လါနိၣ်၀့ဘၢၣ်(၁)သီ,၂၀၂၄နံၣ်
စးထီၣ်လၢလါစဲးပထ့ဘၢၣ်(၂၅)သီအနံၤန့ၣ် ကရ့ၣ်နံၣ်တၢ်ဘၢၣ်စၢၤပၢပြးကီၣ်ကး(IEC) ဘိးဘၣ်ရၤလီၤ၀ဲလၢ တၢ်ကဟံးန့ၢ်ဂ့ၢ်၀ီတုၤလီၤတီၤလိၤ ပှၤလၢလိၥ်ကွဲအိၣ်လဲတၢ်တၤကျိၥ်တၤစ့ဖိတဖၣ်၀ံၤအလီၢ်ခံ မၤဃံးထီၣ်၀ဲတၢ်သမံသမိးတဖၣ်အဂ့ၢ် (IEC)နဲၣ်ရွဲၣ်သဃဲၤ(၂)-အူပညါခိၣ်အီၣ် တဲ၀ဲန့ၣ်လီၤ.
“ပတၢ်လဲၤကျဲသနူန့ၣ် ကလဲၤတၢ်ကယီကယီလီၤ. အဆိန့ၣ် ပထုးထီၣ်လံၥ်လီၤ. ဒ်သိးပှၤအါဂၤကသ့ၣ်ညါအဂီၢ် တၢ်ဟ့ၣ်တၢ်သ့ၣ်ညါနၢၢ်ပၢၢ်တဖၣ်လီၤ. ၀ံၤအလီၢ်ခံမး တၢ်နုၥ်လီၤသမံးသမိးအိၣ်ထီၣ်လၢ တၢ်လီၢ်တနီၤအပူၤလံအဂ့ၢ်” အ၀ဲစံး၀ဲန့ၣ်လီၤ.
တၢ်ဟံးန့ၢ်ဂ့ၢ်၀ီအပူၤ တၢ်နုၥ်လီၤသမံသမိး ကျးတဖၣ်လၢ အသူစတါလ့းလၢ ကီၢ်စဲၣ်ဒီတဘ့ၣ်အပူၤအလီၢ် တၢ်မၤ၀ဲ တၢ်သမံးတၢ်သမိးကယီကယီတဖၣ်, တၢ်မၤဃံးထီၣ်တဖၣ် ဒီး တၢ်ဟ့ၣ်ပလီၢ်တဖၣ်၀ံၤ ဘၣ်ပၥ်ဖှိၣ်မၤသကိးတၢ်ဒီး ကီၢ်ဆၣ်ပၢပြးကမံးတံၥ်ဒီးသိၣ်ဒူလီၤဆီ(special force)တဖၣ်အဃိ ဘၣ်ဟံးတၢ်ဆၢကတီၢ်န့ၣ်လီၤ.
“ပကသူတၢ်စုဆူၣ်ခီၣ်တကးအကျိၤအကျဲန့ၣ်တဂ့ၤဘၣ်. တဂၤတပၤစ့ၢ်ကီး တၢ်မၤကစၢ်တဖၣ် တကးဘၣ် လီၤဆီဒၣ်တၢ် တၢ်ဟ့ၣ်ပလီၢ်, တၢ်လဲၤစံးကတိၤ, တၢ်လဲၤတဲနၢၢ်ပၢၢ်ဃၥ် ပှၤလၢန့ၢ်ပၢ စတါလ့း တၢ်မၤကစၢ်တဖၣ်”အဂ့ၢ် အူပညါခိၣ်အီၣ် တဲ၀ဲန့ၣ်လီၤ.
ကရ့ၣ်နံၣ်ကီၢ်စဲၣ်ပူၤ ပှၤလၢအလိၥ်ကွဲ အိၣ်လဲတၢ်တၤကျိၥ်တၤစ့တဖၣ်အပူၤ ပၥ်ဃုၥ်၀ဲ ပှၤပိၥ်ခွါအါတက့ၢ် ဒီး ပိၥ်မုၣ်တနီၤ၀ံၤ ခီဖျိအိၣ်လဲတၢ်လိၥ်ခိၣ်လိၥ်ကွဲတဖၣ်အဃိ ပှၤလၢဒ့ၣ်ကမၢ်ထီၣ်တဖၣ်အိၣ်၀ဲအသိး တၢ်ပၢၢ်ဆၢသိၣ်ဒူတဖၣ်စ့ၢ်ကီး တၢ်လိၥ်ကွဲအိၣ်လဲတၢ်လိၥ်ခိၣ်လိၥ်ကွဲတဖၣ် ဟဲအိၣ်ထီၣ်၀ဲအဂ့ၢ်န့ၣ်လီၤ.
“တၢ်အံၤ တမ့ၢ်လၢအစးထီၣ်ကဲထီၣ်လၢခဲအံၤဘၣ်. ယံၤလံအဃိ ပတြီအီၤတန့ၢ်ဘၣ်. ပၢၤအီၤတန့ၢ်ဘၣ်. ဘၣ်တြီအီၤဘၣ်ဆၣ် တၢ်ဟံးထီၣ်ဖီၣ်ထီၣ် ဆူၣ်ဆူၣ်ကိၢ်ကိၢ်တဘျီဃီတန့ၢ်ဘၣ်. ပဘၣ်ဆိကမိၣ်ဒံး လၢသူတဘၣ်ဒိက့ၤ ပ၀ဲပှၤတ၀ၢမုၥ်ကျိၤ၀ဲၤကွၢ်အဂီၢ်” အဂ့ၢ် အ၀ဲတဲပှဲၤအါထီၣ်၀ဲန့ၣ်လီၤ.
၂၀၂၄နံၣ်, လါစဲးပထ့ဘၢၣ်(၄)သီအနံၤန့ၣ် ကရ့ၣ်နံၣ်တၢ်ဘၢၣ်စၢၤပၢပြးကီၣ်ကး(IEC) ထုးထီၣ်ပၥ်ဖျါဃၥ်၀ဲလၢ တၢ်ပၥ်လီၤ၀ဲသဲစးတၢ်ဘျၢတၢ်ဒိၣ်စိတၢ်တိၥ်ကျဲၤလၢ ဒ်သိးသဲစးတၢ်ဘျၢတၢ်ဒိၣ်စိဂ့ၢ်၀ီ, တၢ်ဂၢၤတၢ်ကျၢၤဒီး တၢ်ပၢၢ်ဆၢအဂံၢ်ကဆူၣ်အဂီၢ် ၀ံၤ လၢတၢ်တိၥ်ကျဲၤအပူၤ ကသံၣ်မူၤဘှီး, တၢ်ဖံးတၢ်မၤလၢတဖိးမံလိၥ်သးဒီးပှၤကညီလုၢ်လၢ်သကဲၥ်ပ၀းတဖၣ် ဒီး တၢ်မၤ တၢ်ဆါတၢ်ပှ့ၤတဖိးသဲစးစုက၀ဲၤတဖၣ်ပၥ်ဃုၥ်၀ံၤ တၢ်မ့ၢ်တလူၤပိၥ်မၤထွဲဘၣ်န့ၣ် တၢ်ကဟံးဂ့ၢ်၀ီအဂ့ၢ်န့ၣ်လီၤ.
Ref: Federal FM
