လါဒံၣ်စ့ဘၢၣ်(၂၅)သီ, ၂၀၂၄နံၣ်
၂၀၂၄နံၣ်, လါဒ့ၣ်စ့ဘၢၣ်(၁၈)သီအနံၤ, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၣ်ထူၣ်, လၢၢ်ဒိၣ်ကီၢ်ဆၣ်အပူၤ ခီဖျိသုးကီၣ်ကးအဂံၢ်အဘါအိၣ်(၃၀၀)ဘျဲၣ် ဟးနုၥ်လီၤသုးကျိၤဆူ ကၠ့းကွ့းသ၀ီပူၤအဃိ တၢ်ဒုးကဲထီၣ်သးလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) ဒီးသုးကီၣ်ကးအသုးအဘၢၣ်စၢၤအဂ့ၢ် ဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
“သုးကီၣ်ကး အသုးအဂံၢ်အဘါကအိၣ်၀ဲ(၃၀၀)ဘျဲၣ် ဟဲနုၥ်လီၤဆူကၠ့းကွ့သ၀ီပူၤအဆၢကတီၢ် ပခိးခးအီၤအဃိ တၢ်ဒုးကဲထီၣ်၀ဲလီၤ. အ၀ဲသ့ၣ်ဟဲထီၣ်၀ဲအဂံၢ်အဘါအါအသိး စုက၀ဲၤစ့ၢ်ကီး လၢလၢပှဲၤပှဲၤလီၤ. ယထံၣ် အ၀ဲသ့ၣ်သံၣ်(၁၀)ဂၤဘျဲၣ်ညါလီၤ. သနၥ်က့ တသ့ၣ်ညါလီၤတံၢ်ဘၣ်အဂ့ၢ်” ဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
တၢ်ဒုးကဲထီၣ်သး၀ံၤအလီၢ်ခံ လါဒံၣ်စ့ဘၢၣ်(၁၉)သီအနံၤန့ၣ် ကၠ့းကွ့သ၀ီပၥ်ဃုၥ် သ၀ီ(၃)ဖျၢၣ်အပူၤ လီၢ်က၀ီၤကမျၢၢ်(၁)ကထိဘျဲၣ် ဘၣ်ဃ့ၢ်ပူၤဖျဲးသးအဂ့ၢ် တၢ်သ့ၣ်ညါဘၣ်န့ၣ်လီၤ.
လါဒံၣ်စ့ဘၢၣ်(၂၄)သီအနံၤ ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲ တၢ်ကစီၣ်လၢ သုးကီၣ်ကးလဲၤနုၥ်လီၤသုးကျိၤ ဆူကၠ့းကွ့သ၀ီပူၤအဆၢကတီၢ် ဖီၣ်န့ၢ်ဆူၣ်၀ဲ လီၢ်က၀ီၤကမျၢၢ်ပိၥ်ခွါ(၅)ဂၤဒီး ပိၥ်မုၣ်(၃)ဂၤအဂ့ၢ်န့ၣ်လီၤ.
လၢၢ်ဒိၣ်ကီၢ်ဆၣ်အပူၤ သုးကီၣ်ကးခီၣ်သုးရ့ၣ်(ခလရ-၂၆၄)လၢအိၣ်ဆီဃၥ်သး ဖဲ၀့ၢ်ပ့းစလိး ခးလီၤ(၁၂၀-မမ)ကျိဖးဒိၣ်အဃိ လဲၤလီၤတဲၥ်ပိၥ်ဖးထီၣ်၀ဲဒၣ်ဖဲ တီၣ်ခ့သ၀ီပူၤအဃိ တီၣ်ခ့ၣ်သ၀ီဖိပိၥ်ခွါလၢ သးနံၣ်အိၣ်(၄၀)ဘျဲၣ်တဂၤ ဘၣ်ဒိ၀ဲအဂ့ၢ် စံး၀ဲန့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤဘူးထီၣ်(၄)နံၣ်အတီၢ်ပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤ, သုးက့(၇)ဘ့ၣ်, ကီၢ်ရ့ၣ်(၇)ဘ့ၣ်အပူၤ ထံလီၢ်ကီၢ်ပူၤပှၤဘၣ်ကီဘၣ်ခဲဖိအိၣ်ထီၣ်တုၤ (၁)ကကွဲၢ်ဘျဲၣ်(၁,၀၅၂,၇၂၉)ဂၤ၀ံၤ လိၣ်ဘၣ်စ့ၢ်ကီး ပှၤဟီၣ်ခိၣ်ဖိတၢ်ဒိသူၣ်ဒိသးတဖၣ်အဂ့ၢ်န့ၣ် ကညီဆီၣ်ထွဲတၢ်မုၥ်တၢ်ခုၣ်ကရူၢ် (KPSN) ဘိးဘၣ်ပၥ်ဖျါဃၥ်၀ဲဖဲ လါနိၣ်၀့ဘၢၣ်(၂၈)သီအနံၤန့ၣ်လီၤ
