လါနိၣ်၀့ဘၢၣ်(၆)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၅), ကီၢ်ရ့ၣ်မုၢ်တြီၢ်ဟီၣ်က၀ီၤအပူၤ စးထီၣ်လၢလါအီးကထိဘၢၣ်(၁)သီတုၤ(၃၁)သီအနံၤ (၁)လါအတီၢ်ပူၤ တၢ်ဒုးကဲထီၣ်တ့ၢ်သးလၢ KNLAသုးပၥ်ဖှိၣ်ဒီး သုးကီၣ်ကးအဘၢၣ်စၢၤ အိၣ်ထီၣ်၀ဲ(၁၃၆)ဘျီ၀ံၤ သုးကီၣ်ကးအသုးဘၣ်သံ(၂၉)ဂၤဒီးဘၣ်ဒိ(၃၀)ဂၤအဂ့ၢ် ခ့ၣ်အဲၣ်ယူၣ်-မုၢ်တြီၢ်ပၥ်ဖျါဃၥ်၀ဲန့ၣ်လီၤ.
(၁)လါအတီၢ်ပူၤ , တၢ်ဒုးတဖၣ်အပူၤ ပယီၤသုးကီၣ်ကးအသုးလၢသံတ့ၢ်တဖၣ်အကျါ ပၥ်ဃုၥ်၀ဲသုးရ့ၣ်ခိၣ်(၁)ဂၤ, သုးရ့ၣ်ခိၣ်ခံ(၁)ဂၤ ဒီး ဘၣ်ဒိအကျါပၥ်ဃုၥ်၀ဲ သုးဒ့ခိၣ်တဂၤအဂ့ၢ် ပၥ်ဖျါဃၥ်၀ဲန့ၣ်လီၤ. တၢ်ဒုးတဖၣ်အပူၤ တၢ်မၤဟးဂီၤကွံၥ် သုးကီၣ်ကးအတၢ်သူၣ်ထီၣ်(၁၉)ဖျၢၣ်ဒီးသိလ့ၣ်(၁)ခိၣ်န့ၣ်လီၤ.
တကးဘၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ် သုးကီၣ်ကးခီပူးသုးကလၢၤ ဖဲလါအီးကထိဘၢၣ်(၂၉)သီအနံၤ,ဂီၤအဆၢကတီၢ် န့ၣ်လီၤ.
တၢ်ဒုးကဲထီၣ်သး ခံခီခံကပၤအပူၤ သုးကီၣ်ကးတပၤ သူ၀ဲကလံၤကျါတၢ်ဒုးတဖၣ်မ့ၢ်ဂ့ၤ ဒီး ဟဲဆှၢန့ၢ် အပှၤသုးဖိလၢအိၣ်လၢတၢ်မဲၥ်ညါတဖၣ်တၢ်အီၣ်လၢ ကဘီယူၤအိၣ်၀ဲထီဘိအဂ့ၢ် စံး၀ဲန့ၣ်လီၤ.
တလါအတီၢ်ပူၤ သုးကီၣ်ကးဟဲခးလီၤတၢ်လၢကဘီယူၤမ့ၢ်ဂ့ၤ, ဟဲတ့ၢ်လီၤမ့ၣ်ပိၢ်လၢကဘီယူၤမ့ၢ်ဂ့ၤ ခဲလၢၥ်အိၣ်၀ဲ(၃၆၉)ဖျၢၣ် ဒီး ခးလီၤစ့ၢ်ကီးကျိဖးဒိၣ်(၄၄)ဖျၢၣ်ဆူ ကမျၢၢ်ဒူသ၀ီအိၣ်ဆိးလီၢ်ကျဲတဖၣ်အပူၤအဃိ ဘၣ်သံ၀ဲကမျၢၢ်(၃)ဂၤဒီး ဘၣ်ဒိ၀ဲ(၅)ဂၤန့ၣ်လီၤ.
လၢန့ၣ်အမဲၥ်ညါ ဘၣ်ဟးဂီၤကွံၥ်၀ဲစ့ၢ်ကီး ဟံၣ်ဃီတၢ်သူၣ်ထီၣ်တဖၣ်လၢအမ့ၢ် ဒၢး(၉)ဖျၢၣ်, တၢ်ဘါယွၤကၠိဘျီၣ်ဒိၣ်(၁)ဖျၢၣ်, ကၠိတၢ်အီၣ်မ့ၤလီၢ်(၁)ဖျၢၣ်, တီၤဘျီကၠိ(၁)ဖျၢၣ်, တီၤကၠိ(၁)ဖျၢၣ်, ဟံၣ်ဒွဲ(၁)ဖျၢၣ် ဒီး တကတီၢ်ဃီ ဘၣ်ဟးဂီၤကွံၥ်၀ဲစ့ၢ်ကီး ကမျၢၢ်ဖံးအီၣ်မၤအီၣ်လီၢ်ကျဲတဖၣ်လၢအမ့ၢ် စံၥ်လီၢ်ခုးလီၢ်, ကျီးတဖၣ်ဒီးတၢ်ထူၣ်တၢ်ဘိလၢတၢ်အီၣ်အီၤသ့တဖၣ်အါမးအဂ့ၢ် ခ့ၣ်အဲၣ်ယူၣ်-မုၢ်တြီၢ် ပၥ်ဖျါဃၥ်၀ဲန့လီၤ.
