လါဒံၣ်စ့ဘၢၣ်(၁၃)သီ,၂၀၂၄နံၣ်
၂၀၂၄နံၣ်, လါဒံၣ်စ့ဘၢၣ်(၇)သီဒီး(၁၁)သီအနံၤန့ၣ် တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲ သုးကီၣ်ကးဆ့ၣ်စွဲၣ်သုးကလၢၤဒီးကစၢၢ်သၢဖျၢၣ်သုးကလၢၤတဖၣ်လၢ အိၣ်ဆီလီၤအသးဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်မုၢ်တြီၢ်ဟီၣ်က၀ီၤပူၤန့ၣ်လီၤ.
တၢ်ထီၣ်ဒုးမၤန့ၢ် ကစၢၢ်သၢဖျၢၣ်သုးကလၢၤအပူၤ သုးကီၣ်ကးတပၤ သံ၀ဲအါအါဂီၢ်ဂီၢ်၀ံၤ တၢ်မၤန့ၢ်စ့ၢ်ကီး (၁၂၀-မမ)ကျိဖးဒိၣ်တဖၣ်ပၥ်ဃုၥ် ကျိချံပှၥ်သၣ်အါအါဂီၢ်ဂီၢ်အသိး တၢ်ပၢၢ်ဆၢသုးပၥ်ဖှိၣ် အပှၤသုးဖိတနီၤစ့ၢ်ကီး ဘၣ်ဒိ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ကလံၤထံးသုးဟီၣ်က၀ီၤနီၣ်ဂံၢ်(၂) တၢ်ကစီၣ်မူဒါခိၣ် တဂၤ စံး၀ဲလၢ” သုးကလၢၤတဖၣ် ပၥ်ဃုၥ်လၢ သုးကီၣ်ကးသုးတၢ်တိၥ်ကူၣ်ကျဲၤခိၣ်သ့ၣ်အပူၤတၢ်ဆှၢထီၣ်တၢ်အီၣ်တၢ်အီကျဲကျိၤအဃိလ့ၤတက့ၤတဂုၢ်က့ၤအခံဘၣ်ဒီး မ့ၢ်သုးကလၢၤတဖၣ်လၢ ဟဲအိၣ်ဆီလီၤသးဖးယံၤလံန့ၣ်လီၤ. မ့ၢ်စ့ၢ်ကီး ကျဲလၢဘျးစဲဃၥ် ဖၣ်ပူၣ်ဒီးကမးမိၢ်”အဂ့ၢ်န့ၣ်လီၤ.
ကတီၢ်ခဲအံၤန့ၣ် တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲ သုးကီၣ်ကးအစုတီၤဖီလၥ် သုးကလၢၤတဖၣ်လၢအိၣ်ဖဲ ကီၢ်ရ့ၣ်မုၢ်တြီၢ်ဟီၣ်က၀ီၤအပူၤတဖျၢၣ်၀ံၤတဖျၢၣ်အသိး ပၢဆှၢဃၥ်၀ဲ ၀့ၢ်ဖၣ်ပူၣ်ဒီတ၀့ၢ်၀ံၤ အိၣ်တ့ၢ်ဒၣ်ထဲ ဖၣ်ပူၣ်သုးတၢ်တိၥ်ကူၣ်ကျဲၤခိၣ်သ့ၣ်တဖျၢၣ်လီဒီး ပၢဆှၢ၀ဲကန့ၢ်အဂီၢ် က၀ီၤကးတံၥ်ဒုး၀ဲအဖၢမုၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ် လါနိၣ်၀့ဘၢၣ်(၂၂)သီအနံၤစ့ၢ်ကီး တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲ မးထီသုးကလၢၤ၀ံၤ သုးကီၣ်ကးအပှၤသုးဖိတနီၤ လဲၤပၥ်ဖှိၣ်ထီၣ်သးဆူ ငပျီတီသုးကလၢၤန့ၣ်လီၤ.
တၢ်ထီၣ်ဒုး၀ဲ သုးကီၣ်ကးအစုတီၤဖီလၥ် သုးကလၢၤတဖၣ်အပူၤ ပၥ်ဃုၥ်၀ဲ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA), ပယီၤကမျၢၢ်တၢ်ထူၣ်ဖျဲးသုးမုၢ်ဒိၣ်(BPLA), Force For Federal Democracy(FFD)ဒြိသုးဒီး ကမျၢၢ်တၢ်ဒီသဒၢသုး(PDF)တဖၣ်န့ၣ်လီၤ.
Ref: Ayeyarwaddy Times
