လၢအယူးဒယး ပှၤကီၫ်ပယီၤဖိ(၁၀၀)ဘျဲၣ်လၢတၫ်ဂီၤတၫ်ဖီၣ်တအိၣ် ဘၣ်တၫ်ဖီၣ်န့ၫ်

လါဒံၣ်စ့ဘၢၣ်(၁၂)သီ,၂၀၂၄နံၣ်

ကီၫ်ကၠီၣ်တဲၣ်,ကီၫ်ရ့ၣ်အယူးဒယး,ကီၫ်ဆၣ်အူးထဲၣ်,တၫ်သူၣ်ထီၣ်ဘှီထီၣ်တၫ်မၤလီၫ်ပူၤ ဖဲကၠီၣ်တဲၣ်ဘၣ်မူဘၣ်ဒါတဖၣ် နုာ်လီၤသမံသမိး၀ဲအကတီၫ်  ဖီၣ်န့ၫ်၀ဲ ပှၤကီၫ်ပယီၤဖိလၢလံာ်တၫ်အုၣ်ကီၤတအိၣ်(၁၀၀)ဂၤအဂ့ၫ် ပှၤလၢမၤစၢၤ ပှၤမၤတၫ်ဖိဂ့ၫ်၀ီတဖၣ် တဲ၀ဲဖဲလါဒံၣ်စ့ဘၢၫ်(၁၁)သီနံၤန့ၣ်လီၤ.

ဖဲလါဒံၣ်စ့ဘၢၣ်(၈)သီနံၤ နုာ်လီၤသမံသမိး၀ဲအကတီၫ် ဘၣ်တၫ်ဖီၣ်န့ၫ်၀ဲ၀ံၤ လၢအကျါ(၃၇)ဂၤတခီ မ့ၫ်ပှၤလီၫ်အိၣ်ကမှံ ဖိတဖၣ်လၢ  ဖဲတယံာ်ဒံးဘၣ် အိၣ်ဟဲခီဂာ်လၢမဲဟီၣ်စီၣ်ပှၫ်ပူၤတဆီအဂ့ၫ် တၫ်မၤစၢၤပှၤကီၫ်ပယီၤဖိဂ့ၫ်၀ီကမံးတံာ် (JACBA)ပှၤပၢၤလီၫ်ဆ့ၣ်နီၤ အူမိကၠိတဲ၀ဲလီၤ.

“ပှၤလၢဘၣ်တၫ်ဖီၣ်န့ၫ်(၁၀၀)ဂၤဘျဲၣ်န့ၣ် ဖဲတၫ်သမံသမိးအကတီၫ် ပှၤဃ့ၫ်သုးပှၤလီၫ်အိၣ်ကမှံဖိလၢဟဲတုၤ ဖဲစှၤသီအ တီၫ်ပူၤပာ်ဃုာ်(၃၇)ဂၤန့ၣ်လီၤ.ပိာ်ခွါ(၂၆),ပိာ်မုၣ်(၁၁)န့ၣ် အိၣ်ဃ့ၫ်သုးလၢကီၫ်ပယီၤ၀ံၤ ဟဲနုာ်လီၤ၀ဲဆူ ကီၫ်ကၠီၣ်ကလံၤ စိး မဲဟီၣ်စီၣ်ပှၫ်ပူၤတဆီန့ၣ်လီၤ.ဘၣ်ဟ့ၣ်၀ဲပှၤလၢရဲၣ်ကျဲၤန့ၫ်အီၤတၫ်မၤ၀ဲအံၤ စ့ယိၤဘး(၁၅,၀၀၀)တုၤ(၂၀,၀၀၀)ဘး ၀ံၤ ဟဲတုၤလၢတၫ်သူၣ်ထီၣ်ဘှီထီၣ်တၫ်မၤလီၫ်န့ၣ်လီၤ.အ၀ဲသ့ၣ်တဲဖျါ၀ဲလၢ မၤတၫ်ဖဲတၫ်သူၣ်ထီၣ်ဘှီထီၣ်တၫ်မၤလီၫ် အပူၤန့ၣ် တနံၤန့ၫ်၀ဲ (၅၀၀)တုၤ(၆၀၀)ဘးအဂ့ၫ်န့ၣ်လီၤ.ပှၤအဂၤတဖၣ်တခီ မ့ၫ်ပှၤကီၫ်ပယီၤဖိလၢ တၫ်အုၣ်ကီၤတအိၣ် ဘၣ်တဖၣ်လီၤ.”

