လါနိၣ်၀့ဘၢၣ်(၁၅)သီ,၂၀၂၄နံၣ်
ခ့ၣ်အဲၣ်ယူၣ်-လီၢ်ခၢၣ်သး၀ဲၤလီၢ်ခိၣ်သ့ၣ် ဘိးဘၣ်ပၥ်ဖျါဃၥ်၀ဲလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်,လၢၢ်ဒိၣ်ကီၢ်ဆၣ်ဒီးမူကီၢ်ဆၣ်အပူၤခီဖျိလၢသုးကီၣ်ကးအသုးပညိၣ်ဒုးလီၢ်က၀ီၤကမျၢၢ်တဖၣ်အဃိ ကမျၢၢ်ဘၣ်သံ၀ဲ(၁)ဂၤ, ဟံၣ်ဘၣ်ဟးဂီၤကွံၥ်၀ဲ(၂)ဖျၢၣ် ဒီးဘၣ်ဒိ၀ဲ(၄)ဂၤအဂ့ၢ်န့ၣ်လီၤ.
၂၀၂၄နံၣ်, လါနိၣ်၀့ဘၢၣ်(၁၃)သီအနံၤ, ဂီၤ(၈း၃၀)မံးနံးအဆၢကတီၢ် သုးကီၣ်ကးအသုး(ခလရ-၂၆၄)လၢအိၣ်ဆီလီၤသးဖဲ၀့ၢ်ပ့းစလိးလဲၤတ့ၢ်လီၤဒြိမ့ၣ်ပိၢ်ဆူကၠီးကိသ၀ီပူၤအဃိသ၀ီဖိအဟံၣ်ဘၣ်ဟးဂီၤကွံၥ်၀ဲ(၁)ဖျၢၣ် ဒီးဖိသၣ်ဆံးဖိလၢ အနံၣ်(၁၀)ဆူအဖီလၥ်(၂)ဂၤ ဘၣ်ဒိ၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.
လါနိၣ်၀့ဘၢၣ်(၁၂)သီအနံၤ, ဂီၤ(၈း၃၀)မံးနံးအဆၢကတီၢ် သုးကီၣ်ကးအသုး(ခလရ-၂၆၄)တ့ၢ်လီၤကဒီးဒြိမ့ၣ်ပီၢ်အဃိ လဲၤလီၤတဲၥ်ပိၥ်ဖးထီၣ်၀ဲဒၣ် ဖဲ၀ါခၠဲသ၀ီပူၤ(၁)ဖျၢၣ်, မဲးစလံၣ်ကိသ၀ီပူၤ(၁)ဖျၢၣ်ဒီး ကၠီးကိသ၀ီအကပၤ(၁)ဖျၢၣ် ခဲလၢၥ်ပၥ်ဖှိၣ်(၃)ဖျၢၣ်အသိး တနံၤဃီအဆၢကတီၢ် ဖဲဟါ(၈း၅၀)မံးနံးအဆၢကတီၢ် သုးကီၣ်ကးအသုး(ခလရ-၂၆၄)တ့ၢ်လီၤကဒီးဒြိမ့ၣ်ပိၢ်(၂)ဖျၢၣ်အဃိ လဲၤလီၤတဲၥ်ပိၥ်ဖးထီၣ်၀ဲဒၣ် ဖဲကည့ၣ်ကၠိသ၀ီ ခၠ့ခၠီတိၤအဖီခိၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
တကးဘၣ် ဖဲလါနိၣ်၀့ဘၢၣ်(၁၂)သီအနံၤ, ဂီၤ(၈)နၣ်ရံၣ်အဆၢကတီၢ် သုးကီၣ်ကးအသုး(ခမရ-၄၃၉)သုးရ့ၣ် လဲၤတ့ၢ်လီၤမ့ၣ်ပိၢ်ဆူ မၠဲးနံၣ်ကွ့သ၀ီပူၤအဃိ နီၢ်မုၢ်စ့ဖိလၢသးနံၣ်(၂၀)အိၣ်တဂၤ ဘၣ်ဒိ၀ဲ, နီၢ်ကၠံၣ်ဘီ သးနံၣ်(၆၀)တဂၤဘၣ်ဒိ၀ဲအသိး ဘၣ်ဟးဂီၤကွံၥ်၀ဲ အူပဲထူအဟံၣ်(၁)ဖျၢၣ်စ့ၢ်ကီးအဂ့ၢ် ပၥ်ဖျါဃၥ်၀ဲန့ၣ်လီၤ.
လၢန့ၣ်အမဲၥ်ညါ လါနိၣ်၀့ဘၢၣ်(၁၁)သီအနံၤ, ဂီၤ(၁၀း၂၀)မံးနံးအဆၢကတီၢ် သုးကီၣ်ကးသုးပၥ်ဖှိၣ်တဖၣ် ခးလီၤ(၁၂၀-မမ)ကျိဖးဒိၣ်(၂)ဖျၢၣ်အဃိ လဲၤလီၤတဲၥ်ပိၥ်ဖးထီၣ်၀ဲဒၣ်ဖဲ ထွးနံၣ်ကိသ၀ီပူၤ၀ံၤ သ၀ီဖိလၢအမ့ၢ် နီၢ်၀ါ၀ါသးနံၣ်(၃၈)နံၣ်တဂၤ ဘၣ်ဒိ၀ဲအဂ့ၢ် ခ့ၣ်အဲၣ်ယူၣ်-လီၢ်ခၢၣ်သး-၀ဲၤလီၢ်ခိၣ်သ့ၣ် ပၥ်ဖျါဃၥ်၀ဲန့ၣ်လီၤ.
