လါဒံၣ်စ့ဘၢၣ်(၁၈)သီ,၂၀၂၄နံၣ်
၂၀၂၄နံၣ်,လါဒံၣ်စ့ဘၢၣ်(၁၆)သီအနံၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA),ကညီဒီကလုၥ်ဂၢၤသးကရၢ(KNDO),ဒီးတၢ်ပၢၢ်ဆၢသုးပၥ်ဖှိၣ်တဖၣ်ထီၣ်မၤန့ၢ်ကွံၥ် သုးကီၣ်ကးခီၣ်ချ့သုးရ့ၣ်(ခမရ-၉၁၃)နိၣ်ဒ့သုးကလၢၤလၢအိၣ်ဆီၤလီၤသး ဖဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,သုးက့(၇),ကီၢ်ရ့ၣ်ဖၣ်အၣ်,မၤနၢၤပျီဟီၣ်ကဝီၤပူၤအဂ့ၢ်(KNU)ပှၤကတိၤတၢ်ပၢပဒိၣ်စီၤကျၢၤစ့တဲပၥ်ဂၢၢ်ပၥ်ကျၢၤ၀ဲန့ၣ်လီၤ.
“တၢ်ထီၣ်ဒုးမၤန့ၢ် သုးကလၢၤလံ. တၢ်မၤရှဲပျီအဖၢမုၢ်ဒံးန့ၣ်လီၤ. နိၣ်ဒ့သုးကလၢၤလီၤကွံၥ်န့ၣ် လီၤတံၢ်လံ, သနၥ်က့ တၢ်တဲအီၤလီၤတံၢ်လီၤဆဲးတန့ၢ်ဒံးဘၣ်”အဂ့ၢ်န့ၣ်လီၤ.
တၢ်ထီၣ်ဒုးမၤန့ၢ် သုးကီၣ်ကး(ခမရ-၉၁၃)နိၣ်ဒ့သုးကလၢၤအပူၤ တၢ်ဖီၣ်န့ၢ်မူဒံးသုးကီၣ်ကးအပှၤသုး(၅)ဂၤဒီး တၢ်ထံၣ်န့ၢ်စ့ၢ်ကီး တၢ်သံအစိၣ်(၁၀)စိၣ်အဂ့ၢ် Salween Pressတၢ်ကစီၣ် ပၥ်ဖျါဃၥ်၀ဲန့ၣ်လီၤ.
ကတီၢ်ခဲအံၤန့ၣ် တၢ်ထီၣ်ဒုးမၤန့ၢ် သုးကီၣ်ကးသုးကလၢၤလၢအိၣ်တ့ၢ်လီၢ်ခံကတၢၢ်လၢအမ့ၢ် (ခမရ-၉၁၃)နိၣ်ဒ့သုးကလၢၤအဃိ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ က့ၤပၢဆှၢန့ၢ်၀ဲ မၤနၢၤပျီဟီၣ်က၀ီၤဒီတဘ့ၣ်လံအဂ့ၢ် တၢ်သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,သုးက့နီၣ်ဂံၢ်(၇),ကီၢ်ရ့ၣ်ဖၣ်အၣ်,မၤနၢၤပျီဟီၣ်ကဝီၤအပူၤသုးကီၣ်ကးအသုးကလၢၤတဖၣ်ဒ်အမ့ၢ်(ခမရ-၉၁၃),နိၣ်ဒ့,ဖုလီ,ကဆီဝါလ့,ပွဲၣ်၅၆၀,ကၢၢ်ဂီၤစိ,ထံသ့ၣ်ဃံၣ်,ထံထီထၣ်ဃုၥ်ဒီးထူပီၢ်သ့ၣ်တဖၣ်အံၤအိၣ်ဝဲဘၣ်ဆၣ်,အပူၤကွံၥ်လါနိၣ်ဝ့ဘၢၣ်(၁)သီအနံၤအပူၤကဆီဝါလ့ပယီၤသုးကလၢၤအပူၤပယီၤသုးတဖၣ်အံၤ,ဟးထီၣ်ကွံၥ်ဝဲလၢအသုးကလၢၤအပူၤဒီးလဲၤပၥ်ဖှိၣ်က့ၤဝဲအသးဆူ,(၉၁၃)အပူၤဒီးအဂံၢ်ဘါအိၣ်ဝဲလၢ(၁၀၀)ဂၤဃၣ်ဃၣ်အိၣ်ဝဲအလီၢ်ခံ,(ခမရ၉၁၃)အံၤတၢ်ထီၣ်မၤန့ၢ်က့ၤဝဲအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲ၁၉၉၂နံၣ်န့ၣ် သုးမီၤစိရိၤသုးကီၣ်ကးအသုး စးထီၣ်ထီၣ်ဒုး မၤနၢၤပျီဟီၣ်က၀ီၤ ဒီး မၤန့ၢ်၀ဲဖဲ ၁၉၉၅နံၣ် လါယနူၤအါရံၤ၀ံၤအလီၢ်ခံ ယံၤအနံၣ်(၃၀)အဆၢကတီၢ် KNLAတီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ်တဖၣ် က့ၤထီၣ်ဒုးမၤန့ၢ်ကွံၥ်အီၤန့ၣ်လီၤ.
