လါဒံၣ်စ့ဘၢၣ်(၁၀)သီ,၂၀၂၄နံၣ်
၂၀၂၄နံၣ်, လါဒံၣ်စ့ဘၢၣ်(၉)သီအနံၤ, ခ့ၣ်အဲၣ်ယူၣ်-လီၢ်ခၢၣ်သး ပၥ်ဖျါဃၥ်၀ဲလၢ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးသုးတဖၣ် နုၥ်လီၤသုးကျိၤဆူ ကီၢ်ရ့ၣ်ချၢၣ်လွံၣ်ထူၣ်တၢ်ပၢဟီၣ်က၀ီၤ, သ၀ီ(၄)ဖျၢၣ်အပူၤအဃိ လီၢ်က၀ီၤကမျၢၢ်(၂)ကထိဘျဲၣ်(၂၅၆၀)ဂၤ ဘၣ်ပၥ်တ့ၢ်ဟံၣ်ဃီဘၣ်ဃ့ၢ်ပူၤဖျဲးသးန့ၣ်လီၤ.
သုးကီၣ်ကးအသုးတဖၣ် နုၥ်လီၤသုးကျိၤဆူ ဒူသ၀ီတဖၣ်အပူၤတကတီၢ်ဃီ သူ၀ဲကျိဖးဒိၣ်ဒီးဒြိတဖၣ်၀ံၤ ခးလီၤ၀ဲဆူကမျၢၢ်အိၣ်ဒူသ၀ီတဖၣ်ပူၤ အိၣ်ထီၣ်၀ဲကိးမုၢ်နံၤဃၥ်ဃၥ်န့ၣ်လီၤ.
ဘၣ်ထွဲဒီးသုးကီၣ်ကးအသုး သူ၀ဲကျိဖးဒိၣ်ဒီးဒြိတဖၣ်၀ံၤ ပညိၣ်ခးလီၤဆူကမျၢၢ်အိၣ်ဒူသ၀ီတဖၣ်အပူၤအဖီခိၣ် ကီၢ်ဆၣ်လၢၢ်ဒိၣ် ပဒိၣ်စီၤ၀ါမုၢ် စံး၀ဲလၢ” ဒူၣ်ဒါခးလီၤကျိဖးဒိၣ်န့ၣ် ကိးမုၢ်နံၤဃၣ်ဃၣ်လီၤ. ခး၀ဲကျိဒိၣ်ဧီ, ဒြိဧီကိးမုၢ်နံၤလီၤ. တၢ်ဘၣ်ဒိဘၣ်ထံးဟဲပိၥ်ထွဲထီၣ်အခံလၢ ကမျၢၢ်တၢ်ဘၣ်ဒိဘၣ်ထံးန့ၣ် အါထီၣ်ရုၢ်ရုၢ်.ဒ်န့ၣ်အသိးန့ၣ် ပၥ်ဃုၥ်ဒီးဖိဒံဖိသၣ်,တကးဒံးဘၣ်တၢ်သူၣ်ထီၣ်လၢအမ့ၢ်၀ဲဒၣ်တၢ်ဘူၣ်တၢ်ဘါတၢ်သူၣ်ထီၣ်တဖၣ်န့ၣ်တၢ်ဘၣ်ဒိတၢ်ဟးဂုၤဟးဂီၤန့ၣ်အိၣ်အါထီၣ်ရုၢ်ရုၢ်လီၤ. ဒူၣ်ဒါအတၢ်ခးလီၤကျိဖးဒိၣ်လၢ ကမျၢၢ်အသိးအကျါန့ၣ်”အဂ့ၢ် န့ၣ်လီၤ.
ခီဖျိ သုးကီၣ်ကးအသုးနုၥ်လီၤသုးကျိၤအဃိ လီၢ်က၀ီၤကမျၢၢ်တဖၣ်လၢ အိၣ်ဖဲကီၢ်ရ့ၣ်ချၢၣ်လွံၣ်ထူၣ်တၢ်ပၢဟီၣ်က၀ီၤ, ခၠိၣ်အ့, ကွ့ကိ, ကီးမဲၢ်သူၣ်ဒီး ယ့ၣ်ဖၠူၣ်ကၣ်သ၀ီပူၤတဖၣ် ဘၣ်ဃ့ၢ်ပူၤဖျဲးအဂ့ၢ် KNUစံး၀ဲန့ၣ်လီၤ.
လါဒံၣ်စ့ဘၢၣ်(၇)သီအနံၤန့ၣ် တၢ်ဒုးကဲထီၣ်သးလၢ သုးကီၣ်ကးသုးကျိၤဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၇)အဘၢၣ်စၢၤ ဖဲ ယ့ၣ်ဖၠူၣ်ကၣ်သ၀ီပူၤအဂ့ၢ် စံး၀ဲန့ၣ်လီၤ.
ကမျၢၢ်ဘၣ်ကွၢ်ဆၢၣ်မဲၥ်ဘၣ် ကျိဖးဒိၣ်ဒီးဒြိတၢ်လီၤဘၣ်ယိၣ်တၢ်အိၣ်သးအဖီခိၣ် ပဒိၣ်စီၤ၀ါမုၢ်တဲအါထီၣ်၀ဲလၢ” ဘၣ်ကွၢ်ဆၢၣ်မဲၥ်ဘၣ်အါဒ်လၢပၢၤထံး(ဘ့လၣ်)တပၤ.မမ့ၢ်ကစၢၢ်ခိၣ်တခီဒုတအါဘၣ်. ပၢၤထံးန့ၣ် ပရဲလိၥ်ကျိမုၢ်နုၢ်သ၀ီန့ၣ်, အဟဲခီဖျိဆူပအိၣ်တပၤန့ၣ် သ၀ီကအိၣ်၀ဲဒၣ် (၄၆)ဖျၢၣ်. မ့မ့ၢ်လၢပရဲလိၥ်ကျိမုၢ်ထီၣ်တပၤဒု သ၀ီ(၇၀)ဘျဲၣ်, သ၀ီတဖၣ်န့ၣ် ဘၣ်ကွၢ်ဆၢၣ်မဲၥ်ဘၣ်ဒ်န့ၣ်တဖၣ်” အဂ့ၢ်န့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢတၢ်ပၢဟီၣ်က၀ီၤ, ကီၢ်ရ့ၣ်(၇)ဘ့ၣ်အပူၤ ထံလီၢ်ကီၢ်ပူၤပှၤဃ့ၢ်သုးပှၤလီၢ်အိၣ်ကမှံအိၣ်ထီၣ်၀ဲ (၁)ကကွဲၢ်ဘျဲၣ်(၁,၀၅၂,၇၂၉)၀ံၤ လိၣ်ဘၣ်ပှၤဟီၣ်ခီၣ်ဖိတၢ်ဒိသူၣ်ဒိသးတၢ်မၤစၢၤတဖၣ်အဂ့ၢ် ကညီဆီၣ်ထွဲတၢ်မုၥ်တၢ်ခုၣ်ပှၥ်ဘျးစဲကရူၢ်(KPSN) ထုးထီၣ်ပၥ်ဖျါဃၥ်၀ဲ ဖဲလါနိၣ်၀့ဘၢၣ်(၂၈)သီအနံၤန့ၣ်လီၤ.
