လါအီးကထိဘၢၣ်(၃၀)သီ,၂၀၂၄နံၣ်
တရူး-ပယီၤကီၢ်ဆၢဟီၣ်က၀ီၤအပူၤ မ့ၣ်အူဆၣ်ကၤထီၣ်သ့အဂ့ၢ် တၢ်သ့ၣ်ညါဘၣ်လၢ ပှၤလီၢ်က၀ီၤဖိလၢ အိၣ်ဖဲကီၢ်ဆၢတဖၣ်အအိၣ်န့ၣ်လီၤ.
“တၢ်တီၣ်သြီနုၥ် သိလၢ မုၢ်ဆဲၣ် မး၀့းတြဲၤတဆီတန့ၢ်ဘၣ်. မ့မ့ၢ်လၢ၀့ၢ်ပူၤတခီ တၢ်ပှ့ၤသိတဖၣ်န့ၢ်၀ဲလီၤ. တၢ်ဆါလီၤန့ၢ်လၢ တၢ်ပနီၣ်အသိးလီၤ. သိလ့ၣ်ဆံးတခိၣ် တၢ်ဆါလီၤန့ၢ်၀ဲ သၢကလးအပှ့ၤလီၤ. စဲၣ်ကဲၣ်တခိၣ် တၢ်ဆါလီၤန့ၢ်၀ဲ တကလးအပှ့ၤန့ၣ်လီၤ. မမ့ၢ်လၢသိကျးဖးဒိၣ်တဖၣ်အပူၤတခီ အပှ့ၤတထီၣ်ဘၣ်. တလံၣ်ထၢၣ် ၄၆၀၀ကၠးလီၤ.”အဂ့ၢ် မုၢ်ဆဲၣ်ပှၤလီၢ်က၀ီၤဖိတဂၤ တဲ၀ဲန့ၣ်လီၤ.
ကတီၢ်ခဲအံၤ သိကၤထီၣ်တအိၣ်၀ဲဒံးဘၣ်ဆၣ် စဲးဖီကဟၣ်သူသိတဖၣ် တၢ်မ့ၢ်တဟဲနုၥ်လီၤယံၤယံၤန့ၣ် စဲးဖီကဟၣ်သိတဖၣ် ကၤထီၣ်သ့အဂ့ၢ် အ၀ဲစံး၀ဲန့ၣ်လီၤ.
“မ့မ့ၢ်လၢ ဟိၣ်ပၣ်တခီ စဲးဖီကဟၣ်သူသိတဖၣ် ကၤထီၣ်တအိၣ်ဘၣ်. ကတီၢ်ခဲၤအံၤ တၢ်ပှ့ၤအီၤဒ်ညီနုၥ်န့ၢ်၀ဲလီၤ.”အဂ့ၢ် ၀း လီၢ်က၀ီၤဖိတဂၤ တဲ၀ဲန့ၣ်လီၤ.
လၢစှၤသီအတီၢ်ပူၤ တၢ်ကစီၣ်ဟူးထီၣ်သါထီၣ်လၢ တၢ်ကကးတံၥ်ကွံၥ် ကီၢ်ဆၢတြဲၤတဖၣ်အဃိ စဲးဖီကဟၣ်သိတဖၣ် အပှ့ၤထီၣ်အဃိ မ့မ့ၢ်လၢ ၀းတခီ တၢ်သုတမၤအါထီၣ်တၢ်ဖိတၢ်လံၤအပှ့ၤကလံၤအဂီၢ်, တၢ်မ့ၢ်ထံၣ်န့ၢ်လၢ ပှၤတီၣ်ဆါတၢ်ဖိတၢ်လံၤအပှ့ၤကလံၤတဖၣ်န့ၣ် တၢ်လဲၤပၥ်ဖျါထီၣ်သ့အဂ့ၢ်ဒီး တၢ်မ့ၢ်ထံၣ်န့ၢ်အီၤန့ၣ် တၢ်ကဟံးန့ၢ်ဂ့ၢ်၀ီတုၤလီၤတီၤလီၤအဂ့ၢ် ဒုးသ့ၣ်ညါဘိးဘၣ်ရၤလီၤဃၣ်၀ဲ ဖဲလါအီးကထိဘၢၣ်(၂၅)သီအနံၤန့ၣ်လီၤ.
တရူးကးတံၥ်ကွံၥ် တၢ်တီၣ်သြီနုၥ် တၢ်ဖိတၢ်လံၤတဖၣ် ဖဲပယီၤ-တရူးကီၢ်ဆၢ မဲလါ-တၣ်လီး, မုၢ်ဆဲၣ် မး၀့း-ကၠဲၣ်ကီၣ်တြဲၤတဖၣ်၀ံၤ ကတီၢ်ခဲအံၤ ပယီၤ-တရူးကီၢ်ဆၢတြဲၤတဖၣ်အပူၤ တၢ်ကးတံၥ်ဃၥ်တၢ်တီၣ်သြီနုၥ်၀ဲ မ့ၣ်အူဆၣ်, တၢ်သူၣ်ထီၣ်တၢ်ဖိတၢ်လံၤ,လီမ့ၣ်မူတၢ်ဖိတၢ်လံၤ,စဲးဖီကဟၣ်တၢ်ဖိတၢ်လံၤ,သုးတၢ်ပီးတၢ်လီတၢ်ဖိတၢ်လံၤ, တၢ်ဆဲးဃံဆဲးလၤတၢ်ဖိတၢ်လံၤ,အိၣ်လဲတၢ်ဖိတၢ်လံၤတဖၣ်၀ံၤညီနုၥ်တၢ်တီၣ်သြီနုၥ်၀ဲတၢ်အီၣ်တၢ်အီတၢ်ဖိတၢ်လံၤတဖၣ်, တၢ်ကူတၢ်ကၤဒီး တၢ်ဖိတၢ်လံၤအဂၤတဖၣ်အဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
Ref: VOM
