လါယနူၤအါရံၤ(၂)သီ,၂၀၂၄နံၣ်
သုးကီၣ်ကးအကီၢ်ခီပှၤဘၣ်မူဘၣ်ဒါတဖၣ်ကးတံၥ်ကွံၥ်သိလ့ၣ်ပဒၢးတဖၣ် လၢကဟးထီၣ်လၢ၀့ၢ်ပသံၣ်အိၣ်(၄)သီလံအဂ့ၢ် တၢ်သ့ၣ်ညါဘၣ်လၢ ပှၤနီၣ်သိလ့ၣ်ပဒၢးဖိတဖၣ်အအိၣ်န့ၣ်လီၤ.
ပသံၣ် ပှၤနီၣ်သိလ့ၣ်ပဒၢးဖိတဂၤစံး၀ဲလၢ “ တမ့ၢ်လၢကကးတံၥ်ကွံၥ်ကျဲဘၣ်. အနီၢ်နီၢ်န့ၣ် တၢ်တပျဲဟးထီၣ် သိလ့ၣ်ပဒၢးတဖၣ်လၢအိၣ်ဖဲ ၀့ၢ်ပသံၣ်လၢၤဘၣ်လီၤ. အပူၤကွံၥ်န့ၣ် ကိး၀ဲပှၤကညီတန့ၢ်ဘၣ်အဃိ၀ံၤ ကးတံၥ်ကဒီး၀ဲ(၄)သီဒီး ကးတံၥ်၀ဲအဆိကတၢၢ်တဘျီန့ၣ် အိးထီၣ်ကဒါက့ၤလၢ စှၤနၣ်ရံၣ်အတီၢ်ပူၤန့ၣ်လီၤ. အခဲအံၤကကဲထီၣ်သးဒ်လဲၣ်န့ၣ်တသ့ၣ်ညါဘၣ်”အဂ့ၢ် န့ၣ်လီၤ.
တၢ်ကးတံၥ် ၀့ၢ်ပသံၣ်သိလ့ၣ်ပဒၢးတဖၣ် တၢ်ဟးထီၣ်ဖဲ ၂၀၂၄နံၣ်, လါဒံၣ်စဲဘၢၣ်(၂၂)သီနံၤတဘျီ ဒီး ကးတံၥ်ကဒီးအသီတဘျီ ဖဲလၢလါဒံၣ်စဲဘၢၣ်(၂၉)သီအနံၤန့ၣ်လီၤ.
သိလ့ၣ်ပဒၢးတဖၣ် နုၥ်လီၤလၢ၀့ၢ်ပသံၣ်ပူၤသ့ဘၣ်ဆၣ် ကးတံၥ်၀ဲလီၤလီၤဆီဆီလၢ ကဟးထီၣ်လၢ၀့ၢ်ပသံၣ်အချၢ၀ံၤ မ့မ့ၢ်လၢ သိလ့ၣ်တီၣ်ပှၤလ့ၤလိၤဟးထီၣ်ဖိဒီး သိလ့ၣ်ဒိးဟံၣ်တဖၣ်တခီ တၢ်ပျဲလ့ၤလိၤဟးထီၣ်၀ဲအဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.
“အကးတံၥ်ကျဲ အသီမ့ၢ်ယံၤထီၣ်န့ၣ် တၢ်ဖိတၢ်လံၤကကၤထီၣ်လီၤ. ကသံၣ်ကသီတဖၣ်ဒီး တၢ်အီၣ်တၢ်အီတၢ်ဖိတၢ်လံၤတဖၣ် ကၤထီၣ်သ့လီၤ. အခဲအံၤကကဲထီၣ်သးဒ်လဲၣ် တသ့ၣ်ညါဘၣ်အဂ့ၢ်” ၀့ၢ်ပသံၣ် ပှၤဆါတၢ်ဖိတဂၤစံး၀ဲန့ၣ်လီၤ.
ရၢၢ်ခၢၣ်သုးမုၢ်ဒိၣ်(AA) စးထီၣ်မၤန့ၢ်ကွး၀့ၢ်၀ံၤအလီၢ်ခံန့ၣ် သုးကီၣ်ကးအသုး ဖီၣ်၀ဲရၢၢ်ခၢၣ်ကမျၢၢ်ပှၤစံၣ်သုးဖိတဖၣ်အသိး မၤအါထီၣ်တၢ်သမံသမိးတဖၣ်လၢ အ့ၣ်ယၣ်၀တံၣ်ကီၢ်ခီ, ကီၢ်ဆၣ်တဖၣ်အပူၤန့ၣ်လီၤ. ငသဲခၠီကီၢ်ဆၣ်လၢ အစဲဘူးလိၥ်သးဒီးရၢၢ်ခၢၣ်ကီၢ်စဲၣ်အပူၤ သုးကီၣ်ကးကတီၤဃၥ်၀ဲ တၢ်ခီၣ်ဆၢဒုးတၢ်အဂီၢ်အသိး သူၣ်ထီၣ်ဘှီထီၣ်၀ဲ ကဘီယူၤပျီတဖၣ်န့ၣ်လီၤ.
ကွးကီၢ်ဆၣ်တၢ်ဒုးအပူၤ သုးကီၣ်ကးအပှၤသုးဖိဘၣ်ဒိဘၣ်ထံးတဖၣ် တၢ်ကဆှၢအီၤအဂီၢ် ကိးန့ၢ်ဆူၣ်၀ဲကီၢ်ခီအပူၤသိလ့ၣ်ပဒၢးတဖၣ်၀ံၤ ဆှၢအပှၤသုးဖိတၢ်ဘၣ်ဒိဘၣ်ထံးတဖၣ်လၢ သၣ်ပီကၠဲးသိၣ်ကွ့ကျဲတကပၤအဂ့ၢ် တၢ်သ့ၣ်ဘၣ်လၢ လီၢ်က၀ီၤဖိတဖၣ်အအိၣ်န့ၣ်လီၤ.
Ref: DVB
