လါအီးကထိဘၢၣ်(၃၁)သီ,၂၀၂၄နံၣ်
ဖဲလါအီးကထိဘၢၣ်(၂၉)သီအနံၤ, ဂီၤအဆၢကတီၢ် KNLAဒီးတၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးသုးကီၣ်ကးခီပူၣ်သုးကလၢၤအံၤအဃိ သုးကီၣ်ကးအပှၤသုးဖိတဖၣ် တူၢ်တန့ၢ်ဘၣ်ဒီး ပၥ်တ့ၢ်ကွံၥ်သုးကလၢၤဃ့ၢ်ဖျိးကွံၥ်၀ဲအဃိ တၢ်ထီၣ်ဒုးမၤန့ၢ်ကွံၥ် သုးကီၣ်ကးခီပူၣ်သုးကလၢၤ ဖဲလါအီးကထိဘၢၣ်(၂၉)သီအနံၤ, ဂီၤ(၈)နၣ်ရံၣ်ဘျဲၣ်အဆၢကတီၢ်အဂ့ၢ် ကီၢ်ရ့ၣ်မုၢ်တြီၢ်ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၢ်ဒိၣ် စံးဘၣ်အၣ်ထူခ့ၣ်န့ၣ်လီၤ.
သုးကီၣ်ကးခီပူၣ်သုးကလၢၤအံၤ KNLAဒီးတၢ်ပၢၢ်ဆၢသုးပၥ်ဖှိၣ်တဖၣ် စးထီၣ်ခး၀ဲဖဲ ၂၀၂၄နံၣ်, လါအီးကထိဘၢၣ်(၂၄)သီအနံၤလံၤလံၤလံန့ၣ်လီၤ.
တၢ်ထီၣ်ဒုးမၤန့ၢ် သုးကီၣ်ကးခီပူၣ်သုးကလၢၤအပူၤ ခံခီခံကပၤတၢ်ဘၣ်ဒိဘၣ်ထံး,တၢ်သံတၢ်ပှၢ်ဒီးတၢ်မၤန့ၢ် စုက၀ဲၤတဖၣ်အိၣ်၀ဲဘၣ်ဆၣ် တၢ်မၤတၢ်ရှဲပျီအဖၢမုၢ်ဒံးလီၤအဃိ တၢ်မၤလီၤတံၢ်အီၤတန့ၢ်ဒံးဘၣ် အဂ့ၢ် တၢ်သ့ၣ်ညါဘၣ်န့ၣ်လီၤ.
“ပယီၤသုးလၢအအိၣ်ဖဲ သုးကလၢၤဖဲန့ၣ်ဃီဒု တချူးလၢပှၤထီၣ်ဒုးအီၤဘၣ်ဒု ပထိၣ်တယၣ်န့ၣ် ကအိၣ်လၢ(၂၀၀)အခိၣ်အဃၢၤဖဲန့ၣ်လီၤ. ဘၣ်ဆၣ်နၥ်က့တၢ်ထီၣ်ဒုးအီၤဘျီဒု သံဘၣ်ဒိဒုကအိၣ်ဒၣ်ဃီ ဘၣ်ဆၣ်ဒီး တၢ်မၤစရီပတီၢ်တခီတန့ၢ်ဒံးဘၣ်အဂ့ၢ်” ကီၢ်ရ့ၣ်မုၢ်တြီၢ်ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၢ်ဒိၣ် စံး၀ဲန့ၣ်လီၤ.
တၢ်ထီၣ်ဒုးမၤန့ၢ် သုးကီၣ်ကးခီပူၣ်သုးကလၢၤအပူၤ သုးကီၣ်ကးအပှၤသုးဖိလၢ ပၥ်လီၤစုက၀ဲၤတအိၣ်၀ဲနီၤတဂၤဘၣ်န့ၣ်လီၤ.
