လါအီးကထိဘၢၣ်(၂၉)သီ,၂၀၂၄နံၣ်
၂၀၂၄နံၣ်, လါအီးကထိဘၢၣ်(၂၉)သီအနံၤ ဂီၤအဆၢကတီၢ် KNLA၊KNDOအပှၤသုးဖိတဖၣ် လဲၤခးသုးကီၣ်ကးအ (၉၁၃)သုးကလၢၤလၢအိၣ်ဖဲ သုးက့(၇), ကီၢ်ရ့ၣ်ဖၣ်အၣ်, မၤနၢၤပျီဟီၣ်က၀ီၤပူၤလၢ စုဘျၢအဂ့ၢ် တၢ်သ့ၣ်ညါဘၣ်လၢ KNLA ပှၤဘၣ်မူဘၣ်ဒါတဂၤအအိၣ်န့ၣ်လီၤ.
တၢ်လဲၤခး သုးကီၣ်ကးသုးကလၢၤလၢ စုဘျၢ(၂)ဘီအဃိ သုးကီၣ်ကးအပှၤသုးဖိ ဘၣ်သံ၀ဲ(၂)ဂၤအဂ့ၢ် KNLA ပှၤဘၣ်မူဘၣ်ဒါတဂၤ စံး၀ဲန့ၣ်လီၤ.
ကတီၢ်ခဲအံၤ သုးကီၣ်ကး(၉၁၃)သုးကလၢၤဒီးကဆီ၀ါလ့သုးကလၢၤ(၂)ဖျၢၣ်အပူၤ တၢ်အီၣ်တၢ်အီဘူးကလၢၥ်ကွံၥ်လံအဃိ မၢအပှၤဟဲဆှၢန့ၢ်အီၤအဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
တၢ်ပၢၢ်ဆၢသုးတဖၣ် လဲၤဒုး၀ဲထီဘိလၢ သုးကီၣ်ကးနိးဒ့သုးကလၢၤဒီးကဆီ၀ါလ့သုးကလၢၤလၢ စဲးပြဲး၀ံၤ မၤ၀ဲတၢ်ကးတံၥ်တဖၣ်အဂ့ၢ် စံး၀ဲန့ၣ်လီၤ.
“ဒ်သိး အ၀ဲသ့ၣ်ကဟဲပၥ်လီၤစုက၀ဲၤအဂီၢ် ပလဲၤတဲဘၣ်ဆၣ် တတူၢ်လိၥ်ဘၣ်. အဃိ တၢ်မ့ၢ်လဲၤခးအီၤလၢစုဘျၢတဘျီန့ၣ် သံတဂၤထီဘိလီၤ. မ့ၢ်ယံၤထီၣ် အဂံၢ်အဘါမ့ၢ်စှၤလီၤန့ၣ် ကဆီ၀ါလ့သုးကလၢၤအပှၤသုးဖိတဖၣ် ဟဲက့ၤပၥ်ဖှိၣ်သ့ဒီး(၉၁၃-နိးဒ့သုးကလၢၤ)န့ၣ်လီၤ. မ့ၢ်တဟဲပၥ်လီၤစုက၀ဲၤဘၣ်ဒီး ကျဲအိၣ်ဒၣ်တဘိလၢ တၢ်ကထီၣ်ကွံၥ်ဒုးအီၤဒီး တၢ်အီၣ်တၢ်အီလၢၥ်ကွံၥ် ကသံ၀ဲန့ၣ်လီၤ.” အဂ့ၢ် ဂံၢ်ခီၣ်ထံးတၢ်ကစီၣ်တဂၤ စံး၀ဲန့ၣ်လီၤ.
တၢ်လဲၤခး သုးကီၣ်ကးနိးဒ့သုးကလၢၤ၀ံၤအလီၢ်ခံ သုးကီၣ်ကးတပၤခးလီၤကျိဖးဒိၣ်(၁)ဖျၢၣ် ဒီး ခးလီၤနါစိၤစ့ၢ်ကီး ကျိဖိတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
Ref: Salween Press
