လါနိၣ်၀့ဘၢၣ်(၇)သီ,၂၀၂၄နံၣ်
ဖဲလါနိၣ်၀့ဘၢၣ် (၅)သီအနံၤ KNU -ကညီဒီကလုာ်စၢဖှိၣ်ကရၢ,နဲၣ်ရွဲၣ်ခိၣ်ကျၢၫ် ပဒိၣ်စီၤတၫ်ဒိၣ်မူ တဲလီၤ၀ဲလၢ ပယီၤသုးန့ၣ် တၫ်အၢၣ်လီၤ(၅)ထံၣ်လၢအၣ်စံၣ်ယၣ် ပာ်လီၤဃာ်၀ဲ တုၤလၢမုၫ်မဆါတနံၤအံၤ လူၤပိာ်မၤထွဲ၀ဲတအိၣ်ဘၣ်အမဲာ်ညါ မၤကမၣ်၀ဲတပယူာ်ဃီ တုၤလၢခဲကနံၤအံၤန့ၣ်လီၤ.
ဖဲမၤ၀ဲ Online တၫ်တၢၣ်ပီၣ်တဲသကိးတၫ်ဒီး ဒီကလုာ်ဃူဖိးပဒိၣ်(NUG), ကညီဒီကလုာ်စၢဖှိၣ်ကရၢ(KNU), ကရ့ၣ်နံၣ်ဒီကလုာ်တၫ်လဲၤထီၣ်လဲၤထီပၣ်တံၣ်(KNPP),ခၠီဒီကလုာ်သုး(CNF)တဖၣ်အကတီၫ် ဘၣ်ထွဲအၣ်စံၣ်ယၣ်တၫ်ဂ့ၫ်အဖီခိၣ် တဲ၀ဲန့ၣ်လီၤ.
အၣ်စံၣ်ယၣ်တၫ်အၢၣ်လီၤ(၅)ထံၣ်အပူၤ တၫ်ကပတုာ်ကွံာ်တၫ်မၤသံမၤ၀ီအဂီၫ် ,တၫ်တၢၣ်ပီၣ်တဲသကိးလၢ ပှၤအါဂၤ ပာ်ဃုာ်အဂီၫ်,အၣ်စံၣ်ယၣ်ပှၤပၢၤလီၫ်ဆ့ၣ်နီၤဒီးခၢၣ်စးလီၤဆီန့ၣ် တၫ်တၢၣ်ပီၣ်တဲသကိးအပူၤ ကနုာ်လီၤမၤန့ၫ်၀ဲလၢ တၫ်ဘၢၣ်စၢၤအဂီၫ်,တၫ်ကဟ့ၣ်ပှၤတ၀ၢတၫ်မၤစၢၤအဂီၫ်,အၣ်စံၣ်ယၣ်ခၢၣ်စးလီၤဆီဒီးပှၤလၢဘၣ်ထွဲတဖၣ် ကထံၣ်လိာ်သးအဂီၫ် တၫ်ဂ့ၫ်တဖၣ် ပာ်ဃုာ်၀ဲလီၤ.
တၫ်သ့ၣ်တဖၣ်အံၤ တလူၤပိာ်မၤထွဲ၀ဲဘၣ်ဒီး သုးကီၣ်ကးန့ၣ် ပညိၣ်ဒုးအါထီၣ် ကမျၢၫ်အဂ့ၫ် ပဒိၣ်စီၤတၫ်ဒိၣ်မူ တဲ၀ဲန့ၣ်လီၤ.
“တၫ်ဂ့ၫ်အဆိကတၢၣ်တထံၣ်လၢအမ့ၫ် တၫ်ကပတုာ်ကွံာ်တၫ်မၤသံမၤ၀ီ တၫ်ဂ့ၫ်အံၤပမ့ၫ်ကွၫ်န့ၣ် ပယီၤသုးန့ၣ် တကွၫ် တၫ်လၢထံဖိကီၫ်ဖိကမျၢၫ်အဂီၫ်ဘၣ်အမဲာ်ညါ လၢကီၫ်ပယီၤထံဖိကီၫ်ဖိအဖီခိၣ် တၫ်ဒုးလၢကိး၀ဲဒ်အမ့ၫ် Total Warန့ၣ် မၤဆူၣ်ထီၣ်၀ဲ၀ံၤ ပညိၣ်ဒုးဃီၤကမျၢၫ်န့ၣ်လီၤ.လၢကီၫ်ပယီၤဒီတဘ့ၣ်အပူၤ ကီၫ်ဆၣ်ဟီၣ်က၀ီၤတၫ်လီၫ် အ(၇၁)မၠးက ယၤအပူၤ တူၫ်ဘၣ် စုက၀ဲၤတၫ်သဘံၣ်သဘုၣ်ဒိၣ်ဒိၣ်မုၫ်မုၫ်န့ၣ်လီၤ. သုးကီၣ်ကးန့ၣ် မၤအါထီၣ် တၫ်တ့ၫ်လီၤမ့ၣ်ပိၫ် လၢကဘီယူၤတဖၣ်န့ၣ်လီၤ.တၫ်န့ၣ်အဃိ ထီဒါ၀ဲ De escalation လၢအမ့ၫ် အၣ်စံၣ်ယၣ် တၫ်အၢၣ်လီၤအဆိကတၢၫ် တထံၣ်၀ံၤ ပှၤမၤ escalation မ့ၫ်မတဂၤလဲၣ်န့ၣ် မ့ၫ်သုးကီၣ်ကးလီၤ.”
