လါအီးကထိဘၢၣ်(၃၁),၂၀၂၄နံၣ်
စးထီၣ်လၢသုးဟံးန့ၫ်ဆူၣ်ထံကီၫ်တၫ်စိတၫ်ကမီၤ တုၤ ၂၀၂၄နံၣ်,လါအီးကထိဘၢၣ်(၃၀)သီအနံၤ လၢ(၃)နံၣ်ဘျဲၣ်အတီၫ်ပူၤ ဖီၣ်ဒုးဃာ်၀ဲ၀ံၤအလီၫ်ခံ မၤသံကမျၢၫ်အိၣ်ထီၣ်(၂)ကထိဂၤဃၣ်ဃၣ်အဂ့ၫ် တၫ်မၤစၢၤထံရူၫ်ကီၫ်သဲး ပှၤလီၤဃိၣ်ဖိကရၢ(AAPP)ထုးထီၣ်ဘိးဘၣ်ရၤလီၤ၀ဲလီၤ.
(AAPP)စရီတၫ်မၤနီၣ်အဖီခိၣ် ၂၀၂၁နံၣ်အပူၤပှၤ(၃၂၄)ဂၤ,၂၀၂၂နံၣ်အပူၤပှၤ(၆၃၂)ဂၤ,၂၀၂၃နံၣ်အပူၤ ပှၤ(၆၁၂)ဂၤ ဒီး၂၀၂၄နံၣ် လါယနူၤအါရံၤတုၤ လါအီးကထိဘၢၣ်(၃၀)သီနံၤ ပှၤ(၃၇၅)ဂၤ, ခဲလၢာ်ပာ်ဖှိၣ်ကမျၢၫ်(၂)ကထိဂၤဃၣ်ဃၣ်(၁,၉၄၃)အံၤ ဘၣ်တၫ်ဖီၣ်ဒုးဃာ်အီၤ၀ံၤအလီၫ်ခံ တၫ်မၤသံ၀ဲအဂ့ၫ်တဲ၀ဲလီၤ.လၢအကျါ စကဲကီၫ်ခီပူၤ ပာ်ဃုာ်(၉၉၈)ဂၤဒီးမ့ၫ်ဟီၣ်က၀ီၤလၢတၫ်သံတၫ်ပှၫ်အါကတၢၫ်အဂ့ၫ် ပာ်ဖျါ၀ဲလီၤ.
ဖဲလါအီးကထိဘၢၣ်(၂၆)သီနံၤ သုးကျိၤလၢဂံၫ်ဘါအိၣ်(၈၀)ဃၣ်ဃၣ်အံၤ နုာ်လီၤလၢ မကွံကီၫ်ခီ,ကီၫ်ဆၣ်ထံလ့,ကၠါခဲသ၀ီ၀ံၤ ဖီၣ်လီၫ်က၀ီၤကမျၢၫ်(၄)ဂၤ၀ံၤ မၤသံဒွဲၣ်အူကွံာ်၀ဲအဂ့ၫ် AAPP တၫ်ဘိးဘၣ်ရၤလီၤအပူၤ ပာ်ဖျါ၀ဲလီၤ.
တၫ်မၤစၢၤထံရူၫ်ကီၫ်သဲးပှၤလီၤဃိၣ်ဖိကရၢ(AAPP)အလါအီးကထိဘၢၣ်(၃၀)သီနံၤ တၫ်ဘိးဘၣ်ရၤလီၤအဖီခိၣ် သုးဟံးန့ၫ်တၫ်စိတၫ်ကမီၤ၀ံၤအလီၫ်ခံ လၢထံကီၫ်ဒီတဘ့ၣ် ပှၤဘၣ်သံအိၣ်ထီၣ်(၆)ကထိဂၤဃၣ်ဃၣ် (၅,၉၀၁ ဂၤ)၀ံၤ ပှၤလၢဘၣ်တၫ်ဖီၣ်ဒုးဃာ်အီၤလၢဃိၣ်ပူၤ အိၣ်(၂)ခံကလးဘျဲၣ်(၂၁,၀၆၄ ဂၤ)န့ၣ်လီၤ.
