လါနိၣ်၀့ဘၢၣ်(၁၃)သီ,၂၀၂၄နံၣ်
ပှၤကီၢ်ပယီၤဖိလၢအိၣ်ဖဲ ကီၢ်ကၠီၣ်တဲၣ်အပူၤတဖၣ်လၢ ဘံၣ်စၣ်(Visa)အသးသမူအတလၢကွံၥ်တဖၣ် တသီန့ၣ် တၢ်ကဘၣ်ဟ့ၣ်၀ဲ စ့ယိၤဘး(၅၀၀)ဆူ ကၠီၣ်တဲၣ်ထံလီၢ်ကီၢ်ပူၤတၢ်နုၥ်လီၤဟးထီၣ်၀ဲၤကျိၤ၀ံၤ ဘံၣ်စၣ်အသးသမူမ့ၢ်တလၢကွံၥ်န့ၣ် တၢ်ကကးတံၥ်ကွံၥ် တၢ်နုၥ်လီၤကီၢ်ပူၤတၢ်ပျဲအဂ့ၢ် ကီၢ်ပယီၤမီၢ်သီလၢအိၣ်ဖဲ ၀့ၢ်ဘီကီး ဟ့ၣ်ပလီၢ်ထုးထီၣ်ပၥ်ဖျါဃၥ်၀ဲ ဖဲလါနိၣ်၀့ဘၢၣ်(၈)သီအနံၤန့ၣ်လီၤ.
ကီၢ်ကၠီၣ်တဲၣ်ပူၤ ပှၤကီၢ်ပယီၤဖိလၢအိၣ်တလၢကွံၥ်ဘံၣ်စၣ်သးသမူဟဲအါထီၣ်န့ၣ် ခီဖျိလၢ ကီၢ်ပယီၤပူၤတၢ်ထုးထီၣ် တၢ်ထၢဆူၣ်သုးသဲစးတၢ်ဘျၢ၀ံၤလံၤလံၤအဂ့ၢ် ပှၤကီၢ်ပယီၤဖိလၢ ဟဲအိၣ်၀ဲဖဲကၠီၣ်တဲၣ်တဂၤတဲ၀ဲန့ၣ်လီၤ.
“ဘၣ်မနုအဃိတအဲၣ်ဒိးက့ၤဘၣ်လဲၣ်န့ၣ်အရ့ဒိၣ်ကတၢၢ်ဒီးအဆိကတၢၢ်တထံၣ်န့ၣ်ခီဖျိလၢတၢ်ထၢဆူၣ်သုးသဲစးတၢ်ဘျၢအဃိလီၤ.ပှၤသးစၢ်,ပိၥ်မုၣ်ဖိသၣ်တဖၣ်စ့ၢ်ကီးကဘၣ်နုၥ်လီၤတၢ်လၢတၢ်ထၢဆူၣ်သုးသဲစးတၢ်ဘျၢအပူၤဒီးအဂၤတထံၣ်န့ၣ်တၢ်ဒုးကဲထီၣ်သးလၢတၢ်လီၢ်အါတက့ၢ်လၢကီၢ်ပယီၤပူၤအဃိန့ၣ်လီၤ.တၢ်ကဆဲးမၤလိတၢ်ကူၣ်ဘၣ်ကူၣ်သ့တန့ၢ်ဘၣ်.တၢ်ထုးထီၣ်တၢ်ထၢဆူၣ်သဲစးတၢ်ဘျၢ၀ံၤအလီၢ်ခံဟဲနုၥ်လီၤဆူကီၢ်ကၠီၣ်တဲၣ်ပူၤလၢကျဲအကလုၥ်ကလုၥ်န့ၣ်လီၤ. အဃိ ကီၢ်ကၠီၣ်တဲၣ်ပူၤ တၢ်လီၢ်အါတီၢ်ပူၤ အိၣ်ဆိး၀ဲလၢ လံၥ်အုၣ်သးတအိၣ်ဘၣ်န့ၣ်လီၤ.”
ဒ်န့ၣ်အသိး ကီၢ်ခီပှၤကီၢ်ပယီၤတဖၣ်အကျါ ပှၤလၢဟဲဖံးမၤတၢ်လၢ MOUတဖၣ် တၢ်မၤဘံၣ်စၣ်တၢ်ပျဲအသးသမူမ့ၢ်တလၢကွံၥ်ဘၣ်ဆၣ်ကီၢ်ပယီၤထံရူၢ်ကီၢ်သဲးတၢ်အိၣ်သးတဖၣ်ဒီးသုးဂ့ၢ်၀ီတၢ်အိၣ်သးတဖၣ် တၢ်ဂၢၢ်ကျၢၤတအိၣ်ဘၣ်ဒီး မ့ၢ်က့ၤဆူကီၢ်ပယီၤန့ၣ် ဘၣ်က့ၤကဲသုးအဃိ အါတက့ၢ်တက့ၤဆူ ကီၢ်ပယီၤအိၣ်ဆိးလီၢ်ကျဲတဖၣ်အဂ့ၢ် ပှၤဟူးဂဲၤလၢပှၤမၤတၢ်ဖိတဖၣ် တဲ၀ဲန့ၣ်လီၤ.
ပှၤအိၣ်တလၢလံၥ်အုၣ်သးတဖၣ်အကျါ ပှၤမၤတၢ်ဖိလၢ အဖီၣ်ဃၥ် ခီကီၢ်လံၥ်အုၣ်သးတဖၣ်စ့ၢ်ကီး ပၥ်ဃုၥ်၀ဲအဂ့ၢ် ကိၣ်ယဲမ့လၢ အဟူးဂဲၤလၢ ပှၤမၤတၢ်ဖိဂ့ၢ်၀ီတဖၣ် တဲ၀ဲန့ၣ်လီၤ.
Ref: VOA
