လါနိၣ်၀့ဘၢၣ်(၁)သီ,၂၀၂၄နံၣ်
တလၢၤ-ကညီကီၫ်စဲၣ်အဆၢ ဃိၣ်သၢဖျၢၣ်-လၢၫ်ကတံးကျဲဖီခိၣ် အနါကွ့တၫ်တိာ်ကူၣ်ကျဲၤသုးကလၢၤတၫ်ဒုးအဃိ အနါကွ့ဟီၣ်က၀ီၤပူၤ လီၫ်က၀ီၤကမျၢၫ်အါမးဘၣ်ဃ့ၫ်ပူၤဖျဲးသးဒီးလိၣ်ဘၣ်တၫ်မၤစၢၤန့ၣ်လီၤ.
အနါကွ့တၫ်ဒုးအဃိ အနါကွ့သ၀ီပာ်ဃုာ် အကပိာ်ကပၤသ၀ီတဖၣ်အပူၤ ကမျၢၫ်(၂,၅၀၀)ဂၤဘျဲၣ်ဃ့ၫ်ပူၤဖျဲးသးဒီးလဲၤအိၣ်ကဒုလၢပှၤလၢသ့ၣ်ညါ၀ဲတဖၣ်ဒီးလၢပှၫ်ပူၤ အိၣ်လံ(၄)လါဃၣ်ဃၣ်လံန့ၣ်လီၤ.
ပှၤလီၫ်အိၣ်ကမှံဖိအဂီၫ် ကမျၢၫ်တၫ်ကရၢကရိဒီးကမျၢၫ်တဖၣ် ဟ့ၣ်၀ဲတၫ်မၤစၢၤအိၣ်ဘၣ်ဆၣ် တၫ်ဆၢကတီၫ်ယံာ်ထီၣ်အဃိ လိၣ်ဘၣ်တၫ်အီၣ်တၫ်အီဒီးကသံၣ်ကသီတၫ်မၤစၢၤတဖၣ်န့ၣ်လီၤ.
“တၫ်သဘံၣ်သဘုၣ်မ့ၫ်ကဲထီၣ်န့ၣ် ပှၤတူၫ်ဘၣ်တၫ်န့ၣ် မ့ၫ်ကမျၢၫ်လီၤ.ပမ့ၫ်ကွၫ်လၢ ပှၤဂ့ၫ်၀ီခွဲးယာ်တကပၤန့ၣ် တၫ်သ ဘံၣ်သဘုၣ်မ့ၫ်ကဲထီၣ်န့ၣ် ပှၤတဟံးန့ၫ်မူဒါနီတဂၤဘၣ်အဂ့ၫ်” တလၢၤပှၤဂ့ၫ်၀ီခွဲးယာ်ဖီၣ်ဒ့ရှ့ အဖရိၣ်ကရၣ်ဒၣ်ရဲးထၢၣ် နဲၣ်အဲမိၣ် တဲ၀ဲလီၤ.
တၫ်ဟံးန့ၫ်မူဒါဒီးတၫ်တူၫ်မူတူၫ်ဒါ တၫ်မၤတဖၣ်စ့ၫ်ကီး လၢကတီၫ်ခဲအံၤ တၫ်မၤအီၤတန့ၫ်ဒံးဘၣ်န့ၣ် ပနၫ်ပၢၫ်လီၤ. ဘၣ်ဆၣ်သနာ်က့ တၫ်လၢပမၤတ့ၫ်ဒီးလၢပဃိတၫ်ကဲထီၣ်သးတဖၣ် ကထုးထီၣ်တဲဖျါ ဟံးန့ၫ်မူဒါအဂီၫ် လၢကျဲတ ဘိဂ့ၤတဘိဂ့ၤ ကကဲထီၣ်ခၢၣ်စး၀ံၤ တၫ်မၤစၢၤကန့ၫ်အဂီၫ်ဒီး ဆူၣ်ချ့တၫ်ကဟုကယာ် တၫ်မၤစၢၤတဖၣ်ကန့ၫ်အဂီၫ် တၫ်ကရၢကရိဒ်သိးန့ၣ်တဖၣ် ကြၢးတဲန့ၫ်၀ဲလီၤ.NUGမ့ၫ်ဂ့ၤ,NUCCမ့ၫ်ဂ့ၤ,ပှၤမၤစၢၤတၫ်တဖၣ်မ့ၫ်ဂ့ၤ ကသ့ၣ်ညါဘၣ် တၫ်အိၣ်သးနီၫ်နီၫ်အဂ့ၫ်”တဲအါထီၣ်၀ဲလီၤ.
