လါနိၣ်၀့ဘၢၣ်(၇)သီ,၂၀၂၄နံၣ်
သ၀ီတနီၤဒီးထံလီၢ်ကီၢ်ပူၤပှၤဃ့ၢ်သုးဒဲက၀ီၤ လၢအိၣ်ဖဲတနီသရံးပူၤတဖၣ် ဘၣ်ကွၢ်ဆၢၣ်မဲၥ်ဘၣ် ဟၢဖၢလူတၢ်ဆါအဂ့ၢ် လီၢ်က၀ီၤဖိဒီးကသံၣ်ပှၤမၤတၢ်ဖိတဖၣ် တဲ၀ဲန့ၣ်လီၤ.
သ့ၣ်ဒီ,ပ၀းသ၀ီ, ညီၣ်ပ့ၣ်ကွ့, မီၣ်တိသ၀ီတဖၣ်အပူၤ စးထီၣ်လၢ လါအီးကထိဘၢၣ်လီၢ်ခံကတၢၢ်အနွံန့ၣ် ဟၢဖၢလူတၢ်ဆါတဖၣ်ဟဲကဲထီၣ်သးအါအဂ့ၢ် ကရၢလၢအမၤစၢၤထံလီၢ်ကီၢ်ပူၤပှၤဘၣ်ကီဘၣ်ခဲဖိတဖၣ်ဒီး ပှၤလၢအမၤစၢၤတၢ်လၢ တၢ်အိၣ်ဆူၣ်အိၣ်ချ့တပၤတဖၣ် စံး၀ဲန့ၣ်လီၤ.
“ကဲထီၣ်လၢ ဟံၣ်ဖိဃီဖိဒီတဒူၣ်လီၤ. တၢ်ဆါတခီ တဆူၣ်ဒိၣ်ဒိၣ်ဘၣ်. တၢ်မ့ၢ်အီ အံသၣ်ဘၢထံၣ်, ကသံၣ်အီ, ကသံၣ်ဆဲး သၢသီဃၣ်ဃၣ်န့ၣ် ဂ့ၤထီၣ်လီၤအဂ့ၢ်” နွ့ၣ်အူကရၢဖိတဂၤလၢ အမၤစၢၤထံလီၢ်ကီၢ်ပူၤပှၤဘၣ်ကီဘၣ်ခဲတဖၣ် တဲ၀ဲန့ၣ်လီၤ.
မူခိၣ်ကလံၤသီၣ်ဂီၤဆီတလဲတၢ်ဆၢကတီၢ်အဃိ တၢ်မ့ၢ်ကိၢ်န့ၣ် တၢ်ကိၢ်ဆူၣ်ဒိၣ်မးအသိး တၢ်မ့ၢ်စူၤစ့ၢ်ကီး မူခိၣ်စူၤဒိၣ်မးအဃိ ကဲထီၣ်သးသ့အသိး ခီဖျိလၢထံအီဒီးတၢ်အီၣ်တၢ်အီၣ်တဖၣ် တကဆှီဘၣ်အဃိအဂ့ၢ် ပှၤလၢမၤတၢ်လၢ တၢ်အိၣ်ဆူၣ်အိၣ်ချ့သနၢၣ်တပၤတဖၣ် တယၢ်၀ဲန့ၣ်လီၤ.
ခီဖျိလၢ ဟၢဖၢလူတၢ်ဆါကဲထီၣ်သးအါအဃိ ထံလီၢ်ကီၢ်ပူၤပှၤဃ့ၢ်သုးဒဲက၀ီၤတဖၣ်ပၥ်ဃုၥ် သ၀ီတနီၤလၢအိၣ်ဖဲတနီသရံးကီၢ်ဆၣ်အပူၤတဖၣ် လိၣ်ဘၣ်ကသံၣ်ကသီတၢ်လိၣ်ဘၣ်အါမးအဂ့ၢ် ကရၢလၢမၤစၢၤတၢ်တဖၣ် စံး၀ဲန့ၣ်လီၤ.
“ကသံၣ်ကသီတၢ်လိၣ်ဘၣ် အါမးလီၤ. သုးကီၣ်ကးကးတံၥ်ဃၥ်ကျဲတဖၣ်အဃိ ကသံၣ်တဖၣ်အပှ့ၤဒိၣ်ထီၣ်အသိး စ့မ့ၢ်အိၣ်ဒၣ်လဲၣ် ပှ့ၤတန့ၢ်ဘၣ်အဃိ ဘၣ်ယါဘျါအီၤလၢကသံၣ်လၢအန့ၢ်ဘၣ်လီၤအဂ့ၢ်” ပှၤလၢယါဘျါန့ၢ် ထံလီၢ်ကီၢ်ပူၤပှၤဘၣ်ကီဘၣ်ခဲဒဲက၀ီၤဖိတဖၣ် တဂၤတဲ၀ဲန့ၣ်လီၤ.
လၢ၀့ၢ်ဘျံးအပူၤ အံၣ်သၣ်ဘၢထံတဘိၣ်အပှ့ၤအိၣ် (၆)ကယၤကၠးဘၣ်ဆၣ် မ့မ့ၢ်လၢတနီသရံးကီၢ်ဆၣ်ပူၤ, သ၀ီတဖၣ်အပူၤတခီ အပှ့ၤအိၣ်၀ဲ (၁)ကထိကၠးဃၣ်ဃၣ်အဂ့ၢ် လီၢ်က၀ီၤကမျၢၢ်တဖၣ် စံး၀ဲ့နၣ်လီၤ.
လီၢ်က၀ီၤတဖၣ်အပူၤ ဟၢဖၢလူတၢ်ဆါတဖၣ်တကးဘၣ်တၢ်လိၤကိၢ်သွံၣ်ယွၤတၢ်ဆါတဖၣ်စ့ၢ်ကီး ကဲထီၣ်သးအဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိဒီးတၢ်အိၣ်ဆူၣ်အိၣ်ချ့ပှၤမၤတၢ်ဖိတဖၣ်အအိၣ်န့ၣ်လီၤ.
Ref: Dawei Watch
