လါနိၣ်၀့ဘၢၣ်(၁၄)သီ,၂၀၂၄နံၣ်
၂၀၂၄နံၣ်, လါနိၣ်၀့ဘၢၣ်(၁၂)သီအနံၤ, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ်တဖၣ်ထီၣ်ဒုး၀ဲသုးကီၣ်ကးမးထီသုးကလၢၤလၢကူးဆ့တိၤတၢ်ဘံၢ်တၢ်ဘၢသုးကလၢၤအပှၤသုးဖိက့ၤပၥ်ဖှိၣ်သးအလီၢ်အဂ့ၢ် ကီၢ်ရ့ၣ်မုၢ်တြီၢ် ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ်စံးဘၣ်အၣ်ထူခ့ၣ်န့ၣ်လီၤ.
“မထီသုးကလၢၤနၥ်က့ သုးပၥ်ဖှိၣ်စးထီၣ်ခးအီၤလံ, ထီၣ်၀ဲန့ၢ်ဃီဒု တနၢ်ဟူဒံးဘၣ်. စးထီၣ်ခး၀ဲဖဲ (၁၂)သီအနံၤ”အဂ့ၢ် စံး၀ဲန့ၣ်လီၤ.
(KNLA)တီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ် သုးကီၣ်ကးကူးဆ့တိၤတၢ်ဘံၢ်တၢ်ဘၢသုးကလၢၤ ဖဲလါနိၣ်၀့ဘၢၣ်(၉)သီအနံၤ, ဂီၤအဆၢကတီၢ်န့ၣ်လီၤ. လၢတၢ်ဒုးအပူၤ သုးကီၣ်ကးအသုးသံ၀ဲ(၈)ဂၤ ဒီး အပှၤသုးဖိလၢအိၣ်တ့ၢ်တဖၣ် က့ၤပၥ်ဖှိၣ်ထီၣ်သးဒီး မးထီသုးကလၢၤန့ၣ်လီၤ. မ့မ့ၢ်လၢ တၢ်ပၢၢ်ဆၢသုးပၥ်ဖှိၣ်တခီ ဘၣ်ဒိ၀ဲ (၂)ဂၤအဂ့ၢ် စံး၀ဲန့ၣ်လီၤ.
တကးဘၣ် တၢ်မၤန့ၢ်စ့ၢ်ကီး ကျိချံပှၥ်သၣ်အါအါဂီၢ်ဂီၢ်အသိး တၢ်မၤလီၤတဲၥ်ကွံၥ်န့ၢ်စ့ၢ်ကီး သုးကီၣ်ကးဒြိအဂ့ၢ် တၢ်သ့ၣ်ညါဘၣ်န့ၣ်လီၤ.
ကူဆ့တိၤတၢ်ဘံၢ်တၢ်ဘၢသုးကလၢၤအံၤ မ့ၢ်သုးကလၢၤ(၁)ဖျၢၣ်လၢအအိၣ်ဖဲ ၀့ၢ်ဖၣ်ပူၣ်ကျဲမုၢ်၀ံၤ အဘျးစဲဃၥ် ၀ဲဖၣ်ပူၣ်ဒီးကမးမီအသိး အိၣ်၀ဲဒၣ်ဖဲ ၀့ၣ်ဆၣ်ဒီးမထီအဘၢၣ်စၢၤန့ၣ်လီၤ.
သုးကီၣ်ကးအသုးကလၢၤတဖၣ်ဒ်အမ့ၢ် ကူဆ့းတိၤတၢ်ဘံၢ်တၢ်ဘၢသုးကလၢၤ, မထီသုးကလၢၤ, သုးကီၣ်ကးဒီးBGFပၥ်ဖှိၣ် ကစၢၢ်သၢဖျၢၣ်သုးကလၢၤ, ကတၢတံသုးကလၢၤဒီး ကမးမီသးကလၢၤတဖၣ် အိၣ်ဆီလီၤအသးဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၅), ကီၢ်ရ့ၣ်မုၢ်တြီၢ်, ဒွဲၣ်လိကီၢ်ဆၣ်ဟီၣ်က၀ီၤအပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
“မးထီသုးကလၢၤန့ၣ် BGFပၥ်တပၥ်တခီတသ့ၣ်ညါလီၤတံၢ်ဘၣ်. အမ့ပၥ်န့ၣ်ပၥ်သ့ဃီလီ. အ၀ဲ ဒ်ပသ့ၣ်ညါဘၣ်အသိးန့ၣ် BGFအပှၤသုးတဖၣ်အိၣ်စၢၤသုးကီၣ်ကးအသုးလၢ ကစၢၢ်သၢဖျၢၣ်သုးကလၢၤ”အဂ့ၢ် ကီၢ်ရ့ၣ်မုၢ်တြီၢ် ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ်စံး၀ဲန့ၣ်လီၤ.
သုးက့နီၣ်ဂံၢ်(၅), ကီၢ်ရ့ၣ်မုၢ်တြီၢ်ဟီၣ်က၀ီၤအပူၤ သုးခိးကီၢ်ဆၢBGF မၤစၢၤ၀ဲသုးကီၣ်ကးအသုးတဖၣ် ဒ်အမ့ၢ် တၢ်ဆှၢထီၣ်ဆှၢလီၤတၢ်အီၣ်တၢ်အီမ့ၢ်ဂ့ၤ ဒီး လဲၤစၢၤက့ၤစၢၤ၀ဲထီဘိလီၤအဂ့ၢ် စံး၀ဲန့ၣ်လီၤ.
