လါဒံၣ်စ့ဘၢၣ်(၁၂)သီ,၂၀၂၄နံၣ်
၂၀၂၄နံၣ်, လါဒံၣ်စ့ဘၢၣ်(၁၁)သီအနံၤ, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, လီၢ်ခၢၣ်သးဘိးဘၣ်ပၥ်ဖျါဃၥ်၀ဲလၢ သုးကီၣ်ကးအသုး ကိး၀ဲကညီကီၢ်စဲၣ်, လူပျဲၢ်ကီၢ်ဆၣ်အပူၤ ဒူသ၀ီဒီးက၀ီၤဒ့ပၢပြးခိၣ်နၢ်တဖၣ်၀ံၤ ဟ့ၣ်ဆီၣ်သနံး၀ဲလၢ တၢ်ကထၢန့ၢ်ဆူၣ်သုးသီလၢ တၢ်ထၢဆူၣ်သုးတၢ်သိၣ်လိနီၣ်ဂံၢ်(၈)အဂီၢ်န့ၣ်လီၤ.
KNU ပၥ်ဖျါဃၥ်၀ဲလၢ လါဒံၣ်စ့ဘၢၣ်(၁၀)သီအနံၤန့ၣ် သုးကီၣ်ကးဒုးယၤခိၣ် သုးခိၣ်ဒိၣ်စိ စိမ့အီၣ်ကိး၀ဲတၢ်အိၣ်ဖှိၣ်ဘၣ်ထွဲတၢ်ထၢဆူၣ်သုးဂ့ၢ်၀ီအဂီၢ်၀ံၤ တဲလီၤ၀ဲလၢ ဒူသ၀ီတဖၣ်လၢ တဆှၢထီၣ်သုးသီလၢ အပူၤကွံၥ်တၢ်ထၢဆူၣ်သုးနီၣ်ဂံၢ်တဖၣ် လ့ၤတက့ၤ တၢ်ကဘၣ်ဆှၢဆီၣ်၀ဲသုးသီလၢ အဆဲးခံကတၢၢ် လါဒံၣ်စ့ဘၢၣ်(၁၂)သီအနံၤအဂ့ၢ်န့ၣ်လီၤ.
ကရူၢ်တဘ့ၣ်န့ၣ် တၢ်ကဘၣ်ဟ့ၣ်ထီၣ်အပှၤ(၁)ဂၤလၢ တၢ်ထၢဆူၣ်သုး သုးတၢ်သိၣ်လိနီၣ်ဂံၢ်(၈)အဂီၢ်၀ံၤ တၢ်ဟ့ၣ်ထီၣ်မ့ၢ်တန့ၢ်ဘၣ်န့ၣ်တၢ်ကဘၣ်ဟ့ၣ်၀ဲစ့အကလီၤကၠး(၃၀)အဂ့ၢ်,တကးဘၣ်တၢ်လူၤပိၥ်မၤထွဲမ့ၢ်တအိၣ်ဘၣ်န့ၣ် တၢ်ကဖီၣ်န့ၢ်ဆူၣ်လၢ သုးတၢ်သိၣ်လိအဂီၢ်အဂ့ၢ် တဲပျံၤတဲဖုးအဂ့ၢ် ပၥ်ဖျါဃၥ်၀ဲန့ၣ်လီၤ.
လၢန့ၣ်အမဲၥ်ညါ ပၥ်ဖျါဃၥ်၀ဲစ့ၢ်ကီးလၢ သုးကီၣ်ကးဟ့ၣ်ဆီၣ်သနံး၀ဲ လူပျဲၢ်၀့ၢ်, က၀ီၤဒ့(က),(ဃ),ပၢပြးခိၣ်နၢ်တဖၣ်ဒီး ထီၣ်ယွဲ, အ့နိးသ့းပၣ်, ကမီးလဲ, သၣ်ယၣ်ကိပၥ်ဃုၥ် ဒူသ၀ီ(၁၂)ဖျၢၣ် ပၢပြးခိၣ်နၢ်တဖၣ်လၢ တၢ်ကထၢန့ၢ်ဆူၣ်သုးသီအဂီၢ်န့ၣ်လီၤ.
တၢ်ဃုထံၣ်သ့ၣ်ညါ ကရၢသဘျ့တဖုလၢအမ့ၢ် ကီၢ်ပယီၤဂ့ၢ်၀ီဒီးတၢ်ဃုထံၣ်သ့ၣ်ညါတၢ်သဘံၣ်သဘုၣ်ကရၢ(BACS) အလါအီးကထိဘၢၣ်(၁၉)သီအနံၤ,အတၢ်ဘိးဘၣ်ရၤလီၤအပူၤ ပၥ်ဖျါဃၥ်၀ဲလၢ တၢ်မၤမူထီၣ်တၢ်ထၢဆူၣ်သုးသဲစးတၢ်ဘျၢ၀ံၤအလီၢ်ခံ ကီၢ်ပယီၤဒီတဘ့ၣ် ပှၤလၢတၢ်ထၢန့ၢ်ဆူၣ်အီၤဒ်သုးသီ အိၣ်ထီၣ်၀ဲ(၂)ကလးဘျဲၣ်လံန့ၣ်လီၤ.
