လါနိၣ်၀့ဘၢၣ်(၁)သီ,၂၀၂၄နံၣ်
ကီၫ်ကၠီၣ်တဲၣ်ပူၤ ပှၤလၢသုးလီၫ်သုးကျဲဟဲအိၣ်ဆိးလၢ၁၉၈၄နံၣ်ဒီးဖိသၣ်လၢအိၣ်ဖျဲၣ်ထီၣ်ဖဲကီၫ်ကၠီၣ်တဲၣ်ပူၤ (၄၈၃,၀၀၀ ဂၤ)ဃၣ်ဃၣ် တၫ်ဟ့ၣ်ခွဲးယာ်လၢကကဲထီၣ်ဘၣ် ကၠီၣ်တဲၣ်ထံဖိကီၫ်ဖိအဂီၫ် ဖဲလါအီးကထိဘၢၣ် (၃၀)သီအနံၤန့ၣ် ကၠီၣ်တဲၣ်ပဒိၣ် ဆၢတဲာ်လီၤ၀ဲလီၤ.
ဖိးသဲစး ခီကီၫ်ပှၤမၤတၫ်ဖိတဖၣ်အံၤ မၤတ့ၫ်တၫ်လၢ ကီၫ်ကၠီၣ်တဲၣ်ပူၤ ယံာ်လၢအနံၣ်တဖၣ်အဃိ တၫ်ကြၢးဟ့ၣ်အီၤ ခွဲးယာ်လၢ ကပတံထီၣ်ဘၣ် တၫ်ကဲထီၣ် ကၠီၣ်တဲၣ်ထံဖိကီၫ်ဖိအဂ့ၫ်,တၫ်န့ၣ်အဃိ အ၀ဲသ့ၣ်ကလဲၤထီၣ်က့ၤလီၤ ဘၣ်လၢတၫ်သဘျ့အပူၤတကးဘၣ် ကကဲထီၣ်တၫ်မၤစၢၤလၢ ကၠီၣ်တဲၣ်မုာ်ကျိၤ၀ဲၤကွာ်တၫ်ဂုၤထီၣ်ပသီထီၣ်အဂီၫ် အဂ့ၫ် ကၠီၣ်တဲၣ်ကိတိာ်ခိၣ်ကျၢၫ်၀ဲၤဒၢး ပှၤတဲတၫ်ပၢ Jirayu Huangsaတဲလီၤ၀ဲ ဖဲလါအီးကထိဘၢၣ်(၃၀)သီအနံၤန့ၣ် လီၤ.
ဖဲလါအီးကခိဘၢၣ်(၃၀)သီအနံၤ ပဒိၣ်အတၫ်ဆၢတဲာ်န့ၣ် တၫ်ကဒုးအိၣ်ထီၣ်အမိၫ်လံၤမိၫ်ပှၫ်အဂီၫ် ထံလီၫ်ကီၫ်ပူၤကိတိာ်၀ဲၤကျိၤတကပၤ လၢအသီ(၆၀)အတီၫ်ပူၤ ပပာ်လီၤန့ၫ်၀ဲတၫ်ဘျၢတဖၣ်အဂ့ၫ် တဲ၀ဲလီၤ.
တၫ်ဆၢတဲာ်အံၤအပူၤ အဆိကတၢၫ်တဖုပှၤလၢကန့ၫ်ဘျူးန့ၫ်ဖှိၣ်တဖၣ်မ့ၫ်၀ဲ လၢ၁၉၈၄နံၣ်တုၤ၁၉၉၉နံၣ်အပူၤ ပှၤလၢဟဲနုာ်လီၤအိၣ်ဆိးမၤတၫ်လၢကီၫ်ကၠီၣ်တဲၣ်အပူၤ ခီကီၫ်ပှၤမၤတၫ်ဖိ(၁၂၀,၀၀၀ ဂၤ)ဃၣ်ဃၣ် ပာ်ဃုာ်၀ဲလီၤ.
ခံဖုတဖုန့ၣ်မ့ၫ်၀ဲ ပှၤလၢဟဲနုာ်လီၤအိၣ်ဆိးဖံးမၤလၢကီၫ်ကၠီၣ်တဲၣ်ပူၤ စးထီၣ်ဖဲ၂၀၀၅နံၣ်တုၤ၂၀၁၁နံၣ်အပူၤ ခီကီၫ်ပှၤမၤတၫ်ဖိ(၂၁၅,၀၀၀ ဂၤ)ပာ်ဃုာ်၀ဲလီၤ.
ပှၤသၢဖုတဖုတခီ မ့ၫ်ဖိသၣ်လၢကလုာ်ဒူၣ်မိၫ်ပၫ်ခံဂၤအိၣ်ဖျဲၣ်ထီၣ်အီၤ လၢကီၫ်ကၠီၣ်တဲၣ်ပူၤ (၂၉,၀၀၀ ဂၤ)ဃၣ်ဃၣ်ဒီး လွံၫ်ဖုတဖုန့ၣ်မ့ၫ်၀ဲ မိၫ်ပၫ်လၢတၫ်ဂီၤတၫ်ဖီၣ်တအိၣ် အိၣ်ဖျဲၣ်ထီၣ်ဖိသၣ် (၁၁၃,၀၀၀ ဂၤ)ဃၣ်ဃၣ် ပာ်ဃုာ်၀ဲန့ၣ်လီၤ.
ဘၣ်ဆၣ်သနာ်က့ တၫ်ကကဲထီၣ်ကၠီၣ်တဲၣ်ထံဖိကီၫ်ဖိခွဲးယာ် တၫ်ပတံထီၣ်ခဲလၢာ် တၫ်ကဟံးထီၣ်ဖီၣ်ထီၣ်အဂီၫ် ယံာ်(၄၄)နံၣ်သ့၀ဲအဂ့ၫ် ကိတိာ်ခိၣ်ကျၢၫ်၀ဲၤဒၢး ပှၤတဲတၫ်ပၢတဲ၀ဲလီၤ.
Ref: မောင်း
