ရၢၢ်ခၢၣ်တၢ်သဘံၣ်သဘူၣ်တဖၣ်အပူၤ ပှၤလၢဟံၣ်တအိၣ်ဃီတအိၣ် အိၣ်ထီၣ်၀ဲ ဘူးထီၣ်(၅)ကလီၤ(၇)ကလးဘျဲၣ်

လါဒံၣ်စ့ဘၢၣ်(၂၅)သီ,၂၀၂၄နံၣ်

ဘီမုၢ်စၢဖှိၣ်ကရၢဘၣ်ထွဲပှၤဟီၣ်ခိၣ်ဖိတၢ်ဒိသူၣ်ဒိသးဂ့ၢ်၀ီတၢ်ထိၣ်ဃူတၢၣ်ပီၣ်တဲသကိး၀ဲၤဒၢး (UNOCHA)ပၥ်ဖျါဃၥ်၀ဲ တၢ်ကစီၣ်လၢ ရၢၢ်ခၢၣ်ကီၢ်စဲၣ်အပူၤ ခီဖျိတၢ်သဘံၣ်သဘုၣ်တဖၣ်အဘၢၣ်စၢၤ ဖဲအပူၤကွံၥ်လါတဖၣ်အပူၤ တၢ်တယၣ်၀ဲအဖီခိၣ် ပှၤဟံၣ်တအိၣ်ဃီတအိၣ် အိၣ်ထီၣ်ကဒီး၀ဲ(၃)ကလီၤ(၆)ကလးအဃိ ပှၤလၢဘၣ်ပၥ်တ့ၢ်ဟံၣ်ဃီဃ့ၢ်ပူၤဖျဲးသးအနီၣ်ဂံၢ်နီၢ်ဒွး အိၣ်ထီၣ်တုၤဘူးထီၣ်(၅)ကလီၤ(၇)ကလးအဂ့ၢ်န့ၣ်လီၤ.

ဖဲအပူၤကွံၥ် လါနိၣ်၀့ဘၢၣ်, ၂၀၂၃နံၣ်လံၤလံၤန့ၣ် တၢ်သဘံၣ်သဘုၣ်တဖၣ် ကဲထီၣ်ဒံးအဖၢမုၢ် ဖဲရၢၢ်ခၢၣ်ကီၢ်စဲၣ်အပူၤ ကီၢ်ဆၣ်(၁၇)ဘ့ၣ်အကျါ (၁၆)ဘ့ၣ်အပူၤ၀ံၤ ခၠီကီၢ်စဲၣ်ကလံၤထံး ပလဲး၀းကီၢ်ဆၣ်လၢ အိၣ်ဘူးဒီးရၢၢ်ခၢၣ်ကီၢ်စဲၣ်ပူၤစ့ၢ်ကီး ဘၣ်ပၥ်တ့ၢ်ဟံၣ်ဃီဃ့ၢ်ပူၤဖျဲးသးန့ၣ်လီၤ.

UNOCHA ကရၢပၥ်ဖျါဃၥ်၀ဲတၢ်ကစီၣ်လၢ တၢ်ဒုးတဖၣ်ကဲထီၣ်ဒံးအဖၢမုၢ်လၢ ရၢၢ်ခၢၣ်သုးမုၢ်ဒိၣ်(AA)ဒီးသုးကီၣ်ကးအသုးအဘၢၣ်စၢၤ ဖဲရၢၢ်ခၢၣ်ကီၢ်စဲၣ်ကလံၤထံးတပၤအဃိ တၢ်ဘံၣ်တၢ်ဘၢတၢ်အိၣ်သးတဖၣ် ဟဲအၢထီၣ်၀ဲအဂ့ၢ်န့ၣ်လီၤ.

ရၢၢ်ခၢၣ်ကီၢ်စဲၣ်အပူၤ တၢ်ဒုးတဖၣ်ပၥ်ဃုၥ် ထံကီၢ်ဒီတဘ့ၣ်အပူၤ တၢ်သဘံၣ်သဘုၣ်တဖၣ်အဘၢၣ်စၢၤ ကီၢ်ပယီၤမုၢ်နုၥ်ကလံၤစိးတပၤဒီးမုၢ်ထီၣ်ကလံၤထံးတပၤ ပှၤ(၃)ကလီၤတခီဘျဲၣ် ဘၣ်ပၥ်တ့ၢ်ဟံၣ်ဃီဃ့ၢ်ပူၤဖျဲးသး၀ံၤ ဟဲအါထီၣ်(၁)ကလီၤတခီန့ၢ်ဒံး ဖဲအပူၤကွံၥ်တနံၣ်ဘျဲၣ်အဂ့ၢ် ဘီမုၢ်စၢဖှိၣ်ကရၢအ့ၣ်ကၠ့ၣ်စံၣ် နဲၣ်ဖျါဃၥ်၀ဲန့ၣ်လီၤ.

ပှၤဖီၣ်စုက၀ဲၤတၢ်ကရၢကရိတဖၣ်လၢ အပၥ်ဃုၥ်လၢတၢ်သဘံၣ်သဘုၣ်ပူၤတဖၣ် ဒ်သိးကဒီသဒၢန့ၢ်ကမျၢၢ်တဖၣ်အဂီၢ်, ကလူၤပိၥ်မၤထွဲ ဟီၣ်ခိၣ်ဒီဘ့ၣ်ပှၤဟီၣ်ခိၣ်ဖိတၢ်ဒိသူၣ်ဒိသးသဲစးတၢ်ဘျၢတဖၣ်အဂ့ၢ် ဒီး သုးတမၤဘၣ်ဒိ တၢ်ကရၢကရိပှၤမၤတၢ်ဖိလၢ အမၤစၢၤ၀ဲတဖၣ်အဂ့ၢ် UNOCHAဃ့ထီၣ်၀ဲန့ၣ်လီၤ.