လါယနူၤအါရံၤ(၂)သီ,၂၀၂၅နံၣ်
ဖဲလါယနူၤအါရံၤ(၁)သီနံၤန့ၣ် တၫ်မၤစၢၤထံရူၫ်ကီၫ်သဲးပှၤလီၤဃိၣ်ဖိကရၢ (AAPP) ဘိးဘၣ်ရၤလီၤဃ့ထီၣ်၀ဲ လၢ ထံကီၫ်ပှၤကူၣ်လိာ်တၢၣ်ပီၣ်တၫ် ဒီၣ်အီၣ်ဆါစူးကၠံၣ်ဒီး ကီၫ်ခိၣ်အူ၀့မၠံး လၢဘၣ်တၫ်ဖီၣ်ဃာ်အီၤပာ်ဃုာ် ထံရူၫ်ကီၫ်သဲးပှၤလီၤဃိၣ်ဖိခဲလၢာ် တၫ်ကပျၫ်ကွံာ်လၢအဆိအချ့အဂီၫ် ထံဂုၤကီၫ်ဂၤတကပၤ ကဟ့ၣ်တၫ်ဆီၣ်သနံးသုးကီၣ်ကး တုၤလီၤတီၤလီၤအဂီၫ်န့ၣ်လီၤ.
ဟ့ၣ်ဃာ်၀ဲအမံၤလၢ ထးတၢၣ်အလီၫ်ခံ,သးသမူတဖၣ်ဒီးလၢတၫ်ဘိးဘၣ်ရၤလီၤပူၤ ၂၀၂၄နံၣ်အတီၫ်ပူၤ လၢကီၫ်ပယီၤဒီတဘ့ၣ် ပှၤလၢသုးကီၣ်ကးဖီၣ်မၤသံအိၣ်၀ဲ(၁၇၉၁)ဂၤအဂ့ၫ်,ပှၤဘၣ်သံဖဲပၢၤကီၫ်၀ဲၤဒၢးအိၣ်(၁၂)ဂၤ၀ံၤ လၢသုးတၫ်သမံသမိးအပူၤဘၣ်သံ(၁၅)ဂၤဒီးသံလၢဃိၣ်ပူၤအိၣ်၀ဲ (၃၁)အဂ့ၫ် တၫ်ဘိးဘၣ်ရၤလီၤအပူၤ ပာ်ဖျါ၀ဲလီၤ.
ထံရူၫ်ကီၫ်သဲး ပှၤလီၤဃိၣ်ဖိတဖၣ်န့ၣ် တၫ်ဖီၣ်ဒုးဃာ်အီၤလၢ ပၢၤကီၫ်၀ဲၤဒၢး ,သုးတၫ်သမံသမိးသုးကလၢၤ ဒီးလၢဃိၣ်ပူၤတဖၣ်၀ံၤ တၫ်မၤဆူးမၤဆါအနီၫ်ခိနီၫ်သးလၢကျဲအကလုာ်ကလုာ်အဂ့ၫ် တဲ၀ဲလီၤ.
ထံဂုၤကီၫ်ဂၤတကပၤ သုးကီၣ်ကးတဖုလၢမၤအၢမၤသီတၫ်အံၤ ကကဲထီၣ်ဖိးသဲစးအဂီၫ် သုတဟ့ၣ်၀ဲတဂ့ၤအဂီၫ် ဒီးအ၀ဲသ့ၣ်အတၫ်မၤကမၣ် ထံဂုၤကီၫ်ဂၤကွီၫ်မ့ၣ်တဖၣ်အဂီၫ် တၫ်ဟံးန့ၫ်မူဒါ,တူၫ်မူတူၫ်ဒါကအိၣ်အဂီၫ် တၫ်ကပာ်ဖှိၣ် ဂဲၤလိာ်သကိးဘၣ်အဂီၫ် AAPPတဲဆီၣ်တခူထီၣ်ဃာ်၀ဲလီၤ.