ဘၣ်ဆၣ်လၢ BPLAအခိၣ် မီၣ်စီခးတခီ တၢ်ထီၣ်ဒုးမၤန့ၢ် သုးကီၣ်ကးခီပူၣ်သုးကလၢၤ၀ံၤအလီၢ်ခံ အဒုးယၤခိၣ်ခံ ဟ့ၣ်ထီၣ်တၢ်ကစီၣ်အဖီခိၣ် တၢ်မၤတၢ်ပျီရှဲသုးကလၢၤအဆၢကတီၢ် တၢ်ထံၣ်န့ၢ်၀ဲ သုးကီၣ်ကးအပှၤသုးဖိအစိၣ်(၁၀)ဒီး တၢ်ဖီၣ်န့ၢ်မူဒံး(၆)ဂၤအဂ့ၢ် ကွဲးဖျါဃၥ်၀ဲလၢ အပှၤတ၀ၢလံၥ်ကဘျံးပၤပူၤန့ၣ်လီၤ.
တၢ်ထီၣ်ဒုးသုးကီၣ်ကးခီပူၣ်သုးကလၢၤအဆၢကတီၢ် သုးကီၣ်ကးတပၤဟဲခးလီၤတၢ်လၢကလံၤကျါ ဖဲဆီဘှဲဒၢဒီး ခီပူၣ်သုးကလၢၤအကပၤတဖၣ် အါအါဂီၢ်ဂီၢ်လီၤဘၣ်ဆၣ် တၢ်ဘၣ်ဒိဘၣ်ထံးဒီးတၢ်သံတၢ်ပှၢ်တအိၣ်၀ဲဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ခီဖျိလၢတၢ်ကိၢ်ထီၣ်အဆၢကတီၢ်လံအဃိ သုးကီၣ်ကးတပၤ ဟဲခးလီၤတၢ်လၢကလံၤကျါအါထီၣ်သ့အဂ့ၢ် တၢ်ဟ့ၣ်ပလီၢ်ဃၣ် ဒူသ၀ီလၢ အိၣ်ဖဲလီၢ်က၀ီၤပူၤတဖၣ်အဃိ လီၢ်က၀ီၤကမျၢၢ်ဒူသ၀ီဖိတဖၣ်စ့ၢ်ကီး တၢ်ဘၣ်ဒိဘၣ်ထံးတၢ်သံတၢ်ပှၢ်တအိၣ်၀ဲဘၣ်အဂ့ၢ် ကီၢ်ရ့ၣ်မုၢ်တြီၢ်ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၢ်ဒိၣ်စံးအါထီၣ်၀ဲန့ၣ်လီၤ.
ခီပူၤသုးကလၢၤအံၤ သုးကီၣ်ကးဟဲသူၣ်လီၤအီၤ ဖဲစးထီၣ်လၢ ၁၉၉၂နံၣ်န့ၣ်လီၤ. ခီပူၣ်သုးကလၢၤအံၤ ပယီၤမီၤစိရိၤသုးကီၣ်ကးအဂီၢ် မ့ၢ်သုးကလၢၤတဖျၢၣ်လၢအကါဒိၣ်အသိး မ့ၢ်သုးကလၢၤတဖျၢၣ်လၢ ဒီသဒၢန့ၢ်ဃၥ်၀ဲ ဖၣ်ပူၣ်သုးတၢ်တိၥ်ကူၣ်ကျဲၤခိၣ်သ့ၣ် ဒီး သုးကလၢၤတဖၣ်လၢအိၣ်ဖဲ ဃိၣ်လိၥ်ကျိကၢၢ်နံၤန့ၣ်လီၤ.
ကတီၢ်ခဲအံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၅), ကီၢ်ရ့ၣ်မုၢ်တြီၢ်ဟီၣ်က၀ီၤအပူၤ သုးကီၣ်ကးအသုးကလၢၤအိၣ်တ့ၢ်ဒၣ်ထဲ (၁၁)ဖျၢၣ်လီၤအဂ့ၢ် တၢ်သ့ၣ်ညါဘၣ်န့ၣ်လီၤ.
