လါနိၣ်၀့ဘၢၣ်(၁၅)သီအနံၤ, ၂၀၂၄နံၣ်
အမဲရကၤ ဘျီၣ်ဒိၣ်အပူၤ ရံၣ်ပၣ်ပလ့ၣ်ကၣ်ပၣ်တံၣ် မၤနၢၤ၀ဲ ဘျီၣ်ဒိၣ်ခၢၣ်စး(၂၁၈)လီၢ်အဃိ ကီၢ်ခိၣ်ဒီၣ်နၢၤထြၢးပၣ်တံၣ် ပၢဆှၢဃၥ်လံ ဘျီၣ်ဒိၣ်ထးဒီးလၥ် ခံခါစလၢၥ်န့ၣ်လီၤ.
Arizona ကီၢ်စဲၣ်တၢ်ဖးအစၢဒီး California တၢ်ဖးအစၢ ဟဲဟးထီၣ်အဆၢကတီၢ်န့ၣ် ရံၣ်ပၣ်ပလ့ၣ်ကၣ်ပၣ်တံၣ် ပၢဆှၢ၀ဲ ဘျီၣ်ဒိၣ်လၥ်ခၢၣ်စးတၢ်လီၢ်အါတက့ၢ်န့ၣ်လီၤ.
ပၢဆှၢ၀ဲ ဘျီၣ်ဒိၣ်ခၢၣ်စးတၢ်လီၢ်အါကတၢၢ်၀ံၤအလီၢ်ခံ ရံၣ်ပၣ်ပလ့ၣ်ကၣ်ခိၣ်နၢ်တဖၣ် ကဘၣ်ဆီတလဲကွံၥ် ဖၢၣ်ဒရဲၣ်ပဒိၣ်ကျဲသနူတဖၣ်ပၥ်ဃုၥ် တၢ်ကမၤဖျါထီၣ်၀ဲ ကီၢ်ခိၣ်ဒီၣ်နၢၤထြၢး အတၢ်မုၢ်လၢ်ကွၢ်စိတဖၣ်န့ၣ်လီၤ.
ဖဲလၢထြၢးပၢ၀ဲအဆၢကတီၢ် တၢ်ကက့ၤဆှၢကွံၥ် ပှၤလၢဟဲနုၥ်လီၤအိၣ်တဖိးသဲစးတဖၣ်အဂ့ၢ် ကီၢ်ခိၣ်ဒီၣ်နၢၤထြၢးတဲလီၤ၀ဲန့ၣ်လီၤ. တကတီၢ်ဃီအဆၢကတီၢ် တဲစ့ၢ်ကီး၀ဲလၢ တၢ်ထၢအါထီၣ်ခိသွဲတဖၣ်၀ံၤ ကဟ့ၣ်တၢ်ကမၣ်ဆူ ထံရူၢ်ကီၢ်သဲးပှၤထီဒါတဖၣ်, တၢ်ကဟံးဖၢၣ်ဒရဲၣ်ပဒိၣ်အတၢ်စိတၢ်ကမီၤဒီးတၢ်မၤပျဲခွဲးယၥ်တဖၣ် ဒီး တၢ်ကဆီတလဲကွံၥ် အမဲရကၤမုၥ်ကျိၤ၀ဲၤကွၢ် ကျဲသနူတဖၣ်အဂ့ၢ်န့ၣ်လီၤ.
ကတီၢ်ခဲအံၤန့ၣ် Trump ပၥ်လီၤပဒိၣ်ကရၢကိတိၥ်တဖၣ်၀ံၤ တၢ်ပၥ်လီၤမူဒါလီၢ်လၤတဖၣ်စ့ၢ်ကီးန့ၣ် ဘျီၣ်ဒိၣ်ထး ကပၥ်ဂၢၢ်ပၥ်ကျၢၤ၀ဲအဆိအချ့သ့န့ၣ်လီၤ.
ရံၣ်ပၣ်ပလ့ၣ်ကၣ်ပၣ်တံၣ် ပၢဆှၢ၀ဲ ဘျီၣ်ဒိၣ်ခံခါစလၢၥ်အဃိ ဒံၣ်မိၣ်ကရံးတံးပၣ်တံၣ်ဘျီၣ်ဒိၣ်ခၢၣ်စးတဖၣ် ကတြီ၀ဲ ကီၢ်ခိၣ်ဒီၣ်နၢၤထြၢး အကမၤဖျါထီၣ်တၢ်မိၢ်လံမိၢ်ပှၢ် တၢ်ရဲၣ်တၢ်ကျဲၤတဖၣ်တန့ၢ်လၢၥ်ဘၣ်အဃိ ထြၢးအမၤဖျါထီၣ်အတၢ်မုၢ်လၢ်ကွၢ်စိအမိၢ်လံမိၢ်ပှၢ်သ့ညီကဒၣ်လီၤအဂ့ၢ် တၢ်သ့ၣ်ညါဘၣ်န့ၣ်လီၤ.
Ref:VOA
