လါဒံၣ်စ့ဘၢၣ်(၂၀)သီ,၂၀၂၄နံၣ်
Bangkok Post တၢ်ကစီၣ်ပၥ်ဖျါဃၥ်၀ဲလၢ ၀းသွံၣ်စၢဖှိၣ်သုးမုၢ်ဒိၣ်(UWSA) သုးကလၢၤ(၉)ဖျၢၣ်လၢ ဆီၣ်လီၤဃၥ်သး ဖဲယိၤဒိၣ်ကီၢ်စဲၣ်မုၢ်ထီၣ်, ကၠီၣ်တဲၣ်-ပယီၤကီၢ်ဆၢအကပၤတဖၣ် ကထုးကွံၥ်သးအဂီၢ် တၢၣ်ပီၣ်တဲသကိး၀ဲအဖၢမုၢ်ဒံးလီၤအဂ့ၢ် ကၠီၣ်တဲၣ်သုးမုၢ်ဒိၣ်တဲ၀ဲန့ၣ်လီၤ.
တၢ်ကစီၣ်ပၥ်ဖျါဃၥ်၀ဲစ့ၢ်ကီးလၢ ကၠီၣ်တဲၣ်သုးမုၢ်ဒိၣ်တခီ အိၣ်ကတီၤဆိပၥ်သးလၢ တၢ်ကဘှါရှဲတၢ်သဘံၣ်သဘုၣ်တဖၣ်အဂီၢ်ဒီး တၢ်မ့ၢ်ဘှါရှဲလၢသုးဂ့ၢ်၀ီအကျဲန့ၣ် မ့ၢ်လီၢ်ခံကတၢၢ်တၢ်ဘှါရှဲအကျဲလီၤအဂ့ၢ်န့ၣ်လီၤ.
လၢန့ၣ်အမဲၥ်ညါ တၢ်မၤ၀ဲတၢ်ထံၣ်လိၥ်တၢၣ်ပီၣ်တဲသကိးတဖၣ် တဆီ၀ံၤတဆီဒီး တၢ်ထံၣ်လိၥ်ဘှါရှဲဃုအဆၢလၢ တၢ်မုၥ်တၢ်ခုၣ်အပူၤအဂ့ၢ် စံး၀ဲန့ၣ်လီၤ.
ဖဲအပူၤကွံၥ် လါနိၣ်၀့ဘၢၣ်(၁၈)သီအနံၤ, ကၠီၣ်တဲၣ်သုးမုၢ်ဒိၣ်ဒီး၀းပှၤဘၣ်မူဘၣ်ဒါတဖၣ် ထံၣ်လိၥ်တၢၣ်ပီၣ်တဲသကိးသးဖဲ ၀့ၢ်ကံၢ်မဲအဆၢကတီၢ် ကၠီၣ်တဲၣ်ဃ့ထီၣ်၀ဲလၢ ၀းသုးကလၢၤ(၉)ဖျၢၣ်လၢ ဆီလီၤဃၥ်သးဖဲ ကီၢ်ဆၢအပူၤတဖၣ် ကထုးကွံၥ်သးအဂီၢ်န့ၣ်လီၤ.
လါဒံၣ်စ့ဘၢၣ်(၇)သီအနံၤန့ၣ် UWSAအလံၥ်ဘိးဘၣ်ရၤလီၤအပူၤ ကွဲးဖျါဃၥ်ဒီးတရူးကျိၥ်လၢ ၀းသုးမုၢ်ဒိၣ်န့ၣ် တမ့ၢ်ကၠီၣ်တဲၣ်သုးမုၢ်ဒိၣ် အဒုၣ်ဒါဘၣ်အဂ့ၢ်န့ၣ်လီၤ.
လံၥ်ဘိးဘၣ်ရၤလီၤအပူၤ ကွဲးဖျါဃၥ်၀ဲစ့ၢ်ကီးလၢ ကၠီၣ်တဲၣ်ဒီး၀းသုးမုၢ်ဒိၣ်အဘၢၣ်စၢၤ တၢ်ဒုးကကဲထီၣ်အဂ့ၢ် တၢ်ကွဲးဖျါထီၣ်တဖၣ်န့ၣ် မ့ၢ်ဒၣ်တၢ်ကွဲးဖျါတၢထီၣ်တၢလီၤအဂ့ၢ်ဒီး ၀းသုးမုၢ်ဒိၣ်တခီ ဃု၀ဲတၢ်မုၥ်တၢ်ခုၣ်ထီဘိလီၤဒီး ဒ်သိးတၢ်ဒုးကကဲထီၣ်အဂီၢ် တၢ်ဆီၣ်တခူတဖၣ်အဖီခိၣ် ထီဒါ၀ဲ ဆူၣ်ဆူၣ်ကိၤကိၤအဂ့ၢ် စံး၀ဲန့ၣ်လီၤ.
