ခီဖျိလၢအံၣ်စရ့လဲၤဒုး ကၣ်စၣ်လၢကလံၤကျါအဃိ ပှၤဘၣ်သံ၀ဲ (၆၀)ဂၤ

လါအီးကထိဘၢၣ်(၃၀)သီ,၂၀၂၄နံၣ်

၂၀၂၄နံၣ်,လါအီးကထိဘၢၣ်(၂၉)သီအနံၤအံၣ်စရ့လဲၤဒုးကၣ်စၣ်လၢကလံၤကျါအဃိလဲၤဘၣ်၀ဲ(၅)ကထၢအိၣ်တၢ်သူၣ်ထီၣ်တဖျၢၣ်၀ံၤ အစှၤကတၢၢ်ပှၤဘၣ်သံ၀ဲ(၆၀)ဂၤအဂ့ၢ် ပၣ်လဲးစတဲဆူၣ်ချ့ပှၤဘၣ်မူဘၣ်ဒါတဖၣ် တဲလီၤ၀ဲန့ၣ်လီၤ.

တၢ်လဲၤဒုးတၢ်လၢကလံၤကျါအဃိ Beit Lahiyaဟီၣ်က၀ီၤအပူၤ ပှၤလီၤမၢ်၀ဲ(၁၇)ဂၤ၀ံၤ, ပှၤလၢအိၣ်ကးတံၥ်သးလၢ တၢ်သူၣ်ထီၣ်ဟးဂီၤတဖၣ်အဖီလၥ်စ့ၢ်ကီးအိၣ်၀ဲအဂ့ၢ် ပှၤဘၣ်မူဘၣ်ဒါတဖၣ် တဲ၀ဲန့ၣ်လီၤ.

မ့မ့ၢ်လၢ အံၣ်စရ့တခီ ဘၣ်ထွဲဒီးအတၢ်လဲၤဒုးတၢ်အဖီခိၣ် တထုးထီၣ်တဲဖျါထီၣ်၀ဲနီတမံၤဒံးဘၣ်.

ဘီမုၢ်စၢဖှိၣ်ကရၢနဲၣ်ရွဲၣ်ခိၣ်ကျၢၢ် AntonioGuterresတဲပဲၥ်အၢပဲၥ်သီလီၤ၀ဲသဲးစတၢ်ဘျၢလၢဘၣ်ထွဲဒီးတၢ်ကးတံၥ်ဃၥ် ဘီမုၢ်စၢဖှိၣ်ကရၢတၢ်ဆီၣ်ထွဲမၤစၤအ့ၣ်ကၠံၣ်စံၣ်(UNRWA)ကဆီၣ်ထွဲမၤစၢၤပၣ်လဲးစတဲထံလီၢ်ကီၢ်ပူၤပှၤဘၣ်ကီဘၣ်ခဲတဖၣ်အဂီၢ် အံၣ်စရ့ပၥ်ဂၢၤပၥ်ကျၢၢ်၀ဲအဖီခိၣ်န့ၣ်လီၤ.

ခီဖျိလၢ အံၣ်စရ့ပၥ်ဂၢၤပၥ်ကျၢၢ်၀ဲဒ်အံၤအဃိ သဲစးတၢ်ဘျၢလၢ အသးကမူထီၣ်လၢ အသီ(၉၀)အတီၢ်ပူၤအံၤ ပၣ်လဲးစတဲထံလီၢ်ကီၢ်ပူၤပှၤဘၣ်ကီဘၣ်ခဲဖိတဖၣ်အဂီၢ် တၢ်အိၣ်သးတဖၣ် ကပိၥ်ထွဲထီၣ်အခံလၢနးနးကျံးကျံးသ့၀ဲအဂ့ၢ် တဲ၀ဲန့ၣ်လီၤ.

တၢ်မၤဖျါထီၣ် သဲစးတၢ်ဘျၢအံၤအဃိ တၢ်ကဘှါရှဲ အံၣ်စရ့-ပၣ်လဲးစတဲတၢ်သဘံၣ်သဘုၣ်အဂ့ၢ်, တၢ်ဘၣ်ဒိဘၣ်ထံး လီၢ်က၀ီၤပူၤ တၢ်မုၥ်တၢ်ခုၣ်ဒီးတၢ်ဘံၣ်တၢ်ဘၢအဂီၢ်သ့အဂ့ၢ် ဒီး UNRWAအံၤ လိၣ်သပှၢ်ကတၢၢ်လၢ ပၣ်လဲးစတဲထံလီၢ်ကီၢ်ပူၤပှၤဘၣ်ကီဘၣ်ခဲဖိတဖၣ်အဂီၢ်အဂ့ၢ် နဲၣ်ရွဲၣ်ခိၣ်ကျၢၢ်တဲလီၤ၀ဲန့ၣ်လီၤ.

အံၣ်စရ့တခီ တဲပဲၥ်အၢပဲၥ်သီ၀ဲလၢ UNRWAအပှၤမၤတၢ်ဖိ အဒၢၣ်ဆ့ၣ်တဖၣ်အံၤ မ့ၢ်ဟါမးကရၢဖိတဖၣ်လီၤ၀ံၤ တနီၤတခီ ပၥ်ဃုၥ်၀ဲလၢ ဖဲ၂၀၂၃နံၣ်, လါအီးကထိဘၢၣ်(၇)သီအနံၤ, တၢ်မၤပျီၢ်မၤဂီၤအပူၤအဂ့ၢ်န့ၣ်လီၤ.

Ref: VOA