လါဒံၣ်စ့ဘၢၣ်(၂၀)သီ,၂၀၂၄နံၣ်
ကီၢ်ကၠီၣ်တဲၣ်, ဆၣ်မိးစၣ်ခိၣ်ကီၢ်ရ့ၣ်, အိနွဲး,အိယဲၣ်ဟီၣ်က၀ီၤ, ထးတၢ်မၤလီၢ်တလီၢ်အပူၤ ကီၢ်ပယီၤပှၤမၤတၢ်လၢ အဃ့ထီၣ် တၢ်ကမၤစှၤလီၤန့ၢ် တၢ်မၤအါထီၣ်ဘံၣ်စၣ်သးသမူအပှ့ၤကလံၤတဖၣ် ကၠီၣ်တဲၣ်ပှၤဘၣ်မူဘၣ်ဒါတဖၣ် တီၢ်၀ဲဒီးဖီၣ်န့ၢ်ဆူၣ်၀ဲအဂ့ၢ်န့ၣ် တၢ်သ့ၣ်ညါဘၣ်လၢ ပှၤဟူးဂဲၤလၢပှၤမၤတၢ်ဖိဂ့ၢ်၀ီတဖၣ်အအိၣ်န့ၣ်လီၤ.
ကီၢ်ပယီၤပှၤမၤတၢ်ဖိသၢကယၤဘျဲၣ်လၢ အမၤတၢ်ဖဲထးတၢ်မၤလီၢ်တဖၣ်အံၤ ဖဲမဟါအနံၤလါဒံၣ်စ့ဘၢၣ်(၁၉)သီအနံၤ, ဂီၤအဆၢကတီၢ်တချူးနုၥ်လီၤဆူတၢ်မၤလီၢ်ပူၤဒံးဘၣ်အဆၢကတီၢ်န့ၣ်ခီဖျိလၢတၢ်မၤအါထီၣ်ဘံၣ်စၣ်သးသမူအပှ့ၤကလံၤဒိၣ်တလၢအဃိ ပၥ်ဖှိၣ်ဃ့ထီၣ်၀ဲလၢ တၢ်ကမၤစှၤလီၤန့ၢ်အီၤအပူၤ ထးတၢ်မၤလီၢ်ပှၤဘၣ်မူဘၣ်ဒါတဖၣ် ကိး၀ဲကၠီၣ်တဲၣ်ပၢၤကီၢ်ဒီးတၢ်ဘံၣ်တၢ်ဘၢတဖၣ်၀ံၤ တီၢ်၀ဲဒီးဖီၣ်န့ၢ်ဆူၣ်၀ဲ ပှၤမၤတၢ်ဖိတဖၣ်န့ၣ်လီၤ.
“တၢ်မၤကစၢ်ကိး၀ဲပၢၤကီၢ်ဒီးပှၤဘၣ်မူဘၣ်ဒါတဖၣ်၀ံၤမၢဖီၣ်၀ဲန့ၣ်လီၤ.တၢ်လၢၥ်ဘူၣ်လၢၥ်စ့အပှ့ၤကလံၤဒိၣ်တလၢအဃိ တၢ်ဃ့ထီၣ်ဒ်အံၤအဖီခိၣ် တီၢ်၀ဲဒီးဖီၣ်န့ၢ်ဆူၣ် ပှၤမၤတၢ်ဖိတဖၣ်န့ၣ် မ့ၢ်တၢ်မၤကမၣ် ပှၤမၤတၢ်ဖိခွဲးယၥ်ဒီး ပှၤဂ့ၢ်၀ီခွဲးယၥ်န့ၣ်လီၤ. တၢ်မၤ၀ဲဒ်အံၤန့ၣ် မ့ၢ်တၢ်မၤဟးဂီၤ ကီၢ်ကၠီတဲၣ်အသူးသ့ၣ်လၤကပီၤလီၤအဂ့ၢ်” AAC ကိၣ်ယဲမ့ စံး၀ဲန့ၣ်လီၤ.
ပှၤမၤတၢ်ဖိခိၣ်နၢ်လၢ အတီခိၣ်ရိၣ်မဲတၢ်ဃ့ထီၣ်အံၤတဖၣ် ကၠီၣ်တဲၣ်ပှၤဘၣ်မူဘၣ်ဒါတဖၣ် တီၢ်၀ဲဒီးဖီၣ်ဃၥ်အီၤ၀ံၤ ကတီၢ်ခဲအံၤန့ၣ် ခံခီခံကပၤ တၢၣ်ပီၣ်တဲသကိး၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်မၤအါထီၣ်ဘံၣ်စၣ်သးသမူ(၂)နံၣ်န့ၣ် တၢ်မၤကစၢ်ဃ့၀ဲ(၁)ကလးဘး၀ံၤ တၢ်အံၤန့ၣ် အပှ့ၤကလံအါန့ၢ်ဒံးအပူၤကွံၥ် (၂)ဘျီအဃိ ပှၤမၤတၢ်ဖိတဖၣ် ဃ့ထီၣ်၀ဲန့ၣ်လီၤ.
ကတီၢ်ခဲအံၤ ကီၢ်ကၠီၣ်တဲၣ်ဒီတဘ့ၣ်, တၢ်မၤလီၢ်တဖၣ်အပူၤ ကီၢ်ပယီၤပှၤမၤတၢ်ဖိတဖၣ် ပၥ်ဖှိၣ်ဃ့ထီၣ်လၢ ဒ်သိးတၢ်ကတၢၣ်ပီၣ်ထိၣ်ဃူတၢ်လၢၥ်ဘူၣ်လၢၥ်စ့အဂီၢ် အါတက့ၢ်န့ၣ် ဘၣ်လီၢ်ဘၣ်စး၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ် လါဒံၣ်စ့ဘၢၣ်(၁၇)သီအနံၤစ့ၢ်ကီး ကီၢ်ပယီၤပှၤမၤတၢ်ဖိ အကထိဘျဲၣ်လၢအမၤတၢ် ဖဲကီၢ်ကၠီၣ်တဲၣ်တၢ်မၤလီၢ်(၃)လီၢ်အပူၤတဖၣ် ဃ့ထီၣ်၀ဲတၢ်ကမၤစှၤလီၤန့ၢ် တၢ်မၤအါထီၣ်ဘံၣ်စၣ်သးသမူတၢ်လၢၥ်ဘူၣ်လၢၥ်စ့အပူၤ တၢၣ်ပီၣ်တဲသကိး၀ဲဘၣ်လီၢ်ဘၣ်စးအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: Ayeyarwaddy Times
