လါယနူၤအါရံၤ(၁)သီ,၂၀၂၄နံၣ်
တၫ်ဒုးအဃိ လၢတၫ်ဆၢကတီၫ်ယံာ်အပူၤ ကညီကီၫ်စဲၣ် ကီးတရံး-ရၤမတံ(အ့ရှၢၣ်ကျဲ)လၢတၫ်ကးတံာ်ဃာ်အံၤ တၫ်မ့ၫ်အိးထီၣ်ကဒါက့ၤမးဒီး တၫ်ကူၣ်လဲၫ်မၤကၤ ကဘၣ်လိာ်ဖိးဒ့အဃိ ပှၤကူၣ်လဲၫ်မၤကၤတၫ်ဖိတဖၣ် မုၫ်လၫ်၀ဲလၢ တၫ်ကက့ၤအိးထီၣ်ကဒါက့ၤကျဲလၢအဆိအချ့အဂီၫ်န့ၣ်လီၤ.
တၫ်ကလဲၤဆူ ကၠီၣ်တဲၣ်-ကညီကီၫ်ဆၢ ၀့ၫ်ရၤမတံန့ၣ် တၫ်ဘၣ်လဲၤတရံး၀ဲဆူ ထိၣ်ကီးကိကျဲ,ဆီဒံၣ်ကစၢၫ်ကျဲ, ၁၀၁၈ကျဲတဖၣ် တဆီဒီးခီဂာ်တီနီၣ်ကစၫ်၀ံၤ တၫ်ဘၣ်ဆှၢ၀ဲပှၤလဲၤထီၣ်က့ၤလီၤတဖၣ်ဒီးပနံာ်တဖၣ်န့ၣ်လီၤ.
မူခိၣ်စူၤခါအကတီၫ် ပှၤကူၣ်လဲၫ်မၤကၤတၫ်ဖိတဖၣ် ကွၫ်ဆၢၣ်မဲာ်ဘၣ် ကျဲတၫ်ဆဲးကျိးတၫ်ကီတၫ်ခဲတဖၣ် န့ၣ်လီၤ.မ့ၫ်လၢကျဲတၫ်ဆဲးကျိးကီခဲအဃိ တၫ်ကသူကဒါက့ၤ ကီးတရံး-ရၤမတံ(ကျဲလီၫ်လံၤ)အဂီၫ် တၫ်ဟ့ၣ်တၫ်ပျဲန့ၣ်လီၤ.
ဘၣ်ဆၣ်သနာ်က့ တုၤလၢကတီၫ်အံၤ တၫ်ကးတံာ်ဃာ် အ့ရှၢၣ်ကျဲမုၫ်ဒံးလီၤအဃိ တၫ်ဆှၢထီၣ်ဆှၢလီၤ ပှၤလဲၤထီၣ်က့ၤ လီၤဒီးပနံာ်တဖၣ် အပှ့ၤကလံၤဒိၣ်ဒီးထံၣ်ဘၣ်တၫ်ကီတၫ်ခဲလီၤ.
ပှၤကူၣ်လဲၫ်မၤကၤတၫ်ဖိတဂၤတဲ၀ဲလၢ”အ့ရှၢၣ်ကျဲမုၫ်န့ၣ် ပအဲၣ်ဒိးလၢလဲၤထီၣ်က့ၤလီၤဘၣ် ဘျ့ဘျ့ဆှီဆှီလီၤ. လၢထံ ရူၫ်ကီၫ်သဲးတပၤဒုကအိၣ်၀ဲလီၤ.သိလ့ၣ်ကျဲ,၀ံစိာ်တီဆှၢကျဲတဖၣ် ပအဲၣ်ဒိးလၢကလဲၤသး ဘၣ်ဂ့ၫ်ဘၣ်၀ီလီၤ. ကျဲမ့ၫ် ဂ့ၤန့ၣ် တၫ်ကူၣ်လဲၫ်မၤကၤကဘၣ်လိာ်ဖိးဒ့အဂ့ၫ်”တဲ၀ဲလီၤ.
