လါနိၣ်၀့ဘၢၣ်(၅)သီ,၂၀၂၄နံၣ်
ဒံၣ်ကၠံးတဲၣ်အိၣ်လဲတၢ်လံၣ်တၢ်လီကျိၥ်စ့ ဟဲအိၣ်အါထီၣ် ဖဲကီၢ်အ့ဒံယါ၀ံၤ ကတီၢ်ခဲအံၤတခီ ထံလီၢ်ကီၢ်ပူၤတခီ ကီၢ်ပယီၤပၥ်ဃုၥ် ခၣ်ဘီဒံယါ, ဘံၣ်ယဲးနၣ်,လၣ်အိၣ်ဒီး ကၠီၣ်တဲၣ် အ့ရှၢၣ်မုၢ်ထီၣ်ထံကီၢ်တဖၣ် တၢ်ပၥ်ပနီၣ်ဃၥ်အီၤ ဒ်တၢ်လံၣ်တၢ်လီတၢ်ပညိၣ်အလီၢ်အသိးအဂ့ၢ် India Todayတၢ်ကစီၣ်ပၥ်ဖျါဃၥ်၀ဲန့ၣ်လီၤ.
တၢ်ကစီၣ်သန့အတၢ်ဃိထံၣ်သ့ၣ်ညါအဖီခိၣ် ပှၤကူလဲၢ်မၤကၤတဖၣ် တဲ၀ဲလၢ တၢ်ကဟ့ၣ်ပှၤကီၢ်အ့ဒံယါဖိတဖၣ် တၢ်ဖံးတၢ်မၤ၀ံၤတၢ်မၢလဲၤဆူကီၢ်ခၣ်ဘီဒံယါ၀ံၤအလီၢ်ခံတၢ်မၢန့ၢ်ဆူၣ်အီၤဖဲအိၣ်လဲတၢ်လံၣ်တၢ်လီကဲဒီးဆဲၣ်ဘၢၣ်ကွီၢ်မ့ၣ်တၢ်ဖံးတၢ်မၤတဖၣ်ပူၤအဂ့ၢ် စံး၀ဲန့ၣ်လီၤ.
ကီၢ်အ့ဒံယါမီၢ်သီ၀ဲၤဒၢးဘၣ်ထွဲကီၢ်ခၣ်ဘီဒံယါစ့ၢ်ကီး ဟ့ၣ်ကူၣ်ဘိးဘၣ်ရၤလီၤဃၥ် အထံကီၢ်ဖိလၢ အဃုတၢ်ဖံးတၢ်မၤတဖၣ်အဂီၢ်၀ံၤ တၢ်သုတလဲၤဃုဖံးဃုမၤတၢ်ဒီး တၢ်ဟးကသုၣ်ဘံၣ်စၣ် ဆူ ကီၢ်ခၣ်ဘီဒံယါအဂ့ၢ် ဆီၣ်တခူထီၣ်ဃၥ်၀ဲန့ၣ်လီၤ.
“တဲလံၣ်လီ၀ဲလၢ တၢ်ကဟ့ၣ်တၢ်ဖံးတၢ်မၤလၢတၢ်ဘၣ်ဘျူးအိၣ်အါ လၢကီၢ်ခၣ်ဘီဒံယါ၀ံၤ ပှၤကီၢ်အ့ဒံယါဖိတဖၣ် လဲၤနုၥ်လီၤဆူ ပှၤကူလဲၢ်မၤကၤကဲတဖၣ် အတၢ်လံၣ်တၢ်လီအပူၤန့ၣ်လီၤ. ပှၤကီၢ်အ့ဒံယါဖိတဖၣ်လၢ ဘၣ်တၢ်လံၣ်လီအီၤတဖၣ်တၢ်ဟ့ၣ်ဆီၣ်သနံးအီၤဒ်ကမၤတၢ်လၢအိၣ်လဲတၢ်လံၣ်တၢ်လီတၢ်မၤတဖၣ်ဒီးတဖိးသဲစးတၢ်ဖံးတၢ်မၤတဖၣ်အပူၤ” န့ၣ်လီၤ.
ကတီၢ်ခဲအံၤတခီ ဒံၣ်ကၠံးတဲၣ်ပှၤလံၣ်လီတၢ်တဖၣ် IPDRs(Internet Protocol Detail Record)အဖီခိၣ် တၢ်ထံၣ်န့ၢ်၀ဲ အတၢ်အိၣ်သူၣ်လီၢ်တဖၣ်လၢ ကီၢ်ခၣ်ဘီဒံယါ, ကီၢ်ပယီၤဒီးကီၢ်ဘဲၣ်ယဲးနၣ်တဖၣ်အပူၤ၀ံၤ ကျိၥ်စ့လံၣ်လီၤန့ၢ်တဖၣ် က့ၤထုးထီၣ်၀ဲ ဖဲဒူၣ်ဘဲဒီးကီၢ်ဘံၣ်ယဲးနၣ် ATMစဲးတဖၣ်အဂ့ၢ် တၢ်ထံၣ်န့ၢ်၀ဲအဂ့ၢ် တၢ်ကစီၣ်ပၥ်ဖျါဃၥ်၀ဲန့ၣ်လီၤ.
ဖဲကီၢ်ခၣ်ဘီဒံယါ, ကီၢ်ပယီၤဒီးကီၢ်ဘံၣ်ယဲးနၣ်ပူၤ ပှၤမၤကမၣ် ဆဲၣ်ဘၢၣ်ကွီၢ်မ့ၣ် အအ့ကၠၢၣ်တဖၣ်အဂီၢ် မၣ်လိၣ်န့ၢ်၀ဲ အ့ဒံယါဆ့ကးတဖၣ်၀ံၤ ဆှၢဃၥ်ဆ့ကး(၄၅,၀၀၀)ဆူ ကီၢ်ခၣ်ဘီဒံယါဒီးကီၢ်ပယီၤအဂ့ၢ် တၢ်ဃုန့ၢ်အီၤ၀ံၤအလီၢ်ခံ ကီၢ်အ့ဒံယါကးတံၥ်ကွံၥ် ဆ့ကးတဖၣ်လံအဂ့ၢ် စံး၀ဲန့ၣ်လီၤ.
ဖဲအပူၤကွံၥ် လါမးရှးအတီၢ်ပူၤစ့ၢ်ကီး တၢ်ဖီၣ်န့ၢ်၀ဲ M2Mဆ့ကးလီၤဆီ (၃)ကထိလၢ တၢ်ကသူအီၤဖဲအိၣ်လဲတၢ်လံၣ်တၢ်လီကျိၥ်စ့တၢ်ဖံးတၢ်မၤတဖၣ်အပူၤန့ၣ်လီၤ.
ကီၢ်အ့ဒံယါ ထံလီၢ်ကီၢ်ပူၤကိတိၥ်၀ဲၤကျိၤ တၢ်ကစီၣ်ဂံၢ်ထံးတဖၣ်တခီ ပှၤလံၣ်လီတၢ်တဖၣ် လံၣ်၀ဲ ဒံၣ်ကၠံးတဲၣ်အပူၤ ကိးမုၢ်နံၤ စ့ရူၣ်ပံၣ်အကကွဲၢ်(၆၀)အဂ့ၢ် ဒီး တနံၣ်အံၤ အဆိကတၢၢ်(၁၀)လါအတီၢ်ပူၤ လံၣ်န့ၢ်၀ဲ စ့ရူၣ်ပံၣ်(၂,၁၀၀)ဘီဘျဲၣ်အဂ့ၢ် စံး၀ဲန့ၣ်လီၤ.
Ref:DVB
