ဘုလီၢ်လၢပှၤလီၢ်က၀ီၤဖိ ကူး၀ဲတန့ၢ်တဖၣ် သုးကီၣ်ကးအသုးကူး၀ဲဒီးဟံးန့ၢ်၀ဲ

လါဒံၣ်စ့ဘၢၣ်(၉)သီ,၂၀၂၄နံၣ်

ခီဖျိလၢ သုးကီၣ်ကးအသုးအဂံၢ်အဘါအါအါဂီၢ်ဂီၢ် လဲၤနုၥ်လီၤသုးကျိၤ ဆူခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်, လၢၢ်ဒိၣ်ကီၢ်ဆၣ်ဟီၣ်က၀ီၤအပူၤအဃိ ပှၤလီၢ်က၀ီၤဖိတဖၣ်ဘၣ်ဃ့ၢ်ပူၤဖျဲးသး၀ံၤ ဘုလီၢ်လၢလီၢ်က၀ီၤဖိ ကူး၀ဲတန့ၢ်ဘၣ်တဖၣ် သုးကီၣ်ကးအသုးကျိၤတဖၣ် ကူး၀ဲဒီးဟံးန့ၢ်ဆူၣ်၀ဲအဂ့ၢ် Salween Pressတၢ်ကစီၣ် ပၥ်ဖျါဃၥ်၀ဲန့ၣ်လီၤ.

ဘၣ်ထွဲဒီးတၢ်ဂ့ၢ်အံၤအဖီခိၣ် အၣ်ထူခ့ၣ် ဆဲးကျိးသံကွၢ်ဃၥ် ကီၢ်ရ့ၣ်ချၢၣ်လွံၢ်ထူၣ် ပှၤဘၣ်မူဘၣ်ဒါဘၣ်ဆၣ် တဲခီၣ်ဆၢက့ၤ၀ဲတအိၣ်နီတမံၤဒံးဘၣ်န့ၣ်လီၤ.

သုးကီၣ်ကးအသုးအဂံၢ်အဘါအါအါဂီၢ်ဂီၢ်  သုးကျိၤတဖၣ် လဲၤနုၥ်လီၤသုးကျိၤဆူ လၢၢ်ဒိၣ်ကီၢ်ဆၣ်ဟီၣ်က၀ီၤပူၤသ၀ီတဖၣ်လၢအမ့ၢ် သ့ၣ်ဂ့ၤလူၢ်,ယွၣ်ကၠံအ့ ဒီးနိၣ်ကူၣ်သ၀ီတဖၣ်အပူၤ အိၣ်လံ(၂)နွံဘျဲၣ်လံအဂ့ၢ် လီၢ်က၀ီၤကမျၢၢ်တဖၣ်လၢထံၣ်န့ၢ်၀ဲတဖၣ် စံး၀ဲန့ၣ်လီၤ.

ခီဖျိလၢ သုးကီၣ်ကးအသုးကျိၤတဖၣ် ဟဲနုၥ်လီၤသုးကျိၤလၢအဂံၢ်အဘါအါအါဂီၢ်ဂီၢ်အဃိ လီၢ်က၀ီၤကမျၢၢ်တဖၣ် ဘၣ်ယိၣ်လၢ တၢ်ဒုးကဆူၣ်ထီၣ်အဃိ ဘၣ်ဃ့ၢ်ပူၤဖျဲးသးအဂ့ၢ် လီၢ်က၀ီၤကမျၢၢ်ဖိတဖၣ် စံး၀ဲန့ၣ်လီၤ.

သုးကီၣ်ကးအသုးလၢ ဟဲနုၥ်လီၤသုးကျိၤတဖၣ် သူ၀ဲကျိဖးဒိၣ်ဒီးဒြိတဖၣ်၀ံၤ ပညိၣ်ဒုး၀ဲလီၢ်က၀ီၤကမျၢၢ်တဖၣ်အဂ့ၢ် လီၢ်က၀ီၤကမျၢၢ်တဖၣ် စံး၀ဲန့ၣ်လီၤ.

ဒ်န့ၣ်အသိး ဖဲလါဒံၣ်စ့ဘၢၣ်(၆)သီအနံၤ,ဂီၤအဆၢကတီၢ်စ့ၢ်ကီး သုးကီၣ်ကးဟဲတ့ၢ်လီၤန့ၢ် တၢ်အီၣ်တၢ်အီဆူ အပှၤသုးကလၢၤတဖၣ်လၢအမ့ၢ်  သၣ်ဘိၣ်ခလရ(၆၀)ဒီးခမရ(၃၅၁)သုးကလၢၤတဖၣ်လၢ အိၣ်ဖဲကီၢ်ဆၣ်မူဟီၣ်က၀ီၤအပူၤအဂ့ၢ် လီၢ်က၀ီၤကမျၢၢ်ဖိတဂၤ စံး၀ဲန့ၣ်လီၤ.

သုးကီၣ်ကးဟဲတ့ၢ်လီၤန့ၢ် တၢ်ဘိၣ်အိၣ်၀ဲ(၆)ဘိၣ်အဂ့ၢ်ဒီး တၢ်အံၤကမ့ၢ် တၢ်အီၣ်တၢ်အီတဖၣ်ဒီးစုက၀ဲၤပီးလီတဖၣ်အဂ့ၢ် စံး၀ဲန့ၣ်လီၤ.

သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးမီၤစိရိၤသုးကီၣ်ကးအသုးတဖၣ် သူ၀ဲကျိဖးဒိၣ်ဒီးဒြိတဖၣ်၀ံၤ ပညိၣ်ခးလီၤ၀ဲဆူ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၃), ကီၢ်ရ့ၣ်ချၢၣ်လွံၢ်ထူၣ် ဟီၣ်က၀ီၤတဖၣ်အပူၤဒီး မၤကမၣ်၀ဲပှၤဟီၣ်ခိၣ်ဖိခွဲးယၥ်တဖၣ် ကိးမုၢ်နံၤဃၣ်ဃၣ်လီၤအဂ့ၢ် န့ၣ်တၢ်သ့ၣ်ညါဘၣ်လၢ ခ့ၣ်အဲၣ်ယူၣ်-လီၢ်ခၢၣ်သး အတၢ်ပၥ်ဖျါတဖၣ်အဖီခိၣ်န့ၣ်လီၤ.