လါနိၣ်၀့ဘၢၣ်(၅)သီ,၂၀၂၄နံၣ်
ဖဲ၂၀၂၄နံၣ်, လါနိၣ်၀့ဘၢၣ်(၁)သီအနံၤ, ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤ, လၢၢ်ဒိၣ်ကီၢ်ဆၣ်အပူၤ တၢ်ဒုးကဲထီၣ်သးလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ်ဒီးသုးကီၣ်ကးအဘၢၣ်စၢၤအဃိ သုးကီၣ်ကးအပှၤသုးဖိဘၣ်သံ၀ဲ(၁၃)ဂၤဒီးတၢ်ဖီန့ၢ်မူဒံး(၁၅)ဂၤအဂ့ၢ် ဒီကလုၥ်ဃူဖိးပဒိၣ်,တၢ်ဒီသဒၢ၀ဲၤကျိၤ, ကလံၤထံးကီၢ်ခီသုးဟီၣ်က၀ီၤ ထုးထီၣ်ပၥ်ဖျါဃၥ်၀ဲန့ၣ်လီၤ.
တၢ်ပၢၢ်ဆၢသုးပၥ်ဖှိၣ်ဒီးသုးကီၣ်ကးအဘၢၣ်စၢၤ တၢ်ဒုးကဲထီၣ်တ့ၢ်သး ဖဲလၢၢ်တြဲၤကီၢ်ဆၣ်,ဆ့ၣ်ယိခ့ၣ်သ၀ီဒီး မူကီၢ်ဆၣ် ယွၣ်ကၠံအ့သ၀ီအကပၤအဂ့ၢ် တၢ်သ့ၣ်ညါဘၣ်န့ၣ်လီၤ.
(KNLA)သုးရ့ၣ်(၉),သိၣ်ဒူလီၤဆီရိမးသုးရ့ၣ်(၂)သုးကျိၤဒီးကလံၤထံးသုးဟီၣ်က၀ီၤ,နီၣ်ဂံၢ်(၂)သုးဟီၣ်က၀ီၤအဒ့,သုးရ့ၣ် (၃၇၀၂)သုးပၥ်ဖှိၣ်တဖၣ် လဲၤဒုး၀ဲ သုးကီၣ်ကးအသုးလၢအိၣ်ဆီလီၤအသး ဖဲဆ့ၣ်ယိခ့ၣ်သ၀ီအဂ့ၢ် ကလံၤထံးသုးဟီၣ်က၀ီၤထုးထီၣ်ပၥ်ဖျါဃၥ်၀ဲဖဲလါနိၣ်၀့ဘၢၣ်(၄)သီအနံၤန့ၣ်လီၤ.
တၢ်ဒုးအပူၤသုးကီၣ်ကးအပှၤသုးဖိသံ(၃)ဂၤ၀ံၤတၢ်မၤန့ၢ်စ့ၢ်ကီးG3ကျိတခိၣ်,ကျိချံ(၁၇၄)ဖျၢၣ်ဒီးကျိချံပှၥ်သၣ်တနီၤအဂ့ၢ် စံး၀ဲန့ၣ်လီၤ. တၢ်ဒုးကဲထီၣ်သး၀ံၤအလီၢ်ခံ သုးကီၣ်ကးခးလီၤကျိဖးဒိၣ်ဆူ ဆ့ၣ်ယိခ့ၣ်သ၀ီပူၤအဃိ လီၢ်က၀ီၤကမျၢၢ်ဘၣ်ဒိ၀ဲ(၂)ဂၤန့ၣ်လီၤ.
တၢ်ဒုးကဲထီၣ်သးလၢ လၢၢ်ဒိၣ်ကီၢ်ဆၣ်, ယွၣ်ကၠံအ့ၣ်သ၀ီအကပၤတၢ်ကစီၣ်တခီ ကလံၤထံးကီၢ်ခီသုးဟီၣ်က၀ီၤ ဘိးဘၣ်ရၤလီၤဃၥ်၀ဲ ဖဲလါနိၣ်၀့ဘၢၣ်(၂)သီအနံၤန့ၣ်လီၤ.
ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA), ကလံၤထံးသုးဟီၣ်က၀ီၤ,နီၣ်ဂံၢ်(၂)သုးဟီၣ်က၀ီၤအဒ့, P2-7803 ရိမးသုးကျိၤ(၁), သိၣ်ဒူလီၤဆီသုးရ့ၣ် P2-9914 ရိမးသုးကျိၤ(၂) ဒီးဖၠူကမျၢၢ်တၢ်ဒီသဒၢသုးတဖၣ် ပၥ်ဖှိၣ်ဒုး၀ဲ သုးကီၣ်ကးအသုးလၢ ဟဲနုၥ်ဖဲယွၣ်ကၠံအ့သ၀ီအခိၣ်ထီး, ကၠိဃိၣ်တပၤအဂ့ၢ် ထုးထီၣ်ပၥ်ဖျါဃၥ်၀ဲန့ၣ်လီၤ. ခံခီခံကပၤတၢ်ဒုးအပူၤ သုးကီၣ်ကးအပှၤသုးဖိဘၣ်သံ၀ဲ(၁၀)ဂၤ၀ံၤ ဘၣ်ဒိ၀ဲ(၁၅)ဂၤအဂ့ၢ် စံး၀ဲန့ၣ်လီၤ.
တၢ်ဒုးကဲထီၣ်သး၀ံၤအလီၢ်ခံ သုးကီၣ်ကးတပၤ ဟဲကွၢ်ဟုၣ်ကွၢ်စုၣ်တၢ်လၢကလံၤကျါအသိး ခးလီၤကျိဖးဒိၣ်တဖၣ် အိၣ်ထီၣ်၀ဲတဘိယူၥ်ဃီအဂ့ၢ် လီၢ်က၀ီၤကမျၢၢ်တဖၣ် စံး၀ဲန့ၣ်လီၤ.
