လါဒံၣ်စ့ဘၢၣ်(၂၃)သီ,၂၀၂၄နံၣ်
ခီဖျိသုးကီၣ်ကးဒီးရၢၢ်ခၢၣ်သုးမုၢ်ဒိၣ်(AA) အဘၢၣ်စၢၤတၢ်ဒုးတဖၣ်အဃိ ဖဲအပူၤကွံၥ်(၂)လါအတီၢ်ပူၤန့ၣ် ပှၤရိၣ်ဟ့ၣ်ကၠၣ်ဖိ(၆)လကးဃၣ်ဃၣ်လၢအိၣ်ဖဲ ရၢၢ်ခၢၣ်ကီၢ်စဲၣ်ပူၤတဖၣ် လဲၤဃ့ၢ်ကဒီးဆူကီၢ်ဘ့ကလါဒ့းပူၤအဂ့ၢ် ကီၢ်ဘ့ကလါဒ့း တဲလီၤ၀ဲဖဲ လါဒံၣ်စ့ဘၢၣ်(၂၂)သီအနံၤန့ၣ်လီၤ.
ဆၢတဲၥ်ဃၥ်၀ဲလၢ တၢ်သုတတူၢ်လိၥ်ကဒီး ပှၤရိၣ်ဟ့ၣ်ကၠၣ်ဖိတဖၣ်ဘၣ်ဆၣ် ခီဖျိတၢ်အီၣ်ကဘျံးကဘျၣ်ပၥ်ဃုၥ် ကျဲအကလုၥ်ကလုၥ်အဃိ ဟဲနုၥ်လီၤကဒီး၀ဲအဂ့ၢ် ကီၢ်ဘ့ကလါဒ့းထံဂုၤကီၢ်ဂၤပှၤဟ့ၣ်ကူၣ်တၢ် Md. Touhid Hossain တဲလီၤ၀ဲအဂ့ၢ်န့ၣ် ကီၢ်ဘ့ကလါဒ့း Dhaka Tribune တၢ်ကစီၣ်သန့ပၥ်ဖျါဃၥ်၀ဲန့ၣ်လီၤ.
“ပတၢ်အိၣ်ဆၢထၢၣ်အိၣ်လၢ တၢ်တပျဲနုၥ်လီၤပှၤသီလၢၤဘၣ်န့ၣ်လီၤ. တဟ့ၣ်တၢ်ပျဲအဖိးသဲစးနီတဂၤဘၣ်. ကဘၣ်ပလီၢ်သးအဂၤတခါန့ၣ် ကီၢ်ဆၢပူၤ တၢ်အီၣ်ကဘျံးကဘျၣ်အိၣ်ထီၣ်၀ဲဒိၣ်ဒိၣ်မုၢ်မုၢ်န့ၣ်လီၤ.”အဂ့ၢ် ကီၢ်ဘ့ကလါဒ့း ထံဂုၤကီၢ်ဂၤပှၤဟ့ၣ်ကူၣ်တၢ် တဲ၀ဲအဂ့ၢ် စံး၀ဲန့ၣ်လီၤ.
ပှၤရိၣ်ဟ့ၣ်ကၠၣ်ဖိတဖၣ် ဟဲနုၥ်လီၤ၀ဲန့ၣ် တမ့ၢ်ထဲကျဲတဘိဘၣ်ဒီး ဟဲနုၥ်လီၤ၀ဲလၢ ကျဲအါဘိအပူၤအဃိ တၢ်ကတြီအီၤအဂီၢ် ကီခဲ၀ဲအဂ့ၢ် တဲ၀ဲန့ၣ်လီၤ.
ပှၤထၢတၢ်ကစီၣ်ဖိ သံကွၢ်၀ဲလၢ ဘၣ်ထွဲပှၤရိၣ်ဟ့ၣ်ကၠၣ်ဖိ ကဟဲနုၥ်လီၤသ့တၢ်အိၣ်သးအဖီခိၣ် ကီၢ်ဘ့ကလါဒ့းထံဂုၤကီၢ်ဂၤပှၤဟ့ၣ်ကူၣ်တၢ် တဲလီၤ၀ဲလၢ ဘၣ်ယိၣ်ဘၣ်ဘှီ၀ဲဒိၣ်ဒိၣ်မုၢ်မုၢ်အသိး နၥ်၀ဲလၢပှၤသီတဟဲနုၥ်လီၤကဒီးလၢၤဘၣ် ဘၣ်ဆၣ် တၢ်သုတဟဲနုၥ်လီၤကဒီးအဂီၢ် ကပၥ်ဖှိၣ်မၤသကိးတၢ်ဒီးထံဂုၤကီၢ်ဂၤတဖၣ်အဂ့ၢ်န့ၣ်လီၤ.
ပှၤရိၣ်ဟ့ၣ်ကၠၣ်ဖိလၢဟးထီၣ်လၢကီၢ်ပယီၤပူၤဒီးလဲၤဃ့ၢ်ဆူကီၢ်ဘ့ကလါဒ့ပူၤအိၣ်ထီၣ်၀ဲ(၁.၂)ကကွဲၢ်ဃၣ်ဃၣ်လံန့ၣ်လီၤ.တၢ်ရဲၣ်တၢ်ကျဲၤလၢတၢ်ကဆှၢက့ၤပှၤတဖၣ် တၢ်လဲၤထီၣ်လဲၤထီတအိၣ်ဒံးဘၣ်တကးဘၣ်ခီဖျိရၢၢ်ခၢၣ်သုးမုၢ်ဒိၣ်(AA) ပၢဆှၢကွံၥ် ဘ့ကလါဒ့းကီၢ်ဆၢအဃိ တၢ်အိၣ်သးတဖၣ် ဟဲဘံဘူအါထီၣ်အဂ့ၢ် အ၀ဲစံးကဒီး၀ဲန့ၣ်လီၤ.
ဖဲအပူၤကွံၥ်(၂၀၁၈)နံၣ်လံၤလံၤန့ၣ် ကီၢ်ပယီၤဒီးကီၢ်ဘ့ကလါဒ့းထံကီၢ်ခံဘ့ၣ် ရဲၣ်ကျဲၤ၀ဲလၢ တၢ်ကဆှၢက့ၤ ရိၣ်ဟ့ၣ်ကၠၣ်ပှၤဘၣ်ကီဘၣ်ခဲဖိလၢ လဲၤတုၤအိၣ်ဆူကီၢ်ဘ့ကလါဒ့းတဖၣ်ဘၣ်ဆၣ် တုၤခဲအံၤန့ၣ် ပှၤလၢဟဲက့ၤလၢ အဖိးသဲစးတအိၣ်၀ဲနီတဂၤဒံးဘၣ်န့ၣ်လီၤ.
Ref: RFA
