ဘိၣ်ကလ့၀့ၢ်အပူၤ သုးကီၣ်ကး ဖီၣ်န့ၢ်ဆူၣ်ပိၥ်ခွါတဖၣ်၀ံၤ မၢကဲန့ၢ်ဆူၣ်သုး

လါဒံၣ်စ့ဘၢၣ်(၁၀)သီ,၂၀၂၄နံၣ်

အ့ၣ်ယၣ်၀တံၣ်ကီၢ်ခီ, ဘိၣ်ကလ့ကီၢ်ဆၣ်အပူၤ သုးကီၣ်ကးအသုးဒီးပၢပြးခိၣ်နၢ်တဖၣ်ပၥ်ဖှိၣ်ထီၣ်သး၀ံၤ တၢ်လိၣ်ဘၣ်ပှၤသုးဖိအဖီခိၣ် ဖီၣ်န့ၢ်ဆူၣ်ကမျၢၢ်သးစၢ်တဖၣ်၀ံၤ က့ၤကိးန့ၢ်ဆူၣ်၀ဲအဂ့ၢ် တၢ်သ့ၣ်ညါဘၣ်လၢ လီၢ်က၀ီၤကမျၢၢ်တဖၣ်အအိၣ်န့ၣ်လီၤ.

သုးကီၣ်ကးစံး၀ဲလၢ ဘိၣ်ကလ့ကီၢ်ဆၣ်အပူၤ တၢ်လိၣ်ဘၣ်ပှၤသုးဖိအဖီခိၣ် ဖဲလါဒံၣ်စ့ဘၢၣ်(၇)သီဒီး(၈)သီအနံၤ, ဟါလီၤခီအဆၢကတီၢ်န့ၣ် သုးကီၣ်ကးအသုးတဖၣ် နုၥ်လီၤဆူၣ်၀ဲလၢ ပှၤသးစၢ်အိၣ်ဟံၣ်တဖၣ်အပူၤ၀ံၤ ဖီၣ်န့ၢ်ဆူၣ်က့ၤကိး၀ဲအဂ့ၢ် စံး၀ဲန့ၣ်လီၤ.

ဘိၣ်ကလ့ပှၤလီၢ်က၀ီၤဖိတဂၤ စံး၀ဲလၢ” ခီဖျိလၢ ပၢပြးခိၣ်နၢ်တဖၣ်အဃိ သုးကီၣ်ကးအသုး သ့ၣ်ညါ၀ဲ သးစၢ်ပိၥ်ခွါတဖၣ်အိၣ် ဟံၣ်လီၤ. တၢ်ကိးန့ၢ်ဆူၣ်ခဲအံၤန့ၣ် တၢ်ကမၢကဲသုးလီၤ. တထုး၀ဲ တၢ်ဖးလၢၤဘၣ်. ဖဲမဟါန့ၣ် ပၥ်၀ဲ(၃)ဂၤန့ၣ်လီၤ. မုၢ်နၤခီအဆၢကတီၢ် ဟဲကိးန့ၢ်ဆူၣ်၀ဲလၢ သုးသိလ့ၣ်တဖၣ်” န့ၣ်လီၤ.

(၂)သီအတီၢ်ပူၤ ကမျၢၢ်သးစၢ်တစှၤန့ၣ်(၂၀)ဂၤ သုးကီၣ်ကးဖီၣ်န့ၢ်ဆူၣ် က့ၤကိး၀ဲ၀ံၤ အါတက့ၢ်န့ၣ် တၢ်ဖီန့ၢ်ဆူၣ်အီၤလၢ ခိခီၣ်ဒူသ၀ီတကပၤအဂ့ၢ် စံး၀ဲန့ၣ်လီၤ.

ပှၤလၢအိၣ်ဘူးဒီးသုးကီၣ်ကးအသုး တဂၤစံး၀ဲလၢ” တၢ်ဖီၢ်န့ၢ်ဆူၣ်အီၤတဖၣ် အိၣ်၀ဲလီၤ. သုးပူၤတၢ်ကစီၣ်စံး၀ဲလၢ တၢ်ဘၣ်မၤ၀ဲဒ်သိးအံၤန့ၣ်ခီဖျိလၢတၢ်လိၣ်ဘၣ်ပှၤသုးဖိအဖီခိၣ်အဃိလီၤ.ဖီၣ်န့ၢ်ဆူၣ်၀ဲစ့ၢ်ကီးလၢတၢ်ဂ့ၢ်ကလုၥ်ကလုၥ်အဖီခိၣ်န့ၣ်လီၤ. ဖီၣ်န့ၢ်ဆူၣ်၀ဲဒ်လၢ ဒူသ၀ီသးပှၢ်တဖၣ် ဟ့ၣ်ထီၣ်စရီအဖီခိၣ်စ့ၢ်ကီးအိၣ်၀ဲလီၤ. တၢ်လီၢ်တနီၤန့ၣ် လၢတၢ်လဲၤဖီၣ်အပူၤ ဒူသ၀ီသးပှၢ်အနီၢ်ကစၢ်စ့ၢ်ကီဒီးပၥ်ဃုၥ်၀ဲန့ၣ်လီၤ.”  

တၢ်တသ့ၣ်ညါလီၤတံၢ် တၢ်က့ၤကိး ကမျၢၢ်ပှၤသးစၢ်တဖၣ်လၢ တၢ်ဘၣ်ဖီၣ်န့ၢ်ဆူၣ်အီၤဒ်တၢ်မၢကဲသုးတဖၣ် တၢ်လီၢ်ဖဲလဲၣ်ဘၣ်ဆၣ် အါတက့ၢ်န့ၣ် တၢ်က့ၤဖီၣ်န့ၢ်ဆူၣ်အီၤဆူ မီၣ်ကၠိ(၅၃၄)ခီၣ်သုးအပူၤအဂ့ၢ် ပှၤလၢအိၣ်ဘူးဒီးသုးကီၣ်ကးအသုးစံး၀ဲန့ၣ်လီၤ.

ဘိၣ်ကလ့ကီၢ်ဆၣ်အပူၤ တၢ်ထၢဆူၣ်သုးနီၣ်ဂံၣ်(၁)တုၤ(၇)အပူၤ ပၥ်ဃုၥ်၀ဲ မိၢ်ဒၢအ၀ၤတဖၣ်, ပှၤသးစၢ်လၢ ဘၣ်ကွၢ်ထွဲမိၢ်သးပှၢ် ပၢ်သးပှၢ်တဖၣ်, ပှၤသးစၢ်ပိၥ်ခွါလၢ အသးနံၣ်တပှဲၤ(၁၈)နံၣ်တဖၣ်ပၥ်ဃုၥ် ပှၤအဂၤတစှၤန့ၣ်(၄၀၀)လၢ တၢ်ထၢန့ၢ်ဆူၣ်အီၤသုးတဖၣ်အဂ့ၢ် တၢ်သ့ၣ်ညါဘၣ်လၢ  ပှၤလၢအိၣ်ဘူးဒီးသုးကီၣ်ကးအသုးအအိၣ်န့ၣ်လီၤ.

Ref: DVB