လါဒံၣ်စ့ဘၢၣ်(၂၄)သီ,၂၀၂၄နံၣ်
သုးကီၣ်ကးဖီၣ်န့ၢ်ဆူၣ် သ့ၣ်ခိသ၀ီဖိခံဆံဘျဲၣ်လၢ အိၣ်ဖဲတနီသရံး-မီတီၣ်ကီၢ်ဆၢတၢ်ကူၤလဲၤမၤကၤကျဲမုၢ်အဖီခိၣ်၀ံၤ ပှၤသ၀ီဖိအဂၤလၢအိၣ်တ့ၢ်တဖၣ်စ့ၢ်ကီး တပျဲဟးထီၣ်ဆူသ၀ီချၢဘၣ်အဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိဒီးတၢ်ပၢၢ်ဆၢသုးတဖၣ်အအိၣ်န့ၣ်လီၤ.
စးထီၣ်လၢလါဒံၣ်စ့ဘၢၣ်(၁၈)သီအနံၤန့ၣ်တၢ်ဒုးတဖၣ်ကဲထီၣ်သးလၢတၢ်ပၢၢ်ဆၢသုးပၥ်ဖှိၣ်တဖၣ်ဒီးသုးကီၣ်ကးအဘၢၣ်စၢၤ ဖဲမီတီၣ်ကျဲမုၢ်အဖီခိၣ်ယ့ၣ်ဖၠူၣ်,ထိၣ်ခၣ်ဒီးသ့ၣ်ခိသ၀ီတဖၣ်ပူၤန့ၣ်လီၤ.
သုးကီၣ်ကးသုးကျိၤလၢ အဂံၢ်အဘါအိၣ်(၃၀၀)ဘျဲၣ်အံၤ ဟဲထီၣ်ဆူမီတီၢ်၀့ၢ်တပၤလၢ ကီၢ်စၢဖှိၣ်ကျဲမုၢ်အဖီခိၣ်လိၤလိၤ၀ံၤ ဖဲအပူၤကွံၥ်လါဒံၣ်စ့ဘၢၣ်(၂၁)သီအနံၤန့ၣ် သုးကီၣ်ကးသုးကျိၤ စးထီၣ်ဟဲနုၥ်လီၤဆူ သ့ၣ်ခိသ၀ီပူၤအဃိ တၢ်ဒုးကဲထီၣ်သးလၢသုးကီၣ်ကးဒီးတၢ်ပၢၢ်ဆၢသုးပၥ်ဖှိၣ်အဘၢၣ်စၢၤအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
ဖဲလါဒံၣ်စ့ဘၢၣ်(၂၂)သီအနံၤန့ၣ် ပှၤသ၀ီဖိ ပိၥ်မုၣ်ဒီးပိၥ်ခွါ(၂၀)ဘျဲၣ်လၢ အိၣ်တ့ၢ်လၢသ၀ီပူၤတဖၣ် သုးကီၣ်ကးဖီၣ်န့ၢ်ဆူၣ်၀ဲအဂ့ၢ်န့ၣ် တၢ်သ့ၣ်ညါဘၣ်လၢ လီၢ်က၀ီၤဖိတဖၣ်အအိၣ်န့ၣ်လီၤ.
“စံး၀ဲလၢပှၤဟ့ၣ်တၢ်ကစီၣ်ဖိအဃိဖီၣ်၀ဲန့ၣ်လီၤ. ပှၤလၢဘၣ်တၢ်ဖီၣ်အီၤအကျါ အါလၢပှၤပိၥ်မုၣ်တဖၣ်လီၤ”အဂ့ၢ် ယ့ၣ်ဖၠူၣ်သ၀ီဖိပိၥ်ခွါတဂၤ စံး၀ဲန့ၣ်လီၤ.
ခံခီခံကပၤတၢ်ဒုးတဖၣ်အဃိ သ့ၣ်ခိသ၀ီဖိပိၥ်ခွါအါတက့ၢ် လဲၤဃ့ၢ်ဟးဆှဲ၀ဲဘၣ်ဆၣ် ပိၥ်မုၣ်တဖၣ်ပၥ်ဃုၥ် လီၢ်က၀ီၤပိၥ်ခွါတနီၤတဟးဆှဲးဘၣ်ဒီး အိၣ်တ့ၢ်လၢသ၀ီပူၤအဂ့ၢ် စံး၀ဲန့ၣ်လီၤ.
သုးကီၣ်ကးစံး၀ဲ သ၀ီဖိလၢအိၣ်တ့ၢ်လၢသ၀ီပူၤတဖၣ် မ့ၢ်ပှၤဟ့ၣ်တၢ်ကစီၣ်ဆူတၢ်ပၢၢ်ဆၢသုးပၥ်ဖှိၣ်အအိၣ်အဂ့ၢ်ဒီးဖီၣ်န့ၢ်ဆူၣ်ဃၥ်၀ဲ၀ံၤ သ၀ီဖိလၢအိၣ်တ့ၢ်တဖၣ်တခီ တၢ်တပျဲဟးထီၣ်ဆူ ဟံၣ်ချၢဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ဖီၣ်န့ၢ်ဆူၣ်၀ဲ ပှၤသ၀ီဖိတဖၣ်တကးဘၣ် မၤဟးဂီၤကွံၥ်ဟံၣ်ဃီတဖၣ်ဒီး ကမျၢၢ်စုလီၢ်ခီၣ်ခိၣ်တၢ်ဖိတၢ်လံၤတဖၣ်အဂ့ၢ် တၢ်သ့ၣ်ညါဘၣ်လၢ သ့ၣ်ခိသ၀ီဖိတဖၣ်အအိၣ်န့ၣ်လီၤ.
ကတီၢ်ခဲအံၤန့ၣ် သုးကီၣ်ကးအပှၤသုးတဖၣ် ဆီလီၤဃၥ်သးဖဲ သ့ၣ်ခိသ၀ီပူၤအသိး ရၤလီၤဃၥ်အသုးဖဲ သ၀ီအဃၢၤ၀း၀းအဂ့ၢ် တၢ်သ့ၣ်ညါဘၣ်န့ၣ်လီၤ.
ခီဖျိတၢ်ဒုးတၢ်အိၣ်သးတဖၣ်အဃိ သ၀ီတဖၣ်ဒ်အမ့ၢ် လၢၢ်တီၣ်ယၣ်, တမိးခၠိ, ရှါအ့တီၣ်, ယ့ၣ်ဖၠူၣ်, ထိခၣ်, ကီးယိ, ခၠီနပီး, သ့ၣ်ခိ, သဲဖၠူၣ် နီၣ်ဂံၢ်(၉)သ၀ီလၢ အိၣ်ဖဲတနီသရံး-မီတီၣ်ကျဲမုၢ်အဖီခိၣ်ဒူသ၀ီဖိတဖၣ် ဘၣ်ဃ့ၢ်ပူၤဖျဲးသးအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: The Tanintharyi Times