တၫ်မ့ၫ်အဲၣ်ဒိးမၤပတုာ်ကွံာ် တၫ်မၤသံမၤ၀ီတဖၣ်န့ၣ် တၫ်ဘၣ်မၤပတုာ်ကွံာ်ကဘီယူၤသိတဖၣ်, တၫ်သုတဟ့ၣ်ခွဲး လၢကတီၣ်သွီနုာ်တၫ်စုက၀ဲၤတဖၣ်,သုးကီၣ်ကးအစ့ဟဲနုာ်ကျဲတဖၣ် တၫ်ကကးတံာ်ကွံာ်အဂီၫ်ဒီး မီၫ်သီမီၫ်လါဂ့ၫ်၀ီ တကပၤ တၫ်သုတဟ့ၣ်အီၤအလီၫ်တဂ့ၤအဂီၫ် ဟ့ၣ်ကူၣ်ဃာ်၀ဲ အၣ်စံၣ်ယၣ်ဒီးထံဂုၤကီၫ်ဂၤတဖၣ်အဂ့ၫ် တဲ၀ဲလီၤ.
ခီဖျိလၢအၣ်စံၣ်ယၣ်တဆီ လၢတၫ်ဟ့ၣ်ပှၤကီၫ်ပယီၤဖိ ပှၤတ၀ၢတၫ်မၤစၢၤအကတီၫ် ကအိၣ်ဖျိဖျိဖျါဖျါဒီးတၫ်ဟံးန့ၫ်မူဒါ,တၫ်တူၫ်မူတူၫ်ဒါတဖၣ် ကြၢးအိၣ်၀ဲ၀ံၤ သုးကီၣ်ကးန့ၣ် ခီဖျိလၢအၣ်စံၣ်ယၣ် ဟ့ၣ်ပှၤတ၀ၢတၫ်မၤစၢၤတဖၣ်အဖီခိၣ် သူ၀ဲလၢထံရူၫ်ကီၫ်သဲးတၫ်ဘၣ်ဘျူးအဂီၫ်တဖၣ်စ့ၫ်ကီး တၫ်ဘၣ်ပလီၫ်သးအဂ့ၫ် တဲ၀ဲလီၤ.
တကးဘၣ် တၫ်ဃုထၢလၢ သုးကီၣ်ကးဂဲၤလိာ်၀ဲလၢ ကမၤ၀ဲအံၤ မ့ၫ်တၫ်မၤဆူၣ်ထီၣ် တၫ်သဘံၣ်သဘုၣ်၀ံၤ တမ့ၫ်ကဟဲစိာ်န့ၫ် တၫ်ဂၢၫ်တၫ်ကျၢၤဒီးတၫ်မုာ်တၫ်ခုၣ်ဘၣ်အဂ့ၫ် KNU တဲ၀ဲလီၤ.
လၢကီၫ်လၣ်အိၣ် တၫ်မၤ၀ဲအၣ်စံၣ်ယၣ်ပတီၫ်ထီတၫ်အိၣ်ဖှိၣ်၀ံၤအလီၫ်ခံ လါအီးကထိဘၢၣ်(၁၃)သီအနံၤ တၫ်ဘိးဘၣ် ရၤလီၤအပူၤတခီ ကီၫ်ပယီၤပူၤ တၫ်ဒုးတဖၣ်ကပတုာ်ကွံာ်တဘျီဃီ၀ံၤ လၢပှၤခဲလၢာ်ပာ်ဃုာ် တၫ်ထံၣ်လိာ်တၢၣ်ပီၣ် တဲသကိးတၫ်မုာ်တၫ်ခုၣ်အဂီၫ် ဖၢနုာ်ဃ့ထီၣ်ဃာ်၀ဲလီၤ.
ကီၫ်ကၠီၣ်တဲၣ်တခီ ကီၫ်ပယီၤဂ့ၫ်၀ီအဂီၫ် အၣ်စံၣ်ယၣ်ကရၢထံကီၫ်တဖၣ်အဘၢၣ်စၢၤ တၫ်ကထံၣ်လိာ်တၢၣ်ပီၣ် တဲသ ကိးတၫ်လၢ တၫ်သဘျ့အပူၤတခါ လါလၢကဟဲ လါဒံၣ်စဲဘၢၣ်အပူၤ ကတူၫ်လိာ်မၤ၀ဲအဂီၫ် ကွဲမုာ်ဃာ်၀ဲလီၤ.
