လါဒံၣ်စ့ဘၢၣ်(၁၇)သီ,၂၀၂၄နံၣ်
၂၀၂၄နံၣ်, လါဒံၣ်စ့ဘၢၣ်(၁၆)သီအနံၤန့ၣ် ရဲၣ်တၣ်တၢ်ကစီၣ် ပၥ်ဖျါ၀ဲလၢ ကီၢ်ကၠီၣ်တဲၣ်တဲ၀ဲလၢ တၢ်ကမၤ၀ဲ ဘၣ်ထွဲဒီးကီၢ်ပယီၤဂ့ၢ်၀ီ တၢ်ထံၣ်လိၥ်တၢၣ်ပီၣ်တဲသကိး(၂)ခါလၢ တနွံညါအံၤအတီၢ်ပူၤအဂ့ၢ်န့ၣ်လီၤ.
တၢ်ကမၤ၀ဲဘၣ်ထွဲကီၢ်ပယီၤဂ့ၢ်၀ီတၢ်ထံၣ်လိၥ်တၢၣ်ပီၣ်တဲသကိးလီၤဆီ(၂)ခါ ဖဲလါဒံၣ်စ့ဘၢၣ်(၁၉)သီအနံၤဒီး(၂၀)သီအနံၤအဂ့ၢ် ကၠီၣ်တဲၣ်ထံဂုၤကီၢ်ဂၤကိတိၥ် မၣ်ရ့းဆ့ၣ်ညၣ်ဖိ(Maris Sangiampongsa) စံး၀ဲန့ၣ်လီၤ.
ဘၣ်ထွဲဒီးတၢ်အိၣ်ဖှိၣ်အံၤအဖီခိၣ် လူးဘီၣ်သ့းဒံၣ်မိၣ်ကရံးတံးပၣ်တံၣ် ပှၤပၢၤလီၢ်ဆ့ၣ်နီၤ အူအီၣ်မိစီၣ် တဲ၀ဲလၢ” တၢ်ဂ့ၢ်ကီလၢ မုၢ်မဆါတနံၤအံၤန့ၣ် အခဲအံၤကၠီၣ်တဲၣ်ကိတိၥ်ခိၣ်ကျၢၢ်ဒီးအပၢ်န့ၣ်လီၤ. အပူၤကွံၥ်ကိတိၥ်ခိၣ်ကျၢၢ်လီၢ်လံၤ သဲးဆ့ၣ်န့ၣ်လီၤ. အ၀ဲသ့ၣ်နီၢ်ကစၢ်ဒၣ်၀ဲန့ၣ် အိၣ်ဃူတခီတၢၤလၢ နအဖပဒိၣ်အဖီခိၣ်န့ၣ်လီၤ. အ၀ဲသ့ၣ်အဘၢၣ်စၢၤတၢ်ဘၣ်ဘျူးစ့ၢ်ကီးအိၣ်၀ဲအဃိမီၤ. တၢတထံၣ်န့ၣ် တၢ်အိၣ်သးတဖၣ်အံၤအဃိမီၤ. ခံထံၣ်တထံၣ်န့ၣ် မ့ၢ်ဘၣ်တဲနီၢ်ကီၢ်လၢ ကီၢ်ကၠီၣ်တဲၣ်တၢ်အိၣ်သးတခီန့ၣ် ပ၀ဲထံကီၢ်တၢ်ကီတၢ်ခဲတဖၣ် လီၤဘၣ်လၢ အ၀ဲသ့ၣ်ထံကီၢ်အဖီခိၣ်အါမးန့ၣ်လီၤ. တၢ်ဆိကမိၣ်လၢ ကဘှါစှၤလီၤကွံၥ်တဖၣ်စ့ၢ်ကီးအိၣ်၀ဲန့ၣ်လီၤ. ဒိးသန့ၤထီၣ်သးလၢ တၢ်အိၣ်သးအံၤအဖီခိၣ်ဒီး လီၤဂၥ်ဒ်သိးအ၀ဲသ့ၣ် နုၥ်လီၤဘှါစှၤလီၤစၢၤအသိး မၤ၀ဲန့ၣ်လီၤ. ဘၣ်ဆၣ်သနၥ်က့န့ၣ် တၢ်လၢအတဂ့ၤန့ၣ် ပှၤတဖၣ်အံၤန့ၣ် အိၣ်ဒီးတၢ်ရ့လိၥ်ဘၣ်ထွဲလၢအဂ့ၤဒီး ကီၢ်ပယီၤသုးမီၤစိရိၤတဖၣ်လီၤ. တၢ်အံၤန့ၣ် လိၣ်လၢကပဘၣ်ပလီၢ်သးတခါအဂ့ၢ် ယအဲၣ်ဒိးစံးဒ်န့ၣ်လီၤ.”
