လါဒံၣ်စ့ဘၢၣ်(၂၄)သီ,၂၀၂၄နံၣ်
အ့ၣ်ယၣ်၀တံၣ်ကီၢ်ခီအပူၤသုးကီၣ်ကးကတီၤပၥ်သုးဂ့ၢ်၀ီတၢ်ကတဲၥ်ကတီၤတဖၣ်၀ံၤဆီလီၤအါထီၣ်၀ဲတၢ်ဘံၣ်တၢ်ဘၢတဖၣ်အသိး မၤ၀ဲတၢ်သမံသမိးဖဲ တၢ်သမံသမိးတြဲၤတဖၣ်ဃံးဃံးလီၤအဂ့ၢ် တၢ်သ့ၣ်ညါဘၣ်န့ၣ်လီၤ.
စးထီၣ်လၢ လါဒံၣ်စ့ဘၢၣ်(၂၀)သီအနံၤန့ၣ် သမံသမိး၀ဲ ၀့ၢ်တကူၣ်-ပသံၣ်ကျဲမုၢ်အဖီခိၣ် သိလ့ၣ်တီၣ်တၢ်ဖိတၢ်လံၤတဖၣ်၀ံၤ မၤ၀ဲတၢ်ကးတံၥ်တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးအသုးဆီလီၤအါထီၣ် တၢ်ဘံၣ်တၢ်ဘၢသုးအဂံၢ်အဘါတဖၣ် ဖဲ ကွး-ငသဲခၠီကျဲမုၢ်အဖီခိၣ်၀ံၤ ကးတံၥ်၀ဲ တၢ်တီၣ်တၢ်ဖိတၢ်လံၤဆူ အ့ၣ်ယၣ်၀တံၣ်ကီၢ်ခီအချၢတကးဘၣ် ကီၢ်ခီအပူၤဒၣ်လဲၣ် ကးတံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“ငသဲခၠီတကပၤ တၢ်ကးတံၥ်ကျဲမုၢ်တဖၣ်အိၣ်၀ဲလီၤ. သိလ့ၣ်တီၣ်တၢ်ဖိတၢ်လံၤတဖၣ် မ့ၢ်ဘၣ်ခီလၢတၢ်သမံသမိးတြဲၤတဖၣ်န့ၣ် ဘၣ်မံအိၣ်ခိးအီၤန့ၣ်လီၤ. တဘၣ်တဲလၢ ကီၢ်ခီအချၢတဂ့ၤ. ကီၢ်ခီပူၤဒၣ်လဲၣ် ကးတံၥ်ဃၥ်၀ဲလီၤ. နီၢ်နီၢ်တခီန့ၣ် ဘၣ်ယိၣ်လၢ တၢ်ဖိတၢ်လံၤတဖၣ် ကလဲၤတုၤဆူရၢၢ်ခၢၣ်ကီၢ်စဲၣ်တပၤလီၤ”အဂ့ၢ် ပှၤနီၣ်သိလ့ၣ်တီၣ်တၢ်ဖိတၢ်လံၤလၢ အိၣ်ဖဲအ့ၣ်ယၣ်၀တံၣ်ကီၢ်ခီပူၤတဂၤ စံး၀ဲန့ၣ်လီၤ.
သုးကီၣ်ကး ၀့ၢ်ပသံၣ်အိၣ်ဆီလီၤ မုၢ်နုၥ်ကလံၤထံးကီၢ်ခီသုး၀ဲၤလီၢ်ခိၣ်သ့ၣ်(နတခ)ကီၢ်ခီအခိၣ် စိကၠီၣ်ထဲးစ့ၢ်ကီး စးထီၣ်ကးတံၥ်၀ဲ တၢ်တီၣ်တၢ်ဖိတၢ်လံၤတဖၣ်၀ံၤ တၢ်ပျဲတအိၣ်လၢကဘၣ်တီၣ်တၢ်ဖိတၢ်လံၤတဖၣ်အဃိ တၢ်မၢက့ၤတီၣ်ကဒါက့ၤအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: Ayeyarwaddy Times
