ကၠါဖၠးကဲတဖၣ်အပူၤ ပှၤလၢဘၣ်တၢ်ကူၤလဲၤမၤကၤအီၤတဖၣ် ကထူၣ်ဖျဲးထီၣ်အဂီၢ် ကၠီၣ်တဲၣ်ဘျီၣ်ဒိၣ်ကမံးတံၥ် တၢၣ်ပီၣ်တဲသကိး

လါဒံၣ်စ့ဘၢၣ်(၁၉)သီ,၂၀၂၄နံၣ်

Bangkok Post တၢ်ကစီၣ် ပၥ်ဖျါဃၥ်၀ဲလၢ ကီၢ်ပယီၤအိၣ်လဲတၢ်လံၣ်တၢ်လီကဲ(ကၠါဖၠး)တဖၣ်အပူၤ ထံကီၢ်(၁၄)ဘ့ၣ်အထံဖိကီၢ်ဖိအကယၤဘျဲၣ်လၢ ဘၣ်တၢ်ကူၤလဲၤမၤကၤအီၤတဖၣ် ကထူၣ်ဖျဲးထီၣ်အဂီၢ် ကၠီၣ်တဲၣ်ဘျီၣ်ဒိၣ်ကမံးတံၥ်တဖၣ် စးထီၣ်တၢၣ်ပီၣ်တဲသကိး၀ဲအဂ့ၢ်န့ၣ်လီၤ.

လါဒံၣ်စ့ဘၢၣ်(၁၈)သီအနံၤန့ၣ် ဘျီၣ်ဒိၣ်တၢ်အိၣ်ဖှိၣ်အပူၤ ကၠီၣ်တဲၣ်ထီဒါပၣ်တံၣ်လၢအမ့ၢ်  Fair Party ခၢၣ်စး Kannavee Suebsang တီၣ်ထီၣ်၀ဲတၢ်ဂ့ၢ်အံၤဒီး ဘျီၣ်ဒိၣ်ပှၤပၢၤလီၢ်ဆ့ၣ်နီၤ ကိး၀ဲဂ့ၢ်ဂီၤအူတၢ်အိၣ်ဖှိၣ် ဖဲဟါလီၤခီအဆၢကတီၢ်န့ၣ်လီၤ.

တၢ်အိၣ်ဖှိၣ်အပူၤ ပၥ်ဃုၥ်၀ဲဒ်အမ့ၢ် သဲစးဂ့ၢ်၀ီ, တၢ်တီတၢ်တြၢ်ဒီးပှၤဂ့ၢ်၀ီခွဲးယၥ်ဂ့ၢ်၀ီကမံးတံၥ်, ဒီကလုၥ်တၢ်ဘံၣ်တၢ်ဘၢဒီးကီၢ်ဆၢဂ့ၢ်၀ီကမံးတံၥ်တဖၣ်န့ၣ်လီၤ.

ဘျီၣ်ဒိၣ်တၢ်အိၣ်ဖှိၣ်အပူၤ ဘျီၣ်ဒိၣ်ခၢၣ်စး Mr Kannavee တီၣ်ထီၣ်၀ဲလၢ တၢ်ဂ့ၢ်အံၤန့ၣ် ထံကီၢ်(၁၄)ဘ့ၣ်မီၢ်သီ၀ဲၤဒၢးတဖၣ်ဒီး တမ့ၢ်ပဒိၣ်တၢ်ကရၢကရိတဖၣ် ဆဲးကျိးဃ့တၢ်မၤစၢၤအဂ့ၢ်န့ၣ်လီၤ.

ကီၢ်ကၠီၣ်တဲၣ်အံၤ အိၣ်ဒီးတၢ်မၤကျဲတဖၣ်လၢ တၢ်မၤစၢၤသမံးသမိးန့ၢ် ပှၤလၢဘၣ်တၢ်ကူၤလဲၤမၤကၤအီၤတဖၣ်ဘၣ်ဆၣ် လိၣ်လၢတၢ်ကဘၣ်ဘှါရှဲကွံၥ် တၢ်ကီဂ့ၢ်အခိၣ်သ့ၣ်အဂ့ၢ် ဘျီၣ်ဒိၣ်ခၢၣ်စး Mr Kannavee စံး၀ဲန့ၣ်လီၤ.

