အီၣ်စ့ၣ်ယးသုးကျိၤ ဟဲထီၣ်ကဒါက့ၤအဃိ တၫ်ဒုးကဲထီၣ်

လါအီးကထိဘၢၣ်(၃၀)သီ,၂၀၂၄နံၣ်

ကီးတရံး-ရၤမတံအ့ရှၢၣ်ကျဲဒီးကျဲလီၫ်လံၤ တၫ်က့ၤပၢဆှၢကဒါက့ၤကန့ၫ်အဂီၫ် ခးစၢၤ၀ဲလၢကျိဖးဒိၣ် ဟီၣ်၀့ၣ်စၣ်၀ံၤ အီၣ်စ့ၣ်ယးသုးကျိၤဟဲထီၣ်အဃိ တၫ်ဒုးကဲထီၣ်၀ဲန့ၣ်လီၤ.

ပယီၤ-ကၠီၣ်တဲၣ်တၫ်ကူၣ်လဲၫ်မၤကၤအဂီၫ် အ့ရှၢၣ်ကျဲမုၫ်ဒိၣ်ဒီး၀့ၫ်ရၤမတံလၢအရ့ဒိၣ်အံၤ သုးကီၣ်ကးကက့ၤ ပၢဆှၢကဒါက့ၤ၀ဲကန့ၫ်အဂီၫ် အီၣ်စ့ၣ်ယးသုးကျိၤန့ၣ် စးထီၣ်ဖဲလါစဲးပထ့ဘၢၣ်(၂)နွံတနွံန့ၣ် ခးစၢၤ၀ဲလၢ ဟီၣ်ခိၣ်လိၤဒီးကလံၤကျါ၀ံၤ ဟဲထီၣ်ကဒီးအဃိ တၫ်ဒုးကဲထီၣ်ကဒီး၀ဲန့ၣ်လီၤ.

အီၣ်စ့ၣ်ယးသုးကျိၤန့ၣ် ဖဲယံာ်ထီၣ်(၂)လါဃၣ်ဃၣ်အကတီၫ် တိဖျိ၀ဲကညီဒီကလုာ်တၫ်ထူၣ်ဖျဲးသုးမုၫ်ဒိၣ် KNLAသုးကျိၤတဖၣ်တန့ၫ်ဘၣ်ဒီး ဘၣ်ဒိဘၣ်ထံးဆါအဃိ ဘၣ်ခးစၢၤ၀ဲလၢ ဟီၣ်ခိၣ်လိၤဒီးကလံၤကျါန့ၣ်လီၤ.

တၫ်ဒုးကဲထီၣ်လၢဂီၤဟါကိးနံၤဒဲးဃၣ်ဃၣ်လီၤအဂ့ၫ် ဂ့ၫ်ခီၣ်ထံးတၫ်ကစီၣ်စံး၀ဲန့ၣ်လီၤ. “အခဲအံၤအိၣ်(၄)သီ ,(၅)သီ လံဒီးလၢဂီၤမ့ၫ်ဂ့ၤဟါမ့ၫ်ဂ့ၤလီၤ.ဖဲမဟါနံၤ ကဘီယူၤဒုးသုးဟဲ(၃)ဘျီလီၤ. တၫ်ဒုးကဲထီၣ် လၢကီးနွဲၣ်န့ၣ်လီၤ .လၢန့ၣ် တကပၤဒိးလီၤဃာ်မ့ၣ်ပိၫ်ဒီးပှၤစ့ၫ်ကီးပဒိးလီၤဃာ်လီၤ.ခးလိာ်သးယၫ်ခီယၫ်ခီန့ၣ်လီၤ.”

အပူၤကွံာ် စးထီၣ်ဖဲလါဒံၣ်စဲဘၢၣ် လၢ၀့ၫ်ကီးတရံး သုးကီၣ်ကးဒီးKNLAသုးပာ်ဖှိၣ်တဖၣ်အဘၢၫ်စၢၤတၫ်ဒုးကဲထီၣ် ၀ံၤ ကီးတရံး-ရၤမတံကျဲ သုးကီၣ်ကးအသုးကလၢၤတဖၣ် တၫ်ထီၣ်ဒုးမၤန့ၫ်ကွံာ်၀ံၤ အ့ရှၢၣ်ကျဲမုၫ်ဒိၣ်န့ၣ် တုၤလၢခဲကနံၤအံၤ တၫ်ပၢဆှၢဃာ်၀ဲလီၤ.

ဖဲလါအ့ဖြ့ၣ်အပူၤ သုးကီၣ်ကးကိးက့ၤ ပှၤလီၫ်အိၣ်ကမှံဖိလၢ ကက့ၤနုာ်လီၤအိၣ်ကဒါက့ၤလၢ ၀့ၫ်ကီးတရံးပူၤ အဂီၫ်န့ၣ် လီၤ.ဘၣ်ဆၣ်သုးကီၣ်ကးတကပၤ ခးတၫ်လၢကျိဖးဒိၣ်ဒီးကလံၤကျါတဖၣ်အဃိ ပှၤက့ၤနုာ်လီၤအိၣ်လၢ၀့ၫ်ပူၤတဖၣ် ဘၣ်ယိၣ်ဘၣ်ဘှီတၫ်၀ံၤ အကြၢးအိၣ်လၢၤဘၣ်အဂ့ၫ် ပှၤလီၫ်အိၣ်ကမှံဖိတဖၣ်တဲ၀ဲလီၤ.

ဖဲလါအီးကထိဘၢၣ်(၂၉)သီအနံၤ ဂီၤ(၁)နၣ်ရံၣ်ဃၣ်ဃၣ်အကတီၫ် သုးကီၣ်ကးန့ၣ် ဟဲယူၤကွၫ်ဟုၣ် ၀့ၫ်ရၤမတံ လၢကလံၤကျါ တစှၤန့ၫ်(၃)ဘျီဘၣ်အဃိ ဘၣ်ယိၣ်ဘၣ်ဘှီတၫ်အဂ့ၫ် ပှၤ၀့ၫ်ရၤမတံဖိတဖၣ်တဲဲ၀လီၤ.

ဖဲလါအီးကထဘၢၣ်(၂၀)သီအနံၤ မုၫ်ထူၣ်အကတီၫ်န့ၣ် သုးကီးကးအသုးဆှၢလီၤန့ၫ်(၂၇၅)သုးကလၢၤ သုးတၫ်ကူတၫ်သိး,တၫ်စုက၀ဲၤဒီးတၫ်အီၣ်တၫ်အီလၢကလံၤကျါ၀ံၤ အိၣ်ကတီၤသးလၢသုးဂ့ၫ်၀ီအဂီၫ်န့ၣ်လီၤ.

ဒ်န့ၣ်အသိး ၀့ၫ်ရၤမတံအဖီခိၣ် ၀့ၫ်တၫ်ဘံၣ်တၫ်ဘၢအဂီၫ် BGF,DKBA,PC သုးဖိတဖၣ် အိၣ်ခိးလီၤဟံးန့ၫ် တၫ်ဘံၣ် တၫ်ဘၢအိၣ်၀ဲအဂ့ၫ် ပှၤလၢအိၣ်ဘူးဒီးသုးကီၣ်ကးတဲ၀ဲန့ၣ်လီၤ.

Ref: DVB