ကီၫ်ရ့ၣ်မဲဟီၣ်စီၣ်န့ၣ် မ့ၫ်လီၫ်က၀ီၤလၢ အိၣ်ဘျးစဲအသးဒီး ကရ့ၣ်နံၣ်ဟီၣ်က၀ီၤလၢတၫ်ဒုးဆူၣ်အံၤန့ၣ်လီၤ.

တယံာ်လၢၤဘၣ်န့ၣ် တၫ်ကမၤန့ၫ် ပှၤမၤတၫ်ဖိ လံာ်အုၣ်ကီၤသီအဃိ ခီကီၫ်ပှၤမၤတၫ်ဖိလၢလံာ်အုၣ်ကီၤ တအိၣ်ဘၣ် တဖၣ် ဖဲလါဒံၣ်စ့ဘၢၣ်အပူၤန့ၣ် တၫ်တဖီၣ်၀ဲဘၣ်အဂ့ၫ် ကၠီၣ်တဲၣ်ပဒိၣ် ဘိးဘၣ်ရၤလီၤ၀ဲဘၣ်ဆၣ် ပှၤလၢအိၣ်လၢ တၫ်မၤလီၫ်ပူၤတဖၣ်တခီ တၫ်မၤတၫ်လၢတဖိးသဲစးအပူၤ တဟ့ၣ်ဃာ်၀ဲတၫ်ပျဲဘၣ်အဃိ ဖီၣ်၀ဲအဂ့ၫ် ပှၤလၢမၤစၢၤ ပှၤမၤတၫ်ဖိတဖၣ်တဲ၀ဲလီၤ.

ပှၤလၢဘၣ်တၫ်ဖီၣ်န့ၫ်တဖၣ် တၫ်ဟံးန့ၫ်အီၤဂ့ၫ်၀ီ ခီဖျိလၢ တၫ်ခီဂာ်ကီၫ်ဆၢလၢတဖိးသဲစးအဖီခိၣ်၀ံၤ ဘၣ်တၫ်က့ၤဆှၢ အီၤဆူကီၫ်ပယီၤသ့အဂ့ၫ် တဲ၀ဲလီၤ.

အပူၤကွံာ် လါစဲးပထ့ဘၢၣ်(၂၄)သီအနံၤစ့ၫ်ကီး ကီၫ်ရ့ၣ်အယူးဒယး,ကီၫ်ဆၣ်အူးထဲၣ်, တၫ်သူၣ်ထီၣ်ဘှီထီၣ် တၫ်မၤလီၫ် တခါအပူၤ ဖဲကၠီၣ်တဲၣ်ဘၣ်မူဘၣ်ဒါတဖၣ် နုာ်လီၤသမံသမိး၀ဲအကတီၫ် ဖီၣ်န့ၫ်၀ဲ ကီၫ်ပယီၤပှၤမၤတၫ်ဖိ(၂၆၄)ဂၤ လၢ တအိၣ်ဒီးတၫ်အုၣ်ကီၤတဖၣ်န့ၣ်လီၤ.

သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ၀ံၤအလီၫ်ခံ တၫ်ဂ့ၫ်ကလုာ်ကလုာ်အဃိ ပှၤကီၫ်ပယီၤဖိဟဲခီနုာ်ဆူကီၫ်ကၠီၣ်တဲၣ်ပူၤ အါထီၣ်အသိး,ပှၤလၢဘၣ်တၫ်ကူၣ်လဲၤမၤကၤအီၤဖၣ်စ့ၫ်ကီးအိၣ်အါထီၣ်၀ဲအဂ့ၫ် ပှၤမၤစၢၤပှၤမၤတၫ်ဖိဂ့ၫ်၀ီတဖၣ် တဲ၀ဲ လီၤ.

အိၣ်လၢကီၫ်ပယီၤတကပၤ၀ံၤ ခီနုာ်လီၤ၀ဲဆူကီၫ်ကၠီၣ်တဲၣ်ပူၤလၢတဖိးသဲစးအဃိ  ၂၀၂၄နံၣ်,လါယနူၤအါရံၤတုၤ လါ အီးကထိဘၢၣ်, လၢအလါ(၁၀)အတီၫ်ပူၤ ပှၤကီၫ်ပယီၤဖိ(၅၄၄၉)ဂၤ ဘၣ်တၫ်ဖီၣ်န့ၫ်၀ဲအဂ့ၫ် တနီသရံၣ်ကီၫ်ခီ တၫ်ဃု သ့ၣ်ညါကရၢတခါလၢအမ့ၫ် FE5 Tanintharyiကရၢထုးထီၣ်ပာ်ဖျါ၀ဲလီၤ.

Ref: RFA