လါနိၣ်၀့ဘၢၣ်(၆)သီ,၂၀၂၄နံၣ်
ရခၢၣ်ကီၫ်စဲၣ်,ကီၫ်ဆၣ်ကွးအပူၤ သုးကီၣ်ကးဒီးရခၢၣ်သုးမုၫ်ဒိၣ်(AA)တၫ်ဒုးတဖၣ်အဃိ ကမျၢၫ် (၁)ကလးတခီဂၤ ဘၣ်ဃ့ၫ်ပူၤဖျဲးအသး၀ံၤ လိၣ်ဘၣ်ကသံၣ်ကသီဒီးတၫ်အီၣ်တၫ်အီတဖၣ်အဂ့ၫ် ကီၫ်ဆၣ်ကွး တၫ်ကရၢကရိလၢမၤစၢၤ ပှၤလီၫ်အိၣ်ကမှံတဖၣ်တဲ၀ဲလီၤ.
“ကီၫ်ဆၣ်ကွး ပှၤလီၫ်အိၣ်ကမှံ အိၣ်(၁)ကလးတခီဃၣ်ဃၣ်လီၤ. ပှၤအိၣ်ကဒုလၢဒဲက၀ီၤပူၤဒီးလၢဒဲက၀ီၤအချၢတဖၣ် အိၣ်၀ဲလီၤ.ပှၤလီၫ်အိၣ်ကမှံဖိတဖၣ်အဂီၫ် တၫ်ကီတၫ်ခဲန့ၣ်မ့ၫ်ဒၣ် ကသံၣ်ကသီဒီးတၫ်အီၣ်တၫ်အတဖၣ်န့ၣ်လီၤ. မ့ၫ်တၫ် အရ့ဒိၣ်လၢလိၣ်ဘၣ်၀ဲလီၤ.လၢကီၫ်ဆၣ်ကွးအပူၤ တချူးတၫ်ဒုးကဲထီၣ်ဒံးဘၣ်အကတီၫ် သုးကီၣ်ကးတကပၤ ပာ်ပနီၣ် ဃာ် တၫ်စိၣ်ဆှၢဒီးတၫ်ရၤလီၤဆါတဖၣ်အဃိ လၢကတီၫ်အံၤ ပှၤလီၫ်အိၣ်ကမှံတဖၣ် ကွၫ်ဆၢၣ်မဲာ်ဘၣ် ကသံၣ်ကသီ တလၢတလီၫ်ဒီးတၫ်အီၣ်တၫ်အီတၫ်ဂ့ၫ်ကီတဖၣ်အဂ့ၫ်”ကီၫ်ဆၣ်ကွး တၫ်ကရၢကရိလၢမၤစၢၤ ပှၤလီၫ်အိၣ်ကမှံ ပှၤဘၣ်မူဘၣ်ဒါတဂၤ တဲ၀ဲန့ၣ်လီၤ.
သုးကီၣ်ကးဒီးAAအဘၢၣ်စၢၤ တၫ်ဒုးကဲထီၣ် ဖဲတဲၣ်ကၠိသ၀ီကပၤ ဆါခၠဲးကၠံ, ဆါခၠဲးလ့အကပၤဒီး တၫ်ဒုးဆူၣ်ထီၣ်တပယူာ်ဃီအဃိ ပှၤလီၫ်အိၣ်ကမှံဖိစ့ၫ်ကီး အနီၫ်ဂံၫ်နီၫ်ဒွး ဟဲအိၣ်အါထီၣ်၀ဲ န့ၣ်လီၤ.
စးထီၣ်ဖဲလါအီးကထိဘၢၣ်(၃)သီနံၤ ကီၫ်ဆၣ်ကွးအပူၤ တၫ်ဒုးဆူၣ်ထီၣ်အဃိ လီၫ်က၀ီၤကမျၢၫ် ဘၣ်ဃ့ၫ်ပူၤဖျဲးအသး န့ၣ်လီၤ.
လၢကီၫ်ဆၣ်ကွးအပူၤ တချူးတၫ်ဒုးကဲထီၣ်ဒံးဘၣ်အကတီၫ် ပှၤလၢကျိာ်စ့အိၣ်တဖၣ် လဲၤသုးအသးဆူ ၀့ၫ်တကူၣ်, အ့ၣ်ယၣ်၀တံၣ်အိၣ်၀ဲ၀ံၤ ပှၤလၢကျိာ်စ့တအိၣ်ဘၣ်တခီ တၫ်ဒုးကဲထီၣ်၀ံၤအလီၫ်ခံ လဲၤအိၣ်ကးဒုဖဲ ရခၢၣ်သုးမုၫ်ဒိၣ် (AA)တၫ်ပၢဟီၣ်က၀ီၤပူၤန့ၣ်လီၤ.
ရခၢၣ်သုးမုၣ်ဒိၣ်(AA)န့ၣ် ခၠီကီၫ်စဲၣ်,ကီၫ်ဆၣ်ပလဲး၀းပာ်ဃုာ် ရခၢၣ်ကီၫ်စဲၣ်ပူၤ ကီၫ်ဆၣ်(၉)ဘ့ၣ်ဒီး ကီၫ်ဆၣ်အဒ့ဒ်သိးဒီး တီၣ်ပၠိၣ်လဲး၀ဲ,မအံၣ်,ကါထီကၠံဒီးကၠ့ၣ်တလံၣ်တဖၣ် ပၢဆှၢဃာ်၀ဲန့ၣ်လီၤ.
Ref: RFA
