လါယနူၤအါရံၤ(၁)သီ,၂၀၂၄နံၣ်
၂၀၂၄နံၣ်,လါဒံၣ်စဲဘၢၣ်၃၀)သီနံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ,ဒူသထူၣ်ကီၫ်ရ့ၣ်,ယိၤကျါဒီးထံဖးဒိၣ်ထၣ်အဘၢၣ်စၢၤဒီး မုၫ်တြီၤကီၫ်ရ့ၣ်အပူၤ နိၣ်ဖီထံသ၀ီအပူၤ ဖဲတၫ်မၤ၀ဲကညီနံၣ်ထီၣ်သီမူးတၫ်ရဲၣ်တၫ်ကျဲၤ၀ံၤ မၤတၫ်လိၣ်ခိၣ်လိၣ်ကွဲအကတီၫ် သုးကီၣ်ကးဟဲတ့ၫ်လီၤမ့ၣ်ပိၫ်လၢကဘီယူၤအဖီခိၣ်ထီဒါ၀ဲအဂ့ၫ် ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢ လီၫ်ခၢၣ်သးထုးထီၣ်ပာ်ဖျါ၀ဲ ဖဲလါဒံၣ်စ့ဘၢၣ်(၃၁)သီအနံၤန့ၣ်လီၤ.
တၫ်သံတၫ်ပှၫ်ဒီးတၫ်ဘၣ်ဒိဘၣ်ထံးတၫ်ဂ့ၫ်တၫ်ကျိၤတခီ တပာ်ဖျါဒံး၀ဲဘၣ်ဆၣ် နံၣ်ထီၣ်သီလၢကညီကလုာ် ပာ်လုၫ်ပာ်ပှ့ၤ၀ဲအံၤ ပှၤဟဲထီၣ်မၤလၤကပီၤတၫ်ဖိတဖၣ် ကသံကပှၫ်ကဘၣ်ဒိဘၣ်ထံးအဂီၫ် ပညိၣ်မၤ၀ဲဒ်သိးအံၤအဖီခိၣ် ခ့ၣ်အဲၣ်ယူၣ်တကပၤထီဒါ၀ဲန့ၣ်လီၤ.
သုးကီၣ်ကးအခိၣ်န့ၣ် တဲဆီၣ်တခူထီၣ်၀ဲလၢ ကညီကလုာ်တဖၣ် ကကတီၤပၢၤဃာ်တၫ်ဆဲးတၫ်လၤအဂီၫ်ဘၣ်ဆၣ် တၫ်ဒုးတဘျီအံၤ ကဲထီၣ်တၫ်နိးတၫ်ဘျးလၢ တၫ်မုာ်တၫ်ခုၣ်,တၫ်အိၣ်ဂၢၫ်ဆိးကျၢၤဒီးတၫ်ကတီၤပၢၤဃာ် တၫ်ဆဲးတၫ်လၤတဖၣ်အဂီၫ်ဒီးအိၣ်ဒၣ်ကဆီၣ်ဘံၣ်ဆီၣ်ဘၢတၫ်လီၤအဂ့ၫ် KNU တဲ၀ဲန့ၣ်လီၤ.
လၢကတီၫ်အံၤထံကီၫ်ဒီတဘ့ၣ်အပူၤ တၫ်ကီတၫ်ခဲလၢထံဖိကီၫ်ဖိကမျၢၫ် ကွၫ်ဆၢၣ်မဲာ်ဘၣ်န့ၣ် ပှၤလၢမၤကမၣ်တၫ်န့ၣ် မ့ၫ်ဒၣ်သုးကရူၫ်အံၤဒီး သုးခိၣ်နၫ်တဖၣ်တကပၤ ကအၢၣ်လီၤအတၫ်ကမၣ် ဟံးန့ၫ်မူဒါတူၫ်မူတူၫ်ဒါလၢလၢပှဲၤဒီး တၫ်တီတၫ်တြၫ်တဖၣ်ဒီးကဒုးအိၣ်ထီၣ်၀ဲအမိၫ်လံၤမိၫ်ပှၫ်၀ံၤ ကပျိာ်လဲအသးဆူ သုးလၢဒီသဒၢန့ၫ်တၫ်လၢထံဖိကီၫ်ဖိအဂီၫ် ခ့ၣ်အဲၣ်ယူၣ် တဲဆီၣ်တခူထီၣ်ဃာ်၀ဲလီၤ.
၂၇၆၄ နံၣ် တၫ်မၤလၤကပီၤကညီနံၣ်ထီၣ်သီမူးအကတီၫ် သုးကီၣ်ကးပညိၣ်ကမျၢၫ် တ့ၫ်လီၤမ့ၣ်ပိၫ်လၢ ကဘီယူၤန့ၣ် မ့ၫ်ကွီၫ်မ့ၣ်တၫ်မၤကမၣ်လၢကလုာ်စၢၤသွဲၣ်အဖီခိၣ် (Crimes Against Humanity)၀ံၤ သုးကီၣ်ကးအတၫ်ပညိၣ် ခးလီၤကမျၢၫ်န့ၣ် ကဘၣ်ဟံးမူဟံးဒါဒီး လၢတၫ်ဒုးအိၣ်ထီၣ်တၫ်တီတၫ်တြၫ်တၫ်ဖံးတၫ်မၤအပူၤ ကပာ်ဃုာ်၀ံၤ ကဘှီဘၣ် စံၣ်စိၤအၢအဂီၫ် ခ့ၣ်အဲၣ်ယူၣ်တကပၤကွဲမုာ်၀ဲအဂ့ၫ် ခ့ၣ်အဲၣ်ယူၣ်(လီၫ်ခၢၣ်သး)ထုးထီၣ်ပာ်ဖျါ၀ဲလီၤ.