တၫ်ဒုးအဃိ ကီးတရံး-ရၤမတံ(အ့ရှၢၣ်)ကျဲလၢဘၣ်တၫ်ကးတံာ်ဃာ်၀ဲအံၤ ပှၤလဲၤထီၣ်က့ၤလီၤဒီး သိလ့ၣ်လၢတီၣ်ပနံာ်တဖၣ် ကျဲတၫ်ဆဲးကျိးကီခဲအဃိ တၫ်လဲၤထီၣ်က့ၤလီၤအပှ့ၤကလံၤဒိၣ်ထီၣ်၀ဲန့ၣ်လီၤ.
ဖၣ်အၣ်-ရၤမတံ ပှၤလဲၤထီၣ်က့ၤလီၤ နီၫ်တဂၤ(၁)ကလီၫ်ကၠး,ပနံၣ်(၁)တၣ်န့ၣ် လီၤလၢ ကၠး(၂)ကလီၫ်တုၤ(၉)ကလီၫ် ဒီးအပှ့ၤကလံၤဒိၣ်ထီၣ်၀ဲန့ၣ်လီၤ.တကးဘၣ် ပှၤဖီၣ်စုက၀ဲၤအတြဲၤတဖၣ် အိၣ်အါထီၣ်ဒီးတၫ်ဘၣ်ဟ့ၣ်တြဲၤအလဲအဃိ တၫ်လၢာ်ဘူၣ်လၢာ်စ့ၤအပှ့ၤကလံၤတဖၣ် အါထီၣ်၀ဲလီၤ.
သုးကီၣ်ကးတကပၤ မ့ၫ်ပတုာ်ကွံာ်ဒီးထုးကွံာ် အီၣ်စ့ၣ်ယးဒုးယၤတၫ်ရဲၣ်တၫ်ကျဲၤ၀ံၤ သုးဖိတဖၣ်မ့ၫ်က့ၤဆူအလီၫ်အကျဲဒၣ်၀ဲန့ၣ် မုၫ်လၫ်၀ဲလၢ ထံရူၫ်ကီၫ်သဲးတကပၤ ကမ့ၫ်တၫ်ဘၣ်ဘျူးအဂ့ၫ် KNLAသုးက့နီၫ်ဂံၫ်(၆)အသုးက့ တၫ်ဘံၣ်တၫ်ဘၢခိၣ် သုးခိၣ်ဒိၣ်ဖိစီၤဒးဘီတဲ၀ဲလီၤ.
“လၢထံရူၫ်ကီၫ်သဲးတကပၤ ခိၣ်နၫ်တဖၣ် ကဆၢတဲာ်၀ဲအဂ့ၤကတၢၫ်လီၤအဂ့ၫ် ယမုၫ်လၫ်လီၤ.ဘၣ်ဆၣ်သနာ်က့ ဒ်ယသ့ၣ်ညါအသိး ယတထံၣ်လၢကအိးထီၣ်၀ဲဘၣ်.သုးမီၫ်စိရိၤမ့ၫ်လီၤပှီၫ်ဒု မ့ၫ်အိးထီၣ်ကအိးထီၣ်၀ဲလီၤ.”
ကၠီၣ်တဲၣ်-ကညီကီၫ်ဆၢ တၫ်ကူၣ်လဲၫ်မၤကၤအဂီၫ် အ့ရှၢၣ်ကျဲမုၫ်ဒိၣ်လၢအရ့ဒိၣ်ဒီး တၫ်ကထီၣ်ဒုးမၤန့ၫ် ကဒါက့ၤ ၀့ၫ်ရၤမတံအဂီၫ် သုးကီၣ်ကးန့ၣ် မၤ၀ဲအီၣ်စ့ၣ်ယးဒုးယၤတၫ်ရဲၣ်တၫ်ကျဲၤယံာ်(၄)လါဘၣ်ဆၣ် တမၤနၢၤတၫ်ဘၣ် အမဲာ်ညါ ဘၣ်ဂုၤကဒါက့ၤအခံန့ၣ်လီၤ.ဘၣ်ဆၣ်သနာ်က့ ဖဲအပူၤကွံာ် လါစဲးပထ့ဘၢၣ်(၂)နွံတနွံအပူၤန့ၣ် ဟဲထီၣ်ကဒါက့ၤလၢသုးကျိၤတဖၣ်အဃိ ကိးမုၫ်နံၤဃာ်ဃာ်တၫ်ဒုးကဲထီၣ်၀ဲန့ၣ်လီၤ.
Ref: DVB
