လါနိၣ်၀့ဘၢၣ်(၈)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ပၢမူတြီၢ်ကီၢ်ရ့ၣ် န့ၢ်ဒီတဘ့ၣ်ဃၣ်ဃၣ်လံအကျါ အိၣ်တ့ၢ်ထဲဒၣ်ဖၣ်ပူၣ်၀့ၢ်ဒီးကမးမီလီၤအဂ့ၢ် ကီၢ်ရ့ၣ်မုၢ်တြီၢ်ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၅), ကီၢ်ရ့ၣ်မုၢ်တြီၢ်ဟီၣ်က၀ီၤအပူၤ, ကီၢ်ဆၣ်အိၣ်၀ဲသၢဘ့ၣ်လၢအမ့ၢ် လူၤသီကီၢ်ဆၣ်, ဘူသိၣ်ကီၢ်ဆၣ်, ဒွဲၣ်လိကီၢ်ဆၣ်၀ံၤ ၀့ၢ်အိၣ်၀ဲ(၂)ဖျၢၣ်လၢအမ့ၢ် ၀့ၢ်ဖၣ်ပူၣ်ဒီး၀့ၢ်ကမးမီန့ၣ်လီၤ.
ကတီၢ်ခဲအံၤ သုးကီၣ်ကးအသုးတဖၣ် ဟံးတၢ်လီၢ်န့ၢ်ဒၣ်ထဲလၢ ကီၢ်ဆၣ်အချၢ၀ံၤ KNUတၢ်ပၢတၢ်ပြးတၢ်ဖံးတၢ်မၤတဖၣ် လဲၤတရံးသးလံလၢ ကီၢ်ရ့ၣ်မုၢ်တြီၢ်ဒီတဘ့ၣ်အပူၤအဂ့ၢ် စံး၀ဲန့ၣ်လီၤ.
ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) ထီၣ်ဒုးမၤန့ၢ် သုးကီၣ်ကးသုးကလၢၤလၢအိၣ်ဆီလီၤအသး ဖဲဖၣ်ပူၣ်၀့ၢ်ပူၤတဖၣ်ဖဲ ၂၀၂၄နံၣ်, လါမးရှးလံလံဘၣ်ဆၣ် သုးကလၢၤတဖၣ်အိၣ်ဒံးလၢ ၀့ၢ်အကပၤအဃိ တၢ်ပၢတၢ်ပြးတၢ်ဖံးတၢ်မၤတဖၣ် လဲၤတရံးသးတန့ၢ်ဒံးဘၣ်အဂ့ၢ် စံး၀ဲန့ၣ်လီၤ.
ကမးမီ၀့ၢ်န့ၣ် မ့ၢ်၀့ၢ်တဖျၢၣ်လၢ သုးကီၣ်ကးဒီးသုးခိးကီၢ်ဆၢ(BGF) ဟူးဂဲၤလ့ၤလိၤ ဟီၣ်က၀ီၤတခါန့ၣ်လီၤ.
“ကီၢ်ဆၣ်သၢဘ့ၣ်အပူၤ လ့ၤတက့ၤ သုးကီၣ်ကးအသုးကလၢၤတအိၣ်လၢၤဘၣ်တမ့ၢ်ဘၣ်. အိၣ်တ့ၢ်ဒၣ်ထဲလၢ ကီၢ်ဆၣ်အချၢတပၤန့ၣ်လီၤ. ဘူးကလၢၥ်ဃၣ်ဃၣ်လံ. KNU တၢ်ပၢတၢ်ပြးတဖၣ် အိၣ်ပၥ်စၢၤလီၤ. KNUတၢ်ပၢတၢ်ပြးတအိၣ်ဒၣ်ထဲလၢ ဖၣ်ပူၣ်ဒီးကမးမီ၀့ၢ်လီၤ. တၢ်လီၢ်တဖၣ် မ့ၢ်သုးကီၣ်ကးတၢ်ပၢဟီၣ်က၀ီၤအဃိဒီး တၢ်လီၢ်လၢအိၣ်တ့ၢ်တဖၣ် အိၣ်လၢ KNUတၢ်ပၢဖီလၥ်လီၤ”အဂ့ၢ် သုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ် စံး၀ဲန့ၣ်လီၤ.
ကီၢ်ရ့ၣ်မုၢ်တြီၢ်ဟီၣ်က၀ီၤပူၤ သုးကီၣ်ကးသုးရ့ၣ်ဒီးသုးကလၢၤခဲလၢၥ်အိၣ်၀ဲ(၇၂)ဖျၢၣ်၀ံၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ(၄)နံၣ်ဘျဲၣ်အတီၢ်ပူၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးပၥ်ဖှိၣ်တဖၣ် ဒုးအီၤလၢကျဲအကလုၥ်ကလုၥ်အဃိ သုးကီၣ်ကးဘၣ်ပျၢ်ကွံၥ်၀ဲ သုးကလၢၤခဲလၢၥ်(၆၀)ဘျဲၣ်လံန့ၣ်လီၤ.
ကတီၢ်ခဲအံၤ သုးကီၣ်ကးမုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ်(ရတခ)အစုတီဖီလၥ် သုးတၢ်တိၥ်ကူၣ်ကျဲၤခိၣ်သ့ၣ် စဗခ (၁), ခီၣ်သုးရ့ၣ် ခမရ(၃၄၀), (၃၄၁)ပၥ်ဃုၥ် မုၢ်တြီၢ်ကီၢ်ရ့ၣ်ဒီတဘ့ၣ်အပူၤ သုးကီၣ်ကးသုးကလၢၤ အိၣ်တ့ၢ်ဒၣ်ထဲ (၁၁)ဖျၢၣ်န့ၣ်လီၤ.
ဖဲအပူၤကွံၥ် လါအီးကထိဘၢၣ်(၂၉)သီအနံၤစ့ၢ်ကီး KNLAဒီးသုးပၥ်ဖှိၣ်တဖၣ် ထီၣ်ဒုးမၤန့ၢ် သုးကီၣ်ကးခီပူးသုးကလၢၤအဂံၢ်အဘါအိၣ်(၁၀၀)ဘျဲၣ်လၢအိၣ်ဖဲ ဃိၣ်လိၥ်ကျိကၢၢ်နံၤ၀ံၤ တၢ်မၤန့ၢ်စ့ၢ်ကီး ကျိချံပှၥ်သၣ်ဒီးတၢ်ဖီၣ်န့ၢ်မူဒံးသုးကီၣ်ကးအပှၤသုးဖိတဖၣ်န့ၣ်လီၤ.
တၢ်ထီၣ်ဒုးမၤန့ၢ် သုးကီၣ်ကးခီပူးသုးကလၢၤ၀ံၤအလီၢ်ခံ သုးကီၣ်ကးတပၤ မၤအါထီၣ်ကလံၤကျါတၢ်ဒုးတဖၣ်အိၣ်ထီၣ်၀ဲကိးမုၢ်နံၤဃၣ်ဃၣ်လီၤဒီး ဟဲဆှၢန့ၢ်တၢ်အီၣ်တၢ်အီဆူအပှၤသုးဖိလၢ ကလံၤကျါအိၣ်ထီၣ်၀ဲထီဘိလီၤအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: Mizzima