Mr Kannavee  စံးကဒီး၀ဲလၢ အပူၤကွံၥ်န့ၣ် တၢ်မၤတဖၣ်အံၤ ဟဲမၤဘၣ်ဒိဒၣ်ထဲကီၢ်ကၠီၣ်တဲၣ်လီၤဘၣ်ဆၣ် ခဲအံၤတခီ ဟီၣ်ခိၣ်ဒီဘ့ၣ်ကွီၢ်မ့ၣ်တၢ်မၤကမၣ်ကဲတဖၣ် သူ၀ဲကီၢ်ကၠီၣ်တဲၣ် ဒ်အ၀ဲသ့ၣ်တၢ်ဖံးတၢ်မၤတဖၣ် ကလဲၤသရံးသးအဂီၢ်န့ၣ်လီၤ.

Bangkok Post တၢ်ကစီၣ် ပၥ်ဖျါဃၥ်၀ဲစ့ၢ်ကီးလၢ ဘၣ်ထွဲဒီးတၢ်အိၣ်ဖှိၣ်တၢ်ဆၢတဲၥ်တဖၣ်တခီ ထုးထီၣ်ပၥ်ဖျါဃၥ်၀ဲတအိၣ်နီတမံၤဒံးဘၣ်.ပှၤတ၀ၢတၢ်ကရၢကရိတဖၣ်လၢအမၤစၢၤပှၤလၢဘၣ်တၢ်ကူၤလဲၤမၤကၤအီၤတဖၣ် ဒိးန့ၢ်ဃၥ်၀ဲတၢ်ဂ့ၢ်တၢ်ကျိၤတဖၣ်လၢ ဘၣ်ထွဲဒီးထံကီၢ်(၁၀)ဘ့ၣ်အပူၤ ပှၤသၢကယၤဘျဲၣ်အံၤ ဘၣ်တၢ်မၤန့ၢ်ဆူၣ်အီၤလၢကီၢ်ပယီၤအိၣ်လဲတၢ်လံၣ်တၢ်လီကဲတဖၣ်ဒီးကွီၢ်မ့ၣ်တၢ်မၤကမၣ်တၢ်ဖံးတၢ်မၤတဖၣ်အပူၤအဂ့ၢ်န့ၣ်လီၤ.

သူမွဲကျိအဘးခီ ၀့ၢ်ရၤမတံအံၤ အိၣ်၀ဲလၢ ကညီသုးခိးကီၢ်ဆၢ(BGF)ဒီး DKBA အတၢ်ပၢဆှၢအဖီလၥ်အသိး အိၣ်စ့ၢ်ကီး၀ဲ ကွီၢ်မ့ၣ်တၢ်မၤကမၣ်တၢ်ဖံးတၢ်မၤအါအါဂီၢ်ဂီၢ်အဂ့ၢ် စံး၀ဲန့ၣ်လီၤ.

တၢ်ကစီၣ်ပၥ်ဖျါဃၥ်၀ဲစ့ၢ်ကီးလၢ ကွီၣ်မ့ၢ်တၢ်မၤကမၣ်တၢ်ဖံးတၢ်မၤတဖၣ်အပူၤ ပၥ်ဃုၥ်၀ဲ တရူးထံဖိကီၢ်ဖိတီခိၣ်ရိၣ်မဲ အိၣ်လဲတၢ်လံၣ်တၢ်လီတၢ်ဖံးတၢ်မၤတဖၣ်တကးဘၣ် ဘၣ်တၢ်ကူၤလဲၤမၤကၤ ပှၤရိၣ်ဟ့ၣ်ကၠၣ်ဖိတဖၣ်ဒီး တၢ်ဆါတၢ်ပှ့ၤကသံၣ်မူၤဘှီးတဖၣ်န့ၣ်လီၤ.

ကီၢ်ကၠီၣ်တဲၣ်တခီပၤ မဲဆီးဒီးဖီးဖရးကီၢ်ရ့ၣ်တဖၣ် ကဲထီၣ်၀ဲ ကျဲကျိၤတဘိလၢ အမၤစၢၤဆီၣ်ထွဲကွီၢ်မ့ၢ်တၢ်မၤကမၣ်တၢ်ဖံးတၢ်မၤတဖၣ် ကလဲၤသရံးသးအဂီၢ်အဂ့ၢ် စံး၀ဲန့ၣ်လီၤ.

Ref: RFA