်အဘါအိၣ် တၢ်တယၣ်အဖီခိၣ်(၅၀)ဂၤအပူၤ တၢ်တထံၣ်န့ၢ်၀ဲသုးကီၣ်ကးအပှၤသုးဖိတၢ်သံတၢ်ပှၢ်ဒီးတၢ်ဘၣ်ဒိဘၣ်ထံးဘၣ်အဂ့ၢ် စံး၀ဲန့ၣ်လီၤ.
“ခီဖျိလၢဒူၣ်ဒါတပၤန့ၣ် ဒ်လဲၣ် တချူးလၢပတထီၣ်ဒံးအခါန့ၣ် ပှၤလဲၤမၤပၥ်အီၤလၢဒြိဆိအဃိ၀ံၤ ဒီးခံမံၤတမံၤန့ၣ် အ၀ဲတၢ်ကစီၣ်န့ၣ် ဟူထီၣ်သါလီၤအါအဃိန့ၣ် အ၀ဲသ့ၣ်ထုးကပၤသးသ့န့ၣ်မီၢ်. “
(KNLA)သုးပၥ်ဖှိၣ်တကပၤတခီ ဘၣ်သံ၀ဲ(၃)ဂၤဒီး တၢ်ဘၣ်ဒိဘၣ်ထံးတခီတအိၣ်၀ဲဘၣ်အဂ့ၢ် အ၀ဲစံးအါထီၣ်၀ဲန့ၣ်လီၤ.
တၢ်ထီၣ်ဒုးသုးကီၣ်ကးမုၢ်သဲသုးကလၢၤအဆၢကတီၢ် သုးကီၣ်ကးတပၤ ဟဲခးလီၤစၢၤတၢ်လၢကဘီယူၤအိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးမုၢ်သဲသုးကလၢၤအံၤ မ့ၢ်သုးတၢ်တိၥ်ကူၣ်ကျဲၤခိၣ်သ့ၣ်ကျဲအသိး သုးမိၤစိရိၤအသုးတဖၣ် စးထီၣ်ဟဲသူၣ်ထီၣ်အီၤဖဲ ၁၉၇၅နံၣ်, တဲၥ်လွံၢ်တဲၥ်ဒုးယၤရဲၣ်ကျဲၤအဆၢကတီၢ်လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၃), ကီၢ်ရ့ၣ်ချၢၣ်လွံၢ်ထူၣ်, လၢၢ်ဒိၣ်ကီၢ်ဆၣ်ဒီးမူကီၢ်ဆၣ်ဟီၣ်က၀ီၤအဆၢန့ၣ်လီၤ.
တၢ်ဆဲးလီၤ ကီၢ်ပယီၤဒီတဘ့ၣ်တၢ်ပတုၥ်တၢ်ခးလံၥ်ဃံးဃၥ်(NCA)အဆၢကတီၢ် ပယီၤသုးမီၤစိရိၤမၤသကိးတၢ်ဒီးကီၢ်အ့ဒံယါ၀ံၤ တဲ၀ဲလၢတၢ်ဂုၢ်ထီၣ်ပသီထီၣ်အဂီၢ်၀ံၤ တ့ထီၣ်၀ဲကျဲလၢစးထီၣ်ဖဲ၀့ၢ်လၢၢ်ဒိၣ်ဒီးတုၤမုၢ်သဲန့ၣ်လီၤ.
ဖဲလၢ ၁၉၇၀နံၣ်, တဲၥ်လွံၢ်တဲၥ်ဒုးယၤရဲၣ်ကျဲၤအဆၢကတီၢ် သုးမီၤစိရိၤအသုးတဖၣ် ဟးနီဖှိၣ်၀ဲကညီကမျၢၢ်လၢအိၣ်ဖဲကစၢၢ်ခိၣ်တဖၣ်ဒီး သူၣ်ထီၣ်န့ၢ်၀ဲ မုၢ်သဲသ၀ီ၀ံၤ ဆီလီၤဃၥ် အသုးကလၢၤလၢမုၢ်သဲသ၀ီအကပၤအသိး မၢန့ၢ်ဆူၣ်ကမျၢၢ်တဖၣ်ဒ်အမ့ၢ် တၢ်နဲၣ်ကျဲအသိးမ့ၢ်ဂ့ၤ, ၀ံၥ်ထီၣ်စိၥ်ထီၣ်တၢ်တဖၣ်မ့ၢ်ဂ့ၤန့ၣ်လီၤ.