လါဒံၣ်စ့ဘၢၣ်(၁၉)သီအနံၤ, တၢ်တၢၣ်ပီၣ်တဲသကိးအပူၤ သုးကီၣ်ကးအခၢၣ်စး ကဟဲထီၣ်၀ဲ အစှၤကတၢၢ်(၁)ဂၤ၀ံၤ ကတၢၣ်ပီၣ်တဲသကိး၀ဲ ဘၣ်ထွဲဒီးကီၢ်ဆၢတၢ်ဘံၣ်တၢ်ဘၢဒီးကီၢ်ဆၢခီဂၥ် တၢ်မူၤတၢ်ရၤတဖၣ်အဂီၢ်အဂ့ၢ် ပၥ်ဖျါဃၥ်၀ဲန့ၣ်လီၤ.
ဘၣ်ထွဲဒီးကီၢ်ဆၢတၢ်ဘံၣ်တၢ်ဘၢတၢ်အိၣ်သးအဖီခိၣ် အ၀ဲတဲကဒီး၀ဲလၢ”ဘၣ်ထွဲဒီး ကီၢ်ဆၢတၢ်အိၣ်သးတဖၣ်အဖီခိၣ် ကီၢ်ကၠီၣ်တဲၣ်တပၤ ကဘၣ်ပလီၢ်သူၣ်ပလီၢ်သးန့ၣ်လီၤ. ဒ်သိးသုတဘၣ်ဒိအထံကီၢ်အဂီၢ် အ၀ဲသ့ၣ်ကဒီသဒၢ၀ဲအဂ့ၤကတၢၢ်န့ၣ်လီၤ. အ၀ဲသ့ၣ်အထံကီၢ်အဂီၢ် တၢ်ဘၣ်ဘျူးတခါခါကအိၣ်ထီၣ်အဂီၢ် မ့တမ့ၢ် တၢ်ဘၣ်ဒိသုတအိၣ်တဂ့ၤအဂီၢ် အ၀ဲသ့ၣ်ကမၤ၀ဲန့ၣ်လီၤ.”
ထံကီၢ်လၢအအိၣ်ဘူးလိၥ်သးဒီးကီၢ်ပယီၤဒ်အမ့ၢ် တရူး, အ့ဒံယါ, ဘ့ကလါဒ့း, လၣ်အိၣ်ဒီးကၠီၣ်တဲၣ်ထံကီၢ် ခၢၣ်စးတဖၣ်စ့ၢ်ကီး ကဟဲထီၣ်၀ဲဆူ တၢ်အိၣ်ဖှိၣ်အံၤအဂ့ၢ် စံး၀ဲန့ၣ်လီၤ. ထံဂုၤကီၢ်ဂၤကိတိၥ်တဖၣ်အပတီၢ် ကီၢ်ပယီၤဂ့ၢ်၀ီတၢ်အိၣ်ဖှိၣ်န့ၣ် တၢ်ကမၤအီၤ ဖဲလါဒံၣ်စ့ဘၢၣ်(၂၀)သီအနံၤန့ၣ်လီၤ.