ပှၤလီၫ်အိၣ်ကမှံဖိသၣ်တဖၣ် တူၫ်ဘၣ်ဆူၣ်ချ့တၫ်ဂ့ၫ်ကီလၢအမ့ၫ် ပှံာ်ညိးတၫ်ဆါ,တၫ်ညၣ်ဂိၫ်တၫ်ဆါတကးဘၣ် တၫ်အီၣ်လီၤထုးတၫ်ဆါပနီၣ်တဖၣ်စ့ၫ်ကီး ထံၣ်ဘၣ်၀ဲအဂ့ၫ်ဒီး ပှၤတနီၤ အတၫ်အီၣ်တၫ်အီတလၢလၢၤဘၣ် ဒီးဘူးကလၢာ်လံ.ပထံၣ်ဘၣ်လၢပှၤတနီၤ ဘၣ်လိအီၣ်မ့ဃ့အိၣ်၀ဲအဂ့ၫ်” နဲၣ်အဲမိၣ်တဲ၀ဲလီၤ.
ကၠီၣ်တဲၣ်-ပယီၤကျဲတၫ်ကူၣ်လဲၤမၤကၤအဂီၫ် ကျဲအရ့ဒိၣ်တဘိလၢအမ့ၫ် ဃိၣ်သၢဖျၢၣ်-လၢၫ်ကတံးကျဲဖီခိၣ် အနါကွ့ တၫ်တိာ် ကူၣ်ကျဲၤသုးကလၢၤ အ၀ံစိာ်တီဆှၢကျဲခဲလၢာ် စးထီၣ်ဖဲအပူၤကွံာ်လါအီကူးအပူၤ ကညီဒီကလုာ်တၫ်ထူၣ်ဖျဲးသုးမုၫ်ဒိၣ် -KNLA,တလၢၤတၫ်ပၢၫ်ဆၢသုးတဖၣ်ဒီး PDFသုးပာ်ဖှိၣ်တဖၣ် က၀ီၤကးတံၫ်ဒုး၀ဲန့ၣ်လီၤ.
ဖဲလါအီးကထိဘၢၣ်(၂)နွံတနွံအပူၤန့ၣ် ကီၫ်ဆၣ်နိၣ်တကီ,အနါကွ့သ၀ီ,အနါကွ့တၫ်တိာ်ကူၣ်ကျဲၤသုးကလၢၤ တၫ်ဒုး ဆူၣ်ထီၣ်ကဒါက့ၤ၀ံၤ သုးကီၣ်ကးလၢတၫ်က၀ီၤဒုးဃာ်အီၤတဖၣ်စ့ၫ်ကီး အသုးကလၢၤသုတလီၤတဂ့ၤအဂီၫ် ခီၣ်ဆၢ က့ၤ၀ဲလၢ ကလံၤကျါ,ဒြိဒီးကျိဖးဒိၣ်တဖၣ်န့ၣ်လီၤ.
တၫ်ဒုးတဘျီအံၤအပူၤ သုးကီၣ်ကးအသုး ဟဲပာ်လီၤတၫ်စုက၀ဲၤလၢ တၫ်ပၢၫ်ဆၢသုးတကပၤအိၣ် အိၣ်၀ဲအဂ့ၫ် တၫ်သ့ၣ်ညါဘၣ်လၢ ဂ့ၫ်ခီၣ်ထံးတၫ်ကစီၣ်အိၣ်န့ၣ်လီၤ.
Ref: Mizzima
