လါဒံၣ်စ့ဘၢၣ်(၂၃)သီ,၂၀၂၄နံၣ်
အ့ၣ်ယၣ်၀တံကီၢ်ခီပူၤ ခီဖျိတၢ်ထၢဆူၣ်သုးသဲစးတၢ်ဘျၢအဃိ ပှၤလၢအစံၣ်လီၤသုးတၢ်သိၣ်လိ၀ံၤ ပှၤလၢစံၣ်ဖျိးကွံၥ် အိၣ်ထီၣ်၀ဲ(၁၀၀)ဘျဲၣ်လံအဂ့ၢ် တၢ်သ့ၣ်ညါဘၣ်လၢ သုးကီၣ်ကးအသုးပှၤတ၀ၢအအိၣ်န့ၣ်လီၤ.
သုးကီၣ်ကး အတၢ်ထၢဆူၣ်သုးသဲစးတၢ်ဘျၢအဃိ လီၢ်က၀ီၤပှၤသးစၢ်အါအါဂီၢ်ဂီၢ် တၢ်ထၢဆူၣ်အီၤလၢ တၢ်ကလဲၤထီၣ်သုးတၢ်သိၣ်လိအဂီၢ်အသိး အစံၣ်လီၤသုးတၢ်သိၣ်လိ၀ံၤအလီၢ်ခံ ရၢၢ်ခၢၣ်သုးမုၢ်ဒိၣ်(AA)ဒုးအိၣ်ထီၣ် ဒုးယၤရဲၣ်ကျဲၤတဖၣ် ဖဲရၢၢ်ခၢၣ်ကီၢ်စဲၣ်ဒီးအ့ၣ်ယၣ်၀တံၣ်ကီၢ်ခီအဆၢ ကွးကီၢ်ဆၣ်ပူၤအဃိ ပှၤလၢစံၣ်ဖျိးကွံၥ် အိၣ်ထီၣ်၀ဲ(၁၀၀)ဘျဲၣ်လံအဂ့ၢ် တၢ်သ့ၣ်ညါဘၣ်လၢ ပှၤလၢအိၣ်ဘူးဒီးသုးကီၣ်ကးအသုးအအိၣ်န့ၣ်လီၤ.
“အ၀ဲသ့ၣ်တဖၣ်န့ၣ် တန့ၢ်တသ့ဘၣ်အဃိ လဲၤနုၥ်လီၤ၀ဲန့ၣ်လီၤ. အါတက့ၢ်န့ၣ် တၢ်ဒုးမ့ၢ်ကဲထီၣ်သးသပှၢ်ကတၢၢ်န့ၣ် စံၣ်ဖျိးကွံၥ်လီၤ. တလါအံၤ လါဒံၣ်စ့ဘၢၣ်ထဲတလါဧိၤန့ၣ် ပှၤလၢစံၣ်ဖျိးအိၣ်ထီၣ်တုၤ(၅၀)လံအဂ့ၢ်” ပသံၣ်၀့ၢ်ပှၤပိၥ်ခွါတဂၤ စံး၀ဲန့ၣ်လီၤ.
အ့ၣ်ယၣ်၀တံၣ်ကီၢ်ခီပူၤ သုးသီအါတက့ၢ်လၢတၢ်ထၢန့ၢ်အီၤတဖၣ် တၢ်မၢလဲၤထီၣ်သုးတၢ်သိၣ်လိဖဲ ၀့ၢ်ပသံၣ်ဒီးဟီကတး၀့ၢ် သုးတၢ်သိၣ်လိကၠိတဖၣ်၀ံၤအလီၢ်ခံ စံၣ်လီၤသုးတၢ်သိၣ်လိအဆၢကတီၢ် တၢ်ဆှၢအီၤဆူ ရၢၢ်ခၢၣ်ဒီးယိၤဒိၣ်ကီၢ်စဲၣ်ကလံၤစိးတတပၤအဃိ ပှၤစံၣ်ဖျိးအိၣ်ထီၣ်၀ဲအဂ့ၢ်န့ၣ် အ၀ဲပဲၥ်ထံနီၤဖး၀ဲန့ၣ်လီၤ.
ခီဖျိတၢ်ထၢဆူၣ်သုးသဲစးတၢ်ဘျၢအဃိ ဘၣ်တၢ်ထၢဆူၣ်သုးသီ၀ံၤအလီၢ်ခံ ပှၤသုးဖိသီတဖၣ်အံၤ တၢ်ဒုးတၢ်လဲၤခီဖျိတအိၣ်ဘၣ်ဒီး ဘၣ်လဲၤနုၥ်လီၤဒုး၀ဲလၢတၢ်မဲၥ်ညါတၢ်ဒုးတဖၣ်အဃိ တၢ်သံတၢ်ပှၢ်တဖၣ်စ့ၢ်ကီးအိၣ်ထီၣ်၀ဲ အါအါဂီၢ်ဂီၢ်လီၤအဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိတဖၣ်အအိၣ်န့ၣ်လီၤ.
“အခဲအံၤ လၢသ၀ီန့ၣ် တလါတၢ်ကဘၣ်ဟ့ၣ်၀ဲ (၂)ဂၤန့ၣ်လီၤ. တၢ်ဆဲးကျိးအီၤန့ၢ်ဒၣ်ထဲလၢ ဘူးထီၣ်လၢတၢ်ကဘၣ်ထီၣ်သုးတၢ်သိၣ်လိအဆၢကတီၢ် တနွံအတီၢ်ပူၤလီၤ. ဖဲန့ၣ်အလီၢ်ခံန့ၣ် သံဧါ မူဧါန့ၣ် တသ့ၣ်ညါလၢၤဘၣ်. မ့ၢ်သံဒၣ်လဲၣ်န့ၣ် တၢ်တဟဲဟ့ၣ်တၢ်ကစီၣ်ဘၣ်. စးထီၣ်ဟးထီၣ်လၢ ကဘၣ်လဲၤထီၣ်သုးတၢ်သိၣ်လိ၀ံၤလံၤလံၤ တုၤခဲအံၤန့ၣ် တဟဲက့ၤနီတဂၤလၢၤဘၣ်အဂ့ၢ်” ကၣ်ကၠံတီး၀့ၢ် ပိၥ်မုၣ်တဂၤ စံး၀ဲန့ၣ်လီၤ.
အ့ၣ်ယၣ်၀တံၣ်ကီၢ်ခီအပူၤ ခီဖျိသုးကီၣ်ကးတၢ်ထၢဆူၣ်သုးသဲစးတၢ်ဘျၢအဃိ အစံၣ်လီၤသုးတၢ်သိၣ်လိ၀ံၤအလီၢ်ခံ ပှၤလၢတၢ်ဆှၢအီၤဆူ တၢ်မဲၥ်ညါတဖၣ် တၢ်ဖီၣ်န့ၢ်အီၤကျဲတီၤတဖၣ်, တၢ်ထုးအီၤလၢမ့ၣ်ပိၢ်တကးဘၣ် လၢတၢ်ဒုးအပူၤ တၢ်သံတၢ်ပှၢ်တဖၣ်အိၣ်ထီၣ်၀ဲခဲအံၤခဲအံၤလီၤအဂ့ၢ် တၢ်သ့ၣ်ညါဘၣ်လၢ တၢ်ပၢၢ်ဆၢဂံၢ်ဘါကရူၢ်တဖၣ် ဘိးဘၣ်ရၤလီၤ တၢ်ကစီၣ်တဖၣ်အဖီခိၣ်န့ၣ်လီၤ.
Ref: Ayeyarwaddy Times