ဘၣ်ထွဲဒီးတၢ်အိၣ်ဖှိၣ်အံၤအဖီခိၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ထံဂုၤကီၢ်ဂၤ၀ဲၤကျိၤ ပှၤပၢၤလီၢ်ဆ့ၣ်နီၤ ပဒိၣ်စီၤတီနံစံး၀ဲလၢ” တၢ်ထံၣ်လိၥ်တၢၣ်ပီၣ်တဲသကိးအံၤန့ၣ် တမ့ၢ်ကကဲထီၣ်တၢ်ဆီတလဲလၢ ကီၢ်ပယီၤတၢ်သဘံၣ်သဘုၣ်အဖီခိၣ် လီၤလီၤဆီဆီဘၣ်. ဘၣ်မနုအဃိလဲၣ်န့ၣ် တၢ်မ့ၢ်သ့ၣ်ညါ တၢ်သဘံၣ်သဘုၣ်အဂ့ၢ်ခိၣ်သ့ၣ်တဖၣ် လီၤတံၢ်လီၤဆဲးမး ကသ့ၣ်ညါ၀ဲလၢ ကဘၣ်ဘှါရှဲအီၤဒ်လဲၣ်န့ၣ်လီၤ. အခဲအံၤန့ၣ် တဃုသ့ၣ်ညါ တၢ်ဂ့ၢ်ကီအခိၣ်သ့ၣ်ဘၣ်ဒီး မၤစၢၤဆီၣ်ထွဲ၀ဲ ပှၤလၢတၢ်ဂ့ၢ်ကီအိၣ်တဖၣ်လီၤ. တၢ်အံၤန့ၣ် တမ့ၢ်တၢ်ဘှါရှဲတၢ်ဂ့ၢ်ဘၣ်. တၢ်အံၤန့ၣ် မ့ၢ်ဒၣ်တၢ်မၤကမၣ်တခါလီၤ”အဂ့ၢ်န့ၣ်လီၤ.
တၢ်ကတၢၣ်ပီၣ်တဲသကိး ကီၢ်ပယီၤဂ့ၢ်၀ီတၢ်ဃံးတၢ်စ့ၢ်အဂီၢ် အၣ်စံၣ်ယၣ်ထံဂုၤကီၢ်ဂၤကိတိၥ်တဖၣ် ကထံၣ်လိၥ်တၢၣ်ပီၣ်တဲသကိး၀ဲဖဲ၀့ၢ်ဘီကီၥ်လၢ တနွံညါအံၤအတီၢ်ပူၤအဂ့ၢ် အ့ၣ်ဒိၣ်နံရှါထံဂုၤကီၢ်ဂၤ၀ဲၤကျိၤ ပှၤကတိၤတၢ်ပၢ Roy Soemirat တဲလီၤဃၥ်၀ဲဖဲ လါဒံၣ်စ့ဘၢၣ်(၁၃)သီအနံၤန့ၣ်လီၤ.
သုးကီၣ်ကးအစုတီၤဖီလၥ် မံၣ်ဒံၣ်ယၣ်တဖၣ်အပူၤတခီ ပၥ်ဖျါဃၥ်၀ဲလၢ ထံဂုၤကီၢ်ဂၤကိတိၥ်၀ဲၤကျိၤ ကီၢ်စၢဖှိၣ်ကိတိၥ် အူသါဆွ့ၣ် ကလဲၤထီၣ်၀ဲဆူ ကီၢ်ပယီၤဂ့ၢ်၀ီ တၢ်တၢၣ်ပီၣ်တဲသကိး(၂)ခါလၢ တၢ်ကမၤ၀ဲဖဲ လါဒံၣ်စ့ဘၢၣ်(၁၉)သီအနံၤအဂ့ၢ်န့ၣ် သုးကီၣ်ကးပှၤကတိၤတၢ်ပၢ သုးခိၣ်ကျၢၢ်ဂီၢ်ဂ့ၢ် စီၣ်မ့ထိတဲလီၤ၀ဲဖဲ လါဒံၣ်စ့ဘၢၣ်(၁၆)သီအနံၤ, ဟါလီၤခီအဆၢကတီၢ်န့ၣ်လီၤ.
