လါနိၣ်၀့ဘၢၣ်(၅)သီ,၂၀၂၄နံၣ်
KNUသုးက့နီၫ်ဂံၫ်(၇) မၤနၢၤပျီဟီၣ်က၀ီၤအပူၤ ကဆီ၀ါလ့သုးကလၢၤ သုးဖိလၢအိၣ်ဆီလီၤဃာ်အသးတဖၣ် KNLA သုးပာ်ဖှိၣ်တဖၣ် လဲၤခးအီၤကိးမုၫ်နံၤဒဲးအဃိ ဖဲလါနိၣ်၀့ဘၢၣ်(၁)သီအနံၤန့ၣ် ပာ်တ့ၫ်ကွံာ်သုးကလၢၤ ဃ့ၫ်ဟးထီၣ်ကွံာ်အဂ့ၫ် KNLA ဂ့ၫ်ခီၣ်ထံးတၫ်ကစီၣ်တဲ၀ဲန့ၣ်လီၤ.
သုးကလၢၤအံၤ တၫ်ပၢၫ်ဆၢသုးပာ်ဖှိၣ်တဖၣ် လဲၤခးအီၤလၢစုဘျၢ,ဒြိဒီး တၫ်ဒုးစဲာ်ပြဲးတလီၫ်လီၫ်အဂ့ၫ်တဲ၀ဲလီၤ.
သုးဖိလၢဃ့ၫ်ဟးထီၣ်လၢသုးကလၢၤအံၤ လဲၤပာ်ဖှိၣ်ထီၣ်က့ၤသးဒီး သုးကီၣ်ကးအ ၉၁၃ နိၣ်ဒ့သုးကလၢၤအဂ့ၫ် ဂ့ၫ်ခီၣ်ထံးတၫ်ကစီၣ်တဲ၀ဲလီၤ.
လၢကတီၫ်အံၤ သုးကီၣ်ကးအသုးဖိလၢအိၣ်ဖဲ နီၫ်ဂံၫ် ၉၁၃ သုးကလၢၤတဖၣ် တၫ်ဆဲးကျိးအီၤလၢ ကပာ်ဖှိၣ်မၤသကိး တၫ်ဒီးKNLAဘၣ်ဆၣ် တတူၫ်လိာ်၀ဲဘၣ်အဂ့ၫ် ပှၤလၢအိၣ်ဘူးဒီး KNLAသုးဖိတဖၣ်တဲ၀ဲလီၤ.
ကတီၫ်အံၤ KNU သုးက့နီၫ်ဂံၫ်(၇) ဟီၣ်က၀ီၤ နိၣ်ဒ့သုးကလၢၤ တၫ်ပၢၫ်ဆၢသုးပာ်ဖှိၣ်တဖၣ် က၀ီၤကးတံာ်ဃာ်အီၤအဃိ ကဲထီၣ်တၫ်ဂ့ၫ်ကီလၢ သုးကီၣ်ကးအဆှၢ တၫ်အီၣ်တၫ်အီအဂီၫ်အဂ့ၫ် တဲ၀ဲန့ၣ်လီၤ.
