လါနိၣ်၀့ဘၢၣ်(၆)သီ,၂၀၂၄နံၣ်
ကီၢ်ရှၢးရှၢၣ်, ကးဟီၣ်က၀ီၤအပူၤ ကလံၤစိးကီၢ်ခိရံယါအပှၤသုးဖိ အိၣ်၀ဲ(၁,၁၀၀၀)ဘျဲၣ်အဂ့ၢ် တၢ်သ့ၣ်ညါဘၣ်လၢ ပ့ၢ်ဆှါတၢ်နဲၣ်လီၤ၀ဲၤကျိၤဒီးထံဂုၤကီၢ်ဂၤပ့ၢ်ဆှါ၀ဲကျိၤ အတၢ်ဃုထံၣ်သ့ၣ်ညါ လံၥ်ပၥ်ဖျါအဖီခိၣ်အဂ့ၢ် ဘလၣ်တံၣ်မၣ်စလၣ်စကံ တဲလီၤ၀ဲဖဲ လါနိၣ်၀့ဘၢၣ်(၄)သီအနံၤန့ၣ်လီၤ.
ကလံၤစိးကီၢ်ခိရံယါအပှၤသုးဖိလၢ ကဒုးစၢၤရှၢးရှၢၣ်သုးမုၢ်ဒိၣ် အနီၣ်ဂံၢ်နီၣ်ဒွးဟဲအါထီၣ်ဘၣ်ဆၣ် ထံကီၢ်လၢဒီသိၣ်မှံဒီးယူၣ်ကရ့တဖၣ် အတၢ်ခီၣ်ဆၢက့ၤတခီ တဟဲအါထီၣ်ဘၣ်အဂ့ၢ် ဘလၣ်တံၣ်မၣ်စလၣ်စကံ တဲလီၤ၀ဲလၢ တၢ်ဂီၤမူပူၤန့ၣ်လီၤ.
ကးဟီၣ်က၀ီၤအပူၤ ယူၣ်ကရ့အပှၤသုးဖိတဖၣ် ဟူးဂဲၤ၀ဲတၢ်ဆၢကတီၢ် အိၣ်ထီၣ် (၃)လါလံဒီး ဟီၣ်က၀ီၤဒိၣ်လၢ အဘူးဒီးကီၢ်စဲၣ်အကပၤတဖၣ် အရ့ဒိၣ်လၢ တၢ်ကပၢၤဃၥ်အီၤစ့ၢ်ကီး စံး၀ဲန့ၣ်လီၤ.
အမဲရကၤတခီ ဘၣ်ယိၣ်ဘၣ်ဘှီဒိၣ်ဒိၣ်မုၢ်မုၢ် လၢကလံၤစိးဒီးရှၢးရှၢၣ်ထံကီၢ်အဘၢၣ်စၢၤ တၢ်ရ့လိၥ်ဘၣ်ထွဲအဖီခိၣ် ဒီး ကလံၤစိးကီၢ်ခိရံယါအပှၤသုးဖိ(၁,၁၀၀၀)ဘျဲၣ် လဲၤတုၤဆူကးဟီၣ်က၀ီၤပူၤလံအဂ့ၢ် ဒီး လၢစှၤသီအတီၢ်ပူၤ နုၥ်လီၤဆူတၢ်ဒုးအပူၤသ့အဂ့ၢ် အမဲရကၤထံဂုၤကီၢ်ဂၤ၀ဲၤကျိၤ ပှၤကတိၤတၢ်ပၢ မဲးသရူမ့းလၣ် တဲလီၤ၀ဲဖဲ လါနိၣ်၀့ဘၢၣ်(၄)သီအနံၤန့ၣ်လီၤ.
ထံကီၢ်(၂)ဘ့ၣ်အဘၢၣ်စၢၤ ဆဲးလီၤ၀ဲ ထံကီၢ်(၂)ဘ့ၣ်ခံခီယၢ်ဘး ကဒီသဒၢလိၥ်သး လံၥ်ဃံးဃၥ်တခါ ဖဲအပူၤကွံၥ်လါယူၤလံၤလံၤ ဒီး ရှၢးရှၢၣ်ကီၢ်ခိၣ်ပူၣ်တ့ၣ်တခီ တဂ့ၢ်လိၥ်, တပၥ်ဂၢၢ်ပၥ်ကျၢၤ၀ဲ ကလံၤစိးကီၢ်ခိရံယါသုး အဟဲဆီၣ်လီၤသးအဖီခိၣ်ဘၣ်.
ကီၢ်ရှၢးရှၢၣ်န့ၣ် ကွၢ်ဖဲကစၢ်တၢ်ဘၣ်သးအဖီခိၣ် မၤဖျါထီၣ်အမိၢ်လံမိၢ်ပှၢ်လၢတၢ်သဘျ့ပူၤ လၢ တၢ်အၢၣ်လီၤလံၥ်ဃံးဃၥ်အံၤသ့အဂ့ၢ် တဲလီၤ၀ဲန့ၣ်လီၤ.
မ့မ့ၢ်လၢ ပ့ၣ်တကိၣ်သုး၀ဲၤလီၢ်ခိၣ်သ့ၣ်တခီ ကလံၤစိးကီၢ်ခိရံယါအပှၤသုးဖိ(၁,၁၀၀၀)ဘျဲၣ် ဟဲတုၤအိၣ်လၢကီၢ်ရှၢးရှၢၣ်, ကးဟီၣ်က၀ီၤပူၤဘၣ်ဆၣ် နုၥ်လီၤဒုးတၢ်လၢတၢ်ဒုးပူၤတၢ်ကစီၣ်တခီ ပၥ်ဂၢၤပၥ်ကျၢၤ၀ဲတန့ၢ်ဒံးဘၣ်အဂ့ၢ် တဲလီၤ၀ဲဖဲ လါနိၣ်၀့ဘၢၣ်(၄)သီအနံၤန့ၣ်လီၤ.
Source : Reuters